Shakubelenga 4 - Baibo Busansulushi Bwa Libuku Ili

Milimo ya bene Lefi ba mucipani cakwe Koati

¹ Mpomunyaawo Mwaami Lesa wakaambila Mose aAloni ayi,

² “Belenga bene Lefi ba mushipani shakwe Koati mumaandaabo,

³ akulemba basankwa boonse bacite myaaka ili kuswa pamakumi otatwe alimwi akweela pamakumi osanwe nkokwaamba ayi boonse beelete kusebensa muTente ya Cipangano.

⁴ Mulimo wa cipani cakwe Koati nkulama shintu shisalalite shiindaawo sha muTente ya Cipangano.

⁵ Na ciindi cakulonga cashikila, Aloni abana bakwe basankwa balyeelete kwinjila muTente akwaangula cisani cakushitilisha cili kunembo lya Libokoshi lya Cipangano alimwi akufweka Libokoshi ilyo ancico.

⁶ Balaakufwekawo cipaya citeshimite, peculu akuyalawo cisani ca mushobo waliculu alimwi akubikamo shisamu shakunyamushaako.

⁷ “Patebulu ya shimaande shipekwa kuMwaami Lesa, balaakuyalawo cisani ca mushobo waliculu akubikawo mbale, mbale shifongomene sha tununkila kabotu, mbale shifongomene sha shipo alimwi amingomo ya shipo sha cakunwa. Patebulu apo palyeelete kunoocanika shimaande lyoonse.

⁸ Ono pashintu shoonse ishi, bakafwekewo cisani cisalala pyu akwiilikawo cipaya citeshimite. Lyalo bakenjisheemo shisamu shakunyamushaako.

⁹ “Pesule balaakunyamuna cisani ca mushobo waliculu akufweka pacakubikawo malampi, malampi a ncico, mano, mbale shiselebete alimwi ashakubikamo mafuta a olifi shoonse.

¹⁰ Lyalo balaakucipetelesha ashintu sha ncico shimwi shoonse mucipaya citeshimite alimwi akubika pacakunyamwitaawo.

¹¹ “Kuswawaawo balaakuyala cisani ca mushobo waliculu pacipaililo ca golodi, akufwekawo cipaya citeshimite alimwi akwinjishamo shisamu shakunyamushaako.

¹² Balaakubwesa shintu shoonse shisebenseshekwa muMusena Usalalite akushipetelesha pacisani ca mushobo waliculu, alimwi akwiilikawo cipaya citeshimite peculu. Lyalo nkokushibika pacakunyamwitaawo.

¹³ Mpeeke balaakukusha milota ya pacipaililo ca bulonse alimwi akufwekawo cisani cifubelafubela.

¹⁴ Ndyeshi bakabikewo shintu shoonse shisebenseshekwa mumilimo ya pacipaililo, shikaye shakubikaawo mulilo, shakusubushako nyama, mafosholo alimwi ambale shifongomene. Kuboolaawo ndyeshi bakafwekewo cipaya citeshimite akwinjishamo shisamu shakunyamushaako.

¹⁵ “Ono na nciindi cakulonga, Aloni abana bakwe basankwa baakumanisha kufweka shintu shisalalite ashintu sha nshisho shoonse, cipani cakwe Koati cilaakwisa mukushinyamuna. Sombi cipani taceelete kucata shintu shisalalite ishi, mukwiinga na bashicata inga bafwa. Anu iyi njemilimo ya cipani cakwe Koati lyoonse na ciindi cakulonsha Tente ya Cipangano cashikila.

¹⁶ “Lakwe Eliyasa mwanaakwe Aloni mupailishi, mulimo wakwe ngwakulama Tente ya Cipangano ashintu shisalalite shoonse shiliimo nkokwaamba ayi mafuta a mumalampi, tununkila kabotu, shipo shili anga ngamaila, mafuta akunanika.”

¹⁷ Lyalo Mwaami Lesa wakaambila Mose aAloni ayi,

¹⁸ “Mutaleki cipani cakwe Koati

¹⁹ ayi bacaikwe kwiinda mukusena muliimfwa lya shintu shisalalite shiindaawo ishi. Ono kwaamba ayi citacitiki ici, Aloni abana bakwe basankwa balaakwinjila mukati akupa muntu womwi awomwi mulimo wakucita alimwi akumulwiita cakunyamuna.

²⁰ Sombi na bene Koati benjila muTente akubona bapailishi kababamba shintu shisalalite, nabi kubilwitakobo liinso, balaakufwa.”

Milimo ya bene Lefi ba mucipani cakwe Geshoni

²¹ Mpomunyaawo Mwaami Lesa wakaambila Mose ayi,

²² “Belenga bene Lefi ba mushipani shakwe Geshoni mumaandaabo.

²³ Lyalo ulembe basankwa boonse bacite myaaka kuswa pamakumi otatwe akweela pamakumi osanwe, nkokwaamba ayi boonse beelete kusebensa muTente ya Cipangano.

²⁴ Balo balaakuba amulimo wakunyamuna

²⁵ shisani sha Tente, Tente ya Cipangano, cakufweka peculu ca mukati, cakufweka peculu ca pansengwe ca cipaya citeshimite, cisani cakushitilisha kumulyango,

²⁶ shisani shakushitilisha antaambo sha kulushito lushingulukite Tente alimwi acipaililo, shisani shakushitilisha kumulyango wa lushito alimwi ashintu shoonse shibikwaako pakwiiyaka. Nkokwaamba ayi bamucipani cakwe Geshoni mbeshi bakacite milimo yoonse iyandika kushintu ishi.

²⁷ Aloni abana bakwe basankwa balaakweendelesha bene Geshoni mumulimo wakunyamuna nabi milimo imwi. Balo balyeelete kubalwiita shintu shoonse isho nshebeelete kunyamuna.

²⁸ Anu iyi njemilimo ya cipani cakwe Geshoni muTente ya Cipangano. Balaakwiicita kwiinda mukutanjililwa aItama mwanaakwe Aloni mupailishi.”

Milimo ya bene Lefi ba mucipani cakwe Melali

²⁹ Mpomunyaawo Mwaami Lesa wakaambila Mose aAloni ayi, “Belenga bene Lefi ba mushipani shakwe Melali mumaandaabo,

³⁰ akulemba basankwa boonse bacite myaaka ili kuswa pamakumi otatwe alimwi akweela pamakumi osanwe nkokwaamba ayi boonse beelete kusebensa muTente ya Cipangano.

³¹ Balo mulimo wabo ngwakunyamuna shintu sha makonko one sha shisamu, mbaalo, shisamu alimwi ashapanshi sha kuTente.

³² Balaakunyamuna ashisamu, shapanshi sha bulonse, mpoopo, alimwi antaambo shakulushito lushingulukite Tente, kubikaawo ashintu shimwi shoonse shibikwaako pakwiiyaka. Muntu womwi awomwi ulaakupekwa mulimo ngweelete kucita.

³³ Anu iyi njemilimo ya cipani cakwe melali muTente ya Cipangano. Balaakwiicita kwiinda mukutanjililwa aItama mwanaakwe Aloni mupailishi.”

Kubelengwa kwa bene Lefi

³⁴ Mpomunyaawo Mose, Aloni alimwi abamatanjilili ba bene Isilaeli bakabelenga bene Koati mushipani alimwi amumaandaabo.

³⁵ Ono basankwa boonse bakalinga kucite myaaka kuswa pamakumi otatwe akweela pamakumi osanwe, abo bakesa mukusebensa muTente ya Cipangano,

³⁶ ndibakabelengwa mushipani shabo bakakumana 2,750.

³⁷ Nkokwaamba ayi abo mbobantu boonse ba mushipani shakwe Koati, abo bakalinga kusebensa muTente ya Cipangano. Mose aAloni bakababelenga kweelana aMwaami Lesa mbwaakaambila Mose.

³⁸ Bene Geshoni abalo bakabelengwa kwiinda mushipani alimwi amumaandaabo.

³⁹ Ono basankwa boonse bakalinga kucite myaaka kuswa pamakumi otatwe akweela pamakumi osanwe, abo bakesa mukusebensa muTente ya Cipangano,

⁴⁰ ndibakabelengwa mushipani amumaandaabo bakakumana 2,630.

⁴¹ Nkokwaamba ayi abo mbobantu boonse ba mushipani shakwe Geshoni, abo bakalinga kusebensa muTente ya Cipangano. Mose aAloni bakababelenga kweelana aMwaami Lesa mbwaakaambila Mose.

⁴² Kuboolaawo bene Melali abalo bakabelengwa kwiinda mushipani alimwi amumaandaabo.

⁴³ Ono basankwa boonse bakalinga kucite myaaka kuswa pamakumi otatwe akweela pamakumi osanwe, abo bakesa mukusebensa muTente ya Cipangano,

⁴⁴ ndibakabelengwa mushipani amumaandaabo bakakumana 3,200.

⁴⁵ Nkokwaamba ayi abo mbobantu boonse ba mushipani shakwe Melali. Mose aAloni bakababelenga kweelana aMwaami Lesa mbwaakaambila Mose.

⁴⁶ Aboobo, Mose, Aloni alimwi abamatanjilili ba bene Isilaeli bakabelenga bene Lefi boonse kwiinda mushipani shabo alimwi amumaandaabo.

⁴⁷ Nkokwaamba ayi basankwa boonse bakalinga kucite myaaka kuswa pamakumi otatwe akweela pamakumi osanwe, abo bakalinga kusebensela Tente ya Cipangano akwiinyamuna

⁴⁸ boonse pantu pomwi bakakumana 8,580.

⁴⁹ Ono kweelana aMwaami Lesa mbwaakaambila Mose muntu womwi awomwi wakapekwa mulimo alimwi akulwiitwa cakunyamuna. Aboobo boonse bakabelengwa kweelana aMwaami Lesa mbwaakaambila Mose.