Shakubelenga 25 - Baibo Busansulushi Bwa Libuku Ili

Bene Isilaeli kukalundu ka Peyo

¹ Ono bene Isilaeli ndibakalinga kuShitimu, basankwa bakatalika kukumana abanakashi bene Moabu abo bakalingaako.

² Banakashi abo bakeeta basankwa abo ayi bacanikwe pakusekelela kwa kupa milambu, uko nkobakalinga kulambilila balesa ba bene Moabu. Bene Isilaeli bakalya akulambila balesa abo.

³ Munshila iyi bakatalika kulambila lesa wa kuPeyo wiitwa ayi Baali. Paceebo ceeci Mwaami Lesa wakabakalalila

⁴ akwaambila Mose ayi, “Kwiinda mukunyumfwila ndime, nyamuna bamatanjilili boonse bene Isilaeli akubacaya lumwi lubala, lyalo bukali bwangu ndyeshi bumane pali mbabo.”

⁵ Mpeeke Mose alakwe wakaambila boomboloshi ba bene Isilaeli ayi, “Womwi awomwi mumukowa wakwe ulyeelete kucaya musankwa woonse uyo waba shikulambila Baali wa kuPeyo.”

⁶ Anu mwine Isilaeli umwi wakatola mwanakashi mwine Midyani mumusumba wakwe mumeenso akwe Mose abene Isilaeli boonse, paciindi ndibakalinga kulila pamulyango wa Tente ya Cipangano.

⁷ Ono Fineyasi mwanaakwe Eliyasa alimwi mushikulu wakwe Aloni mupailishi, ndyaakabona cikani ici, wakanyamuka akuswa mpobakalinga kubungene. Wakabwesa lisumo

⁸ akukonkela musankwa amwanakashi mumusumba alimwi akubayasa lisumo boonse bobilo. Munshila iyi mwaalu woonse wakalinga pabene Isilaeli wakamana.

⁹ Sombi bantu bakalinga bacaikwa kale kumwaalu bakalinga 24,000.

¹⁰ Mpomunyaawo Mwaami Lesa wakaambila Mose ayi,

¹¹ “Mukwiinga wa ceeco cacita Fineyasi mwanaakwe Eliyasa alimwi mushikulu wakwe Aloni mupailishi, bukali bwangu pabene Isilaeli bwamana. Lakwe taakwe kusuminisha muntu uli woonse kulambila Lesa umwi, sombibo ndime. Aboobo nceceeco ncentakwe kunyonyweeta bene Isilaeli ceebo ca bukali bwangu.

¹² Anu mulwiite ayi ntoopanganaakwe cipangano ca luumuno ceshi cikabule kumana.

¹³ Fineyasi alimwi abamulunyungu lwakwe boonse bananoolibo bapailishi lyoonse, mukwiinga taakwe kusumina ayi bantu balambile balesa bamwi alimwi akulengesha ayi bene Isilaeli balekelelwe cibiibi cabo.”

¹⁴ Liina lya mwine Isilaeli uyo wakacaikwa pantu pomwi amwanakashi mwine Midyani nguSimuli mwanaakwe Salu mutanjilili wa bamuŋanda bamumukowa wakwe Simyoni.

¹⁵ Ono mwanakashi uyo wakalinga kwiitwa ayi Kosibi. Wakalinga mwanaakwe Suli uyo wakalinga mwaami wa likoto lya shipani sha mumikowa ya bene Midyani.

¹⁶ Mpeeke Mwaami Lesa wakaambila Mose ayi,

¹⁷ “Amutalike kulwana abene Midyani, mubanyonyoole,

¹⁸ mukwiinga wa cibi ncebakamucitila kwiinda mukumucenjeeka kuPeyo, alimwi aceebo cakwe Kosibi mwanaamwaami wa kuMidyani, uyo wakacaikwa ciindi ca mwaalu kuPeyo.”