Shakubelenga 34 - Baibo Busansulushi Bwa Libuku Ili

Manyinsa a cishi

¹ Mpeeke Mwaami Lesa wakaambila Mose ayi,

² “Lwiita bene Isilaeli ayi, ‘Na mukashike mucishi ca Kenani ico ncentoomupa, manyinsa a cishi canu alaakuba bobulya.

³ Nyinsa ya kumalenge ilaakutalikila kuluyanga lwa Sini muya nyinsa a Edomu. Kulubasu lwa kwicwe, ilaakutalikila kumalenge lya kweela Lweenge lwa Mwiinyo.

⁴ Lyalo alaakupetukila kumalenge kululama kunshila iinda pakati ka tulundu iya kuAkilabimu akutolelela kwiinda kuSine kushika akumalenge lya Kadeshi Baniya. Kuswawaawo alaakupetukila kumbo lya kumatwa akuya kuAasa Ada tibili akuAsimoni,

⁵ uko nkweshi akapetukile kucinyika cili kunyinsa ya cishi ca Ijipiti alimwi akuya mukweela kuLweenge lwa Mediteleniyani.

⁶ “ ‘Anu nyinsa ya kumbo ilaakuba Lweenge lwa Mediteleniyani.

⁷ “ ‘Nyinsa ya kumatwa yalo ilaakwiinda muya Mediteleniyani akushika kuKalundu ka Oli

⁸ tibili akunshila iinda kumwinjililo wa kuAmati. Kuswa kooko, ilaakwiinda kuSedadi,

⁹ kuSifuloni akuya mukweela kuAasa Enani.

¹⁰ “ ‘Sombi nyinsa ya kwicwe ilaakuswa kuAasa Enani kushikila akuShefamu.

¹¹ Kuswa kooko, ilaakulanga kumalenge kuya kuAbelo, kwicwe lya Ayini akutolelela kulanga kutulundu tuli muloombe lwa Lweenge lwa Galili.

¹² Lyalo ilaakuya kumalenge mweela Mulonga wa Joodani tibili akuLweenge lwa Mwiinyo. “ ‘Anu aya ngweshi akabe manyinsa anu one a cishi canu.’ ”

¹³ Paceebo ceeci Mose wakaambila bene Isilaeli ayi, “Ici ncecishi nceshi mukatambule kwiinda mukuuma cisolo, cishi ico Mwaami Lesa ncaalasha kupa mikowa ili yosanwe ayone alimwi amusa.

¹⁴ Anu bamumukowa wakwe Lubeni, Gadi alimwi amusa wa bamumukowa wakwe Manase, bakatambula kale cishi cabo ico cakabaanishikwa kweelana amumafumo abo,

¹⁵ kwicwe, kwitala lya Joodani na kamuli muJeliko.”

Bamatanjilili bakasalwa ayi baabanye cishi

¹⁶ Mpomunyaawo Mwaami Lesa wakaambila Mose ayi,

¹⁷ “Eliyasa mupailishi alimwi aJoshuwa mwanaakwe Nani mbweshi bakaabanye bantu cishi.

¹⁸ Ubwese amutanjilili womwi womwi kuswa kumikowa yoonse kwaamba ayi babacaafwe kwaabanya.”

¹⁹ Meena a bamatanjilili Mwaami Lesa mbwaakasala ngaaya. Mumukowa wakwe Juda nguKalebu mwanaakwe Jefune.

²⁰ Mumukowa wakwe Simyoni nguShemuwelo mwanaakwe Amiyudi.

²¹ Mumukowa wakwe Benjameni nguElidadi mwanaakwe Kisiloni.

²² Mumukowa wakwe Dani nguBuki mwanaakwe Jogili.

²³ Mumukowa wakwe Manase mwanaakwe Josefu, nguAniyelo mwanaakwe Efodi.

²⁴ Mumukowa wakwe Efuleemu mwanaakwe Josefu, nguKemuwelo mwanaakwe Shifutani.

²⁵ Mumukowa wakwe Sebuluni nguElisafani mwanaakwe Panaki.

²⁶ Mumukowa wakwe Isaka nguPalutyelo mwanaakwe Asani.

²⁷ Mumukowa wakwe Asha nguAayudi mwanaakwe Shelomi.

²⁸ Mumukowa wakwe Nafutali nguPadayelo mwanaakwe Amiyudi.

²⁹ Anu aba bakalinga mbobasankwa abo Mwaami Lesa mbwaakapa mulimo wakwaabanya cishi ca Kenani kubene Isilaeli.