Shakubelenga 24 - Baibo Busansulushi Bwa Libuku Ili

¹ Paciindi ici Balaamu wakeshiba ayi Mwaami Lesa wakalinga kusuni ayi ape bene Isilaeli coolwe. Aboobo taakwe kuya mukuyandoola shitondesho shimwi shabuŋanga kweelana ambwaakalinga kucita mushiindi shimwi. Sombi wakalanga kulubasu lwa luyanga

² akubona bene Isilaeli kabayakite mukowa amukowa. Mpeeke Mushimu wakwe Lesa wakamutanjilila,

³ lyalo wakalaluka ayi, “Makani akwe Balaamu mwanaakwe Beyo, maswi a muntu ulasha kabotu,

⁴ makani awooyo unyumfwa maswi akwe Lesa, uyo ubona shintu anga muciloto kuswa kuli Lesa Shinkusu shoonse, uyo uwa panshi ameenso kaalasha.

⁵ Misumba yanu nobamulunyungu lwakwe Jakobo, njibotu abuumbi! Ee, momwikala nobene Isilaeli, mubotu ciine!

⁶ Anga njimindando ilaamfu ya tupukupuku, anga njimyuunda ili muloombe lwa mulonga, anga nshisamu sha aloyi shakashanga Mwaami Lesa, nabi anga nshisamu sha sida shili mweela maanshi.

⁷ Balaakuba amfuula ibotu abuumbi. Balaakushanga mbuto shabo mumyuunda mutontola kabotu. Alakwe mwaami wabo ulaakulemekwa kwiinda Agagi alimwi bwaami bwakwe bulaakulumbaishikwa.

⁸ Lesa wakabakusha mucishi ca ijipiti. Ulabalwaninaako anga ninyati. Balanyonyoola balwani babo, kupwayoola mafuwa abo akubayasa mifwi yabo.

⁹ Mushobo wabo uli anga ninkalamu icite nkusu, na ililete, taaku weelesha kwiibusha. Anu uyo woonse upa coolwe bene Isilaeli ulaakupekwa coolwe, alakwe uyo woonse ushingana bene Isilaeli, ulaakushinganwa.”

¹⁰ Mpeeke Balaki wakakalala abuumbi, wafunga likoofi akwaambila Balaamu ayi, “Webo ndakakwiitila kushingana balwani bangu, sombi aba mankanda otatwe ono koobapa coolwe.

¹¹ Anu koya kumishaanu! Ndakalasha ayi ndaakukulambula, sombi Mwaami Lesa wakulengesha kutalambulwa.”

¹² Mpomunyaawo Balaamu wakakumbula ayi, “Ndakalwiita baabo mbowakantumina ayi

¹³ nabi wampa silifa alimwi agolodi yoonse ili muŋanda yakubwalo, inga nshikaki kukonkela mulawo wa Mwaami Lesa kwiinda mukucita nceensuni nemwiine. Nebo ndaakwaambabo ceenka Mwaami Lesa nceshi akandwiite.”

Kulaluka kwakweelaako kwakwe Balaamu

¹⁴ Lyalo Balaamu wakaambila Balaki ayi, “Ono bulya ntooboolela kubene misheesu, sombi kaantana kuya, ntookucenjeshaako pashintu isho bene Isilaeli nsheshi bakacite kubantu bako munshiku shitoosa.”

¹⁵ Lyalo wakalaluka ayi, “Makani akwe Balaamu mwanaakwe Beyo, maswi a muntu ulasha kabotu,

¹⁶ makani awooyo unyumfwa maswi akwe Lesa, utambula lushibo luswa kuli Lesa Wiindaawo, uyo ubona shintu anga muciloto kuswa kuli Lesa Shinkusu shoonse, uyo uwa panshi ameenso kaalasha.

¹⁷ Ndamubona, sombi teshi onoono, ndamubona, sombi teshi pafwaafwi. Nyenyeenshi ilaakuswa mubamulunyungu lwakwe Jakobo, nkokwaamba ayi mwaami ulaakuswa mubene Isilaeli. Ulaakukoma bamatanjilili ba bene Moabu akunyonyoola bene Seti boonse cakumaninina.

¹⁸ Bene Edomu balaakukomwa bene Siya, balwani bakwe, abalo balaakukomwa sombi bene Isilaeli balaakutolelela kukoma.

¹⁹ Mwaami ulaakuswa mubamulunyungu lwakwe Jakobo akunyonyoola baabo boonse bakalinga bapuluka.”

²⁰ Amane kwaamba boobo, Balaamu wakabona bene Amaleki anga muciloto akulaluka ayi, “Mushobo wa bene Amaleki wakalinga kucite nkusu kwiinda mishobo yoonse, Sombi kumeelelesho, ulaakunyonyooka cakumaninina.”

²¹ Anga muciloto wakabona bene Keni akulaluka ayi, “Musena ngomushiteemo ulilamitwe, ulilamitwe anga nciinswa cili peculu lya mwaandami.

²² Nakubi boobo mwebo nobene Keni mulaakunyonyoolwa Na Asilya akamucaate akumufuba.”

²³ Balaamu wakalaluka alimwi ayi, “Ino bantu aba batoobungana kumatwa mbaani?

²⁴ Balwani balaakuswita kuSaipulasi amaato. Balaakukoma Asilya alimwi aEba, sombi abalo balaakulobelela limwi.”

²⁵ Mpeeke Balaamu wakanyamuka akuboolela kumishaabo, alakwe Balaki wakalanga nkwaakalinga kuya.