Shakubelenga 32 - Baibo Busansulushi Bwa Libuku Ili

Mikowa ya bene Isilaeli yakalinga kwicwe lya Joodani

¹ Ono mukowa wakwe Lubeni awakwe Gadi yakalinga kucite shifubwa shiinji abuumbi. Ono ndibakabona cishi ca Jasa aca Gilyadi ncibotu kushifubwa,

² bakaya kuli Mose, Eliyasa mupailishi alimwi abamatanjilili bamwi ba bene Isilaeli akwaamba ayi,

³ “Twaboona ayi ndabala ya Ataloti, Diboni, Jasa, Nimula, Eshiboni, Elile, Sibima, Nebo alimwi aBeyoni

⁴ ayo Mwaami Lesa ngaakalengesha ayi bene Isilaeli bakome, njimisena ibotu abuumbi kushifubwa alimwi swebo tulicite shifubwa shiinji abuumbi.

⁵ Ono twaseenga ayi mutupe misena iyi ayi ibe inesu, alimwi mutatukakatishi kusubuka Mulonga wa Joodani ayi tukekale kwitala.”

⁶ Mpeeke Mose wakabakumbula ayi, “Sa mulisuni kwikala kokuno, bene Isilaelinyinaanu kabaya kunkondo?

⁷ Ceebonshi mulisuni kulengesha ayi bene Isilaeli batyongole akutasubuka Mulonga wa Joodani kwaamba ayi batakenjili mucishi ico Mwaami Lesa ncaakabapa?

⁸ Abalo bamashali banu bakulukulu mbobakacita ndindakabatuma kuswa kuKadeshi Baniya ayi baye mukubona cishi mbocibete.

⁹ Bakaya mukweela kucinyika ca Eshikolu akubona cishi. Ndibakaboola, bakalengesha bene Isilaeli kutyongola akutenjila mucishi ico Mwaami Lesa ncaakabapa.

¹⁰ Pabushiku ubo Mwaami Lesa wakakalala akushomesha cakulumbila ayi,

¹¹ ‘Mukwiinga tabakwe kutolelela kunyumfwila, taaku musankwa nabi womwi, wakaswa mucishi ca Ijipiti, ucite myaaka ili makumi obilo aisotoka, eshi akenjile mucishi ico ncendakashomesha kupa Abulaamu, Isaki alimwi aJakobo.

¹² Sombi Kalebu mwanaakwe Jefune mwine Kenisi alimwi aJoshuwa mwanaakwe Nani balaakwinjilaamo mukwiinga balo bakatolelela kunyumfwila ndime neMwaami Lesa.’

¹³ Lyalo Mwaami Lesa wakakalalila bene Isilaeli akubalengesha ayi banokwiingookabo muluyanga kwamyaaka ili makumi one kushikila lishalane lya baabo boonse bakabishisha Mwaami Lesa bamana kufwa.

¹⁴ Ono mwebo nolishalane lipya lya bamucita shibi, anaapa mweemikana mumusena wa bamashali banu bakulukulu akulengesha ayi Mwaami Lesa eendeewo kukalalila bene Isilaeli!

¹⁵ Ncakwiila na mwebo nomukowa wakwe Lubeni awakwe Gadi mukake kumunyumfwila bulya, bene Isilaeli boonse aba utoobashiya beenka muluyanga muno. Anu mwebo ndimwe mweshi mulengeshe ayi banyonyooke.”

¹⁶ Kuswawaawo bakaya kuli Mose akwaamba ayi, “Cakutaanguna amutusuminishe ayi tuyake shimpati sha mabwe sha mbelele shesu kuno, akuyaka amandabala akwikalaamo bamakeesu alimwi abana besu.

¹⁷ Twamanisha kuyaka, tulaakulibambila kuya abene Isilaelinyineesu kunkondo akutanjila kunembo tibili bakashiike mucishi ceshi cikabe cinebo. Sombi katutana kuya, balo bamakeesu abana besu inga kabashiite mumandabala acite malinga kuloondesha bantu bamucishi cino.

¹⁸ Teshi tukaboole kumaandeesu kushikila bene Isilaelinyineesu bamwi boonse bakabwese shishi nshebakapekwa.

¹⁹ Teshi tukababwesele cishi nabi ciniini cili kwitala lya Joodani, mukwiinga swebo twabwesa kale shili kokuno kwicwe lya Joodani.”

²⁰ Mpeeke Mose wakabaambila ayi, “Na mwashinisha mumakani ngomwaamba, anu pameenso a Mwaami Lesa amulibambile kuya kunkondo.

