Shakubelenga 20 - Baibo Busansulushi Bwa Libuku Ili

Shakacitika kuKadeshi

¹ Mumweenshi wakutaanguna bene Isilaeli boonse bakesa muluyanga lwa Sini akuyaka misumba kuKadeshi, uko kwakafwita Milyamu akubikwa.

² Tekwakalinga maanshi akunwa uko, mpeeke bantu bakabungana kuli Mose aAloni,

³ akutongooka ayi, “Nitwakafwita pantu pomwi abene Isilaelinyineesu kunembo lya Tente ya Cipangano ya Mwaami Lesa, naakwiinga cakabota.

⁴ Nciinshi ncemwakatuletela momuno muluyanga? Sa mwakatuletela ayi swebo ashifubwa shesu tufwite momuno?

⁵ Ceebonshi mwakatukusha mucishi ca Ijipiti akutuleta mumusena uno mutameeni cintu nabi comwi? Taamu shili anga ngamaila, inkuyu, minyansa nabi mapomegilaneti. Taamu nabibo maanshi akunwa!”

⁶ Mpeeke Mose aAloni bakaswaako kubantu akwiimikana pamulyango wa Tente. Bakafukama cakushisha shiwa panshi, mpeeke bulemu bwa Mwaami Lesa bwakaboneka kuli mbabo.

⁷ Mpomunyaawo Mwaami Lesa wakaambila Mose ayi,

⁸ “Bwesa nkoli iyo ili kunembo lya Libokoshi lya Cipangano, ono webo aAloni mubunganye bene Isilaeli boonse. Ono boonse kababweneeko, waambile mwaandami uli waalya, lyalo mutooswa maanshi. Munshila iyi utoolengesha ayi maanshi aswe mumwaandami ayi bene Isilaeli boonse alimwi ashifubwa shabo shinwe.”

⁹ Aboobo Mose wakanyamuka akubwesa nkoli kunembo lya Libokoshi lya Cipangano kweelana abwakamwaambila Mwaami Lesa.

¹⁰ Lyalo Mose aAloni bakabunganya bantu kunembo lya mwaandami. Mpeeke Mose wakabaambila ayi, “Amunyumfwe mwebo nobaashu! Sa tumukushishe maanshi mumwaandami uyu?”

¹¹ Kuswawaawo Mose wakatambika nkoli mwiculu akuuma mumwaandami mankanda obilo. Mpeeke maanshi aanji abuumbi akakunka kuswa mumo, alimwi bantu boonse bakanwa pantu pomwi ashifubwa shabo.

¹² Sombi Mwaami Lesa wakakalalila Mose aAloni akwaamba ayi, “Mukwiinga tamukwe kunshoma cakundemeka ayi ndisalalite pameenso abene Isilaeli, anu teshi mukabatanjilile kuya mucishi ncendakalasha kubapa.”

¹³ Cikani ici cakacitikila kuMeliba, uko bene Isilaeli nkobakatongookela Mwaami Lesa, alakwe nkwaakababoneshesha ayi ulisalalite.

Mwaami wa kuEdomu mbwaakakasha bene Isilaeli kwiinda

¹⁴ Kuswawaawo Mose wakatuma bantu kuswa kuKadeshi akuya kumwaami wa kuEdomu akwaamba ayi, “Makani aya aswa kubamakwabanu, mikowa ya bene Isilaeli. Mwebo mulishi makatasho ngotwakalingaamo,

¹⁵ mbuli bamashali besu bakulukulu mbobakaya mucishi ca Ijipiti. Anu bene Ijipiti bakapensha bamashali besu bakulukulu alimwi aswebo.

¹⁶ Mpeeke twakalilila Mwaami Lesa ayi atucaafwe. Wakanyumfwa kulila kwesu akutuma munjelo uyo wakatukusha mucishi ca Ijipiti. Ono bulya tuli kuKadeshi, ndabala iyo ili kumanyinsa a cishi canu.

¹⁷ Twamusenga ayi mutusuminishe kwiinda mucishi canu. Swebo alimwi aŋombe shesu teshi twiinde mumyuunda imwibo nabi ya minyansa alimwi teshi tunwe maanshi mumikalo yanu. Tunanoolibo mumukwakwa unene kushikila tuswe mucishi canu.”

¹⁸ Sombi bene Edomu bakakumbula ayi, “Swebo twakaaka! Na mweeleshe, tutoomulwana.”

¹⁹ Abalo bene Isilaeli