Shakubelenga 35 - Baibo Busansulushi Bwa Libuku Ili

Mandabala anene akapekwa kubene Lefi

¹ Ono mumawesa a Moabu kwitala lya Mulonga wa Joodani na kamuli muJeliko, Mwaami Lesa wakaambila Mose ayi,

² “Lwiita bene Isilaeli ayi kuswa mushishi isho nshebakapekwa, balyeelete kupawo bene Lefi mandabala anene amwi ayi bekaleemo, pantu pomwi amafulo a ngawo.

³ Mandabala anene aya alaakuba a bene Lefi, umo mweshi bakanookala. Mafulo ayo alaakuba a ŋombe alimwi ashifubwa shabo shimwi shoonse.

⁴ Mafulo alyeelete kuba pansengwe lya lilinga lya ndabala inene yomwi ayomwi alimwi mafulo ayo alyeelete kulaampa mamita ali 450 mumbasu shoonse,

⁵ kwaamba ayi kukabe musena weelene moonse moonse. Nkokwaamba ayi ulyeelete kuba mamita ali 900 kulubasu lomwi alomwi, lyalo ndabala inene ikanooli pakati.

⁶ Ulyeelete kupa bene Lefi mandabala anene ali yosanwe ayomwi kwakulobokela na muntu wacaya mubye mumapuso. Ukeelikeewo mandabala aamwi ali makumi one aobilo

⁷ acite amafulo kwaamba ayi akakumane makumi one aosanwe alimwi aotatwe.

⁸ Anu mandabala anene a bene Lefi mumukowa womwi awomwi alyeelete kupekwa kweelana akukomena kwa cishi ca nguwo.”

Mandabala anene akulobokelaamo

⁹ Mpeeke Mwaami Lesa wakaambila Mose ayi,

¹⁰ “Lwiita bene Isilaeli ayi, ‘Na mukasubuke Mulonga wa Joodani akushika mucishi ca Kenani,

¹¹ mulyeelete kusala mandabala anene akulobokelaamo na muntu wacaya mubye mumapuso.

¹² Muntu uyo teshi akanoolibilika kumukwabo mufu shikuboosha cishole. Muntu wakacaya mubye teelete kucaikwa kaatana koomboloshekwa mumeenso a bantu boonse.

¹³ Mandabala anene ali osanwe ayomwi ayo ngweshi mukape, alaakuba mandabala anu akulobokelaamo,

¹⁴ otatwe kwicwe lya Joodani, otatwe amwi mucishi ca Kenani.

¹⁵ Mandabala anene aya alaakuba akulobokelaamo bene Isilaeli alimwi abaswamashi bakesabo mukufwakasha nabi baabo baneshi. Uyo woonse weenga wacaya mubye mumapuso inga walobokelaako.

¹⁶ “ ‘Ono na muntu wooma ceela mubye, mpeeke wafwa, muntu uyo ngumucayi, aboobo alakwe ulyeelete kucaikwa.

¹⁷ Nabi na umwi uli woonse kaacite libwe mulyaansa lyeenga lyacaya muntu, ono na woomishako umwi, mpeeke wafwa, ingayi ngumucayi. Aboobo alakwe ulyeelete kucaikwa.

¹⁸ Nabi na umwi uli woonse kaacite cisamu mulyaansa nceenga cacaya muntu, na woomishako umwi, mpeeke wafwa, ingayi ngumucayi. Aboobo, alakwe ulyeelete kucaikwa.

¹⁹ Ono mukwabo wooyo wakacaikwa ngoweelete kucaya mucayi uyo kuli koonse nkweenga wamucana.

²⁰ “ ‘Na muntu umwi ulipatite mubye, ono wamucaya kwiinda mukumuwisha panshi, kumuwaala cintu cimwi

²¹ nabi kumuuma makoofi, ingayi alakwe ngumucayi alimwi ulyeelete kucaikwa. Aboobo mukwabo wooyo wacaikwa ulyeelete kucaya mucayi kuli koonse nkweenga wamucana.

²² “ ‘Ono na umwi wacaya mubye mumapuso kapataapu lupato, kwiinda mukumuwisha panshi nabi kumuwaala cintu cimwi,

²³ nabi na kaatamubwene, ono wawaala libwe lyeenga lyashikila pamuntu umwi uteshi mulwaninyina, alimwi ngwaatakalinga kusuni kucisa, mpeeke wafwa,

²⁴ mushikani sha mbuli sheeshi, beshikoombolosha balaakuba kulubasu lwa wooyo wakacaya mubye, kuteshi mukwabo usuni kucaya wooyo wakacaya.

²⁵ Nkokwaamba ayi likoto lya bene Isilaeli lilyeelete kufuna wooyo wakacaya mubye mumapuso kumukwabo wooyo usuni kumucaya. Balyeelete akumuboosha kundabala inene yakulobokelaamo uko nkwaakalinga. Ulyeelete kwikala nkomunya uko kushikila Mupailishi Munene uliiwo akafwe.

²⁶ Ono na muntu uyo wakacaya mubye waswa mundabala inene yakulobokelaamo umo mwaakaya,

²⁷ na mukwabo wooyo wakacaikwa wamucana akumucaya, ingayi taacite mulandu pakumucaya.

²⁸ Muntu uyo wakacaya mubye mumapuso ulyeelete kunoolibo mundabala inene yakulobokelaamo kushikila Mupailishi Munene akafwe. Kuswawaawo inga waboola kumishaabo.

²⁹ Anu milasho iyi ilikumite kuli ndimwe amashalane oonse acisa kuli koonse nkweshi mukanoobete.

³⁰ “ ‘Muntu uli woonse ucite mulandu wakucaya mubye inga wapekwa mulandu akucaikwa kwiinda mubukamboni bwa bantu bobilo nabi beendaawo, sombi taaku weelete kucaikwa kwiinda mubukamboni bwa muntu womwibo.

³¹ Ono mucayi teelete kulubulwa sobwe, sombi ulyeeletebo kucaikwa.

³² Ono na muntu walobokela kundabala inene yakulobokelaamo, tamweelete kutambula maali akulilubula kwaamba ayi aboolele kumishaabo Mupailishi Munene kaatana kufwa.

³³ Mutabishi cishi ncemushiiteemo ceebo kucaya muntu kulabisha cishi. Cishi tacikoonshi kusalashikwa kweelana amulawo, sombibo na mucayi uyo alakwe wacaikwa.

³⁴ Anu tamweelete kubisha cishi ncemushiiteemo mukwiinga nebo ndime Mwaami Lesa uyo wikala pakati ka bene Isilaeli.’ ”