Shakubelenga 27 - Baibo Busansulushi Bwa Libuku Ili

Bana bakwe Selofeyadi banakashi

¹ Ono Josefu wakashala Manase, Manase wakashala Makiya, Makiya wakashala Gilyadi, Gilyadi wakashala Efeli alakwe Efeli wakashala Selofeyadi. Selofeyadi uyo wakashala baana banakashi bosanwe, Maala, Nowa, Ogila, Milika alimwi Atesa.

² Bakaya mukwiimikana kunembo lyakwe Mose, Eliyasa mupailishi, bamatanjilili alimwi abene Isilaeli boonse pamulyango wa Tente ya Cipangano akwaamba ayi,

³ “Baishiwesu bakafwa muluyanga cakutashiyawo baana basankwa. Tebakalinga mulikoto lya baabo bakalinga kukonkela Kola, abo bakabukila Mwaami Lesa, sombi bakafwa ceebo ca kubisha kwabo beene.

⁴ Ono mukwiinga tebakalinga kucite baana basankwa, nceebonshi liina lya baishiwesu ncelitoolobela pakati ka bene Isilaeli? Amutupe cishi aswebo kuswa kubamakwababo.”

⁵ Mpomunyaawo Mose wakatola litongooshi lyabo kuMwaami Lesa

⁶ uyo wakamwaambila ayi,

⁷ “Ico bana bakwe Selofeyadi banakashi ncebatoosenga cililuleme. Bape cishi cili pakati ka bamakwababo baishiwabo. Cipansha ca baishiwabo ciye kuli mbabo.

⁸ Ulwiite bene Isilaeli boonse ayi kulilabo na musankwa wafwa kwakutashiyawo mwaana musankwa, mwanaakwe mwanakashi ulyeelete kubwesa buboni bwakwe.

⁹ Ono na taacite mwaana mwanakashi, bamakwabo basankwa balyeelete kububwesa.

¹⁰ Na taacite bamakwabo basankwa, bamakwababo baishi balyeelete kububwesa.

¹¹ Ono na taacite bamakwabo basankwa nabi bamakwabo baishi, lyalo mukwabo umwi ukumiteko bunene ulyeelete kububwesa akubulama bweenka mbuli bwaakwe. Anu bene Isilaeli balyeelete kukonkela milawo amilasho iyi kweelana ambondamulwiita nebo neMwaami Lesa.”

Lesa mbwaakasala Joshuwa kuba pamusena wakwe Mose

¹² Mpomunyaawo Mwaami Lesa wakaambila Mose ayi, “Utante paKalundu ka Abalimu akubona cishi ncentoopa bene Isilaeli.

¹³ Wamana kucibona, utoofwa bweenka bwakafwa mukwanu Aloni.

¹⁴ Mukwiinga mwebo nobilo noonse tamukwe kukonkela mulawo wangu muluyanga lwa Sini. Bene Isilaeli boonse ndibakatongooka ndime kuMeliba, tamukwe kunshoma cakundemeka ayi ndisalalite pameenso abo.” Ono Meliba nkantupu kali kuKadeshi muluyanga lwa Sini.

¹⁵ Lyalo Mose wakapaila ayi,

¹⁶ “NoBaami baLesa, nomatalikilo a buumi boonse, ndaseenga ayi musale musankwa uyo weenga watanjilila bantu aba

¹⁷ akubalwiita shakucita munkondo kwaamba ayi bantu banu bakabule kuba anga nimbelele shitacite mweembeshi.”

¹⁸ Mpeeke Mwaami Lesa wakaambila Mose ayi, “Bwesa Joshuwa mwanaakwe Nani, umo muli Mushimu wangu, akubika maansaako pamutwi wakwe.

¹⁹ Umwiimike kunembo lyakwe Eliyasa mupailishi alimwi abene Isilaeli boonse. Lyalo pameenso abo boonse umubaande ayi ngowaba pamusena wako.

²⁰ Umusuminishe alakwe kunookweendeleshaako kwaamba ayi bene Isilaeli boonse banoomunyumfwila.

²¹ Lakwe ulaakunoocinkite manungo muli Eliyasa mupailishi, uyo ngweshi akeeye kuyanda kwangu kwiinda mukusebensesha Ulimu aTumimu. Munshila iyi Eliyasa ulaakutanjilila Joshuwa alimwi abene Isilaeli boonse mushintu shoonse nshebeelete kucita.”

²² Aboobo Mose wakacita bweenka bwakamulwiita Mwaami Lesa. Wakeemika Joshuwa kunembo lyakwe Eliyasa mupailishi alimwi abene Isilaeli boonse.

²³ Kweelana abwakaamba Mwaami Lesa, Mose wakabika maansaakwe pamutwi wakwe Joshuwa akumubanda ayi ngowaba pamusena wakwe.