²¹ Basankwa beshikulwana boonse mbomucite balyeelete kusubuka Mulonga wa Joodani, alimwi kwiinda mubutanjilili bwa Mwaami Lesa, balyeelete kutalika kulwana kushikila Mwaami Lesa akome balwani besu

²² akubwesa cishi. Kuswawaawo inga mwaboolela mukwiinga mulaakucanika ayi mwaciita kweelana ambomwakashomesha Mwaami Lesa alimwi abene Isilaelinyinaanu. Lyalo Mwaami Lesa ulaakumusumina ayi cishi cili kwicwe lya Joodani ncanu.

²³ Sombi na mubule kucita kweelana ambomwashomesha, ntoomucenjeshaako ayi mulaakubisha kuMwaami Lesa. Ncakwiila nabi kukabe buyani mulaakupekwa mulandu ceebo cakubisha kwanu uko.

²⁴ Ono amuyakile bamakaanu abana banu mandabala alimwi muyake ashimpati sha mbelele shanu, sombi mukacite kweelana ambomwashomesha.”

²⁵ Mpomunyaawo basankwa bene Gadi abene Lubeni bakaamba ayi, “Nkambo, tulaakucita kweelana ambomwaamba.

²⁶ Bamakeesu abana besu balaakucaala pantu pomwi aŋombe alimwi ambelele shesu mumandabala a muGilyadi muno.

²⁷ Sombi swebo soonse tulilibambite kuya kunkondo kwiinda mubutanjilili bwa Mwaami Lesa. Tulaakusubuka Mulonga wa Joodani akulwana kweelana ambomwaamba.”

²⁸ Paceebo ceeci Mose wakaambila Eliyasa mupailishi, Joshuwa mwanaakwe Nani alimwi abamatanjilili bamwi ba bene Isilaeli ayi,

²⁹ “Na basankwa bene Gadi abene Lubeni abo balibambite kulwana bakasubuke Mulonga wa Joodani kwiinda mubutanjilili bwa Mwaami Lesa, alimwi akukoma cishi kwiinda mukulwana pantu pomwi andimwe, mukabape cishi ca Gilyadi ayi cikabe cinebo.

³⁰ Sombi na bakabule kusubuka akuya kunkondo amwebo, abalo balyeelete kuya mukutambula cipansha cabo ca cishi muKenani, bweenka mbuli ndimwe.”

³¹ Basankwa bene Gadi abene Lubeni bakakumbula ayi, “Nkambo, swebo tulaakucita kweelana abwaamba Mwaami Lesa.

³² Tulaakusubuka Mulonga wa Joodani kwiinda mubutanjilili bwakwe ayi tukenjile mucishi ca Kenani akutalika kulwana, kwaamba ayi cishi cili kwicwe lya Joodani kuno cibe cinesu cancinencine.”

³³ Mpeeke Mose wakapa mukowa wakwe Gadi awakwe Lubeni alimwi amusa wa mukowa wakwe Manase mwanaakwe Josefu, cishi coonse ca mwaami Sioni wa bene Amoli alimwi aca mwaami Ogi wa kuBashani. Wakabikaawo amandabala acishi cakalinga kushingulukite.

³⁴ Mukowa wakwe Gadi wakayaka alimwi ndabala ya Diboni, Ataloti, Alowa,

³⁵ Atiloti, Shofani, Jasa, Jogibeya,

³⁶ Beti Nimula alimwi aBeti Alani.

³⁷ Awalo mukowa wakwe Lubeni wakayaka alimwi ndabala ya Eshiboni, Elile, Kilyataimu,

³⁸ Nebo, Baali Meyoni (mandabala aya bakaapa meena amwi) alimwi aSibima. Anu mandabala oonse ngobakayaka alimwi, bakaapa meena amwi.

³⁹ Ono bamucipani cakwe Makiya mwanaakwe Manase, bakaya mukulwana cishi ca Gilyadi. Lyalo bakekalaamo akutandamo bene Amoli abo bakalingaamo.

⁴⁰ Aboobo Mose wakapa cipani cakwe Makiya cishi ca Gilyadi, abalo bakekala momunya umo.

⁴¹ Alakwe Jeya, wamumukowa wakwe Manase wakalwana akubwesa mishi yabo imwi akwiitumba ayi “Mishi yakwe Jeya.”

⁴² Noba alakwe wakalwana akubwesa ndabala ya Kenati amishi ya njiyo, akwiitumba liina lyakwe ayi Noba.