Shakubelenga 36 - Baibo Busansulushi Bwa Libuku Ili

Cipansha cakapyana bana bakwe Selofeyadi banakashi

¹ Mpeeke bamatanjilili ba mikowa ya mucipani cakwe Gilyadi, mwanaakwe Makiya, alimwi mushikulu wakwe Manase mwanaakwe Josefu, bakaya kuli Mose abamatanjilili ba bene Isilaeli bamwi.

² Bakaamba ayi, “Mwaami Lesa wakamwaambila ayi mukaabanye bene Isilaeli cishi kwiinda mukuuma cisolo. Wakamwaambila alimwi ayi cipansha ca mukwabesu Selofeyadi mukape bana bakwe banakashi.

³ Sombi mulyeelete kwishiba ayi na beebwa kubasankwa bamumukowa wa bene Isilaeli umwi, lyalo cipansha cabo cilaakuba ca mukowa uyo, aboobo cishi coonse ncotwakapekwa cilaakuceyeshekwa.

⁴ Ono muMwaaka wa Lwaanguluko, cipansha ca bana bakwe Selofeyadi banakashi cilaakwiilikilwabo limwi kumukowa uyo ngobeebwaako, anu mukowa wesu teshi ukaciboneewo alimwi.”

⁵ Aboobo Mose wakapa bene Isilaeli mulawo uyu wakaswa kuMwaami Lesa. Wakaamba ayi, “Citokwaamba mukowa wakwe Manase cililuleme,

⁶ paceebo ceeco Mwaami Lesa waamba ayi bana bakwe Selofeyadi banakashi balyaangulukite kweebwa kumusankwa uli woonse ngobasuni, kulilabo kaali wa mumukowa wabo.

⁷ Nkokwaamba ayi shintu sha mwine Isilaeli woonse shilyeelete kunoolibo sha mumukowa wakwe.

⁸ Mwanakashi uli woonse ubwesa cipansha ca cishi ca muntu wakafwa mumukowa wa bene Isilaeli, ulyeelete kweebwa kumusankwa wa mumukowa weenka uyo. Mukucita boobo, mwine Isilaeli womwi awomwi ulaakunoocitebo cipansha ca bamashali bakwe bakulukulu abo bakafwa,

⁹ alimwi cipansha ico teshi cikanootuntuluka kuswa kumukowa umwi akuya kuumwi. Mukowa uli woonse ulaakutolelela kuba acipansha ca nguwo.”

¹⁰ Paceebo ceeci, bana bakwe Selofeyadi banakashi bakacita kweelana abwakabaambila Mose.

¹¹ Meenaabo nguMaala, Tesa, Ogila, miluka alimwi aNowa. Ncakwiila banakashi aba bakeebwa kubana ba bamakwababo baishiwabo.

¹² Bakeebwa mushipani sha bamulunyungu lwakwe Manase mwanaakwe Josefu, lyalo cipansha cabo cakalingabo nca mumukowa wa baishiwabo.

¹³ Anu milawo amilasho iyi njeyeeyo Mwaami Lesa njaakapa bene Isilaeli kwiinda muli Mose, mumawesa a Moabu, kwitala lya Mulonga wa Joodani na kamuli muJeliko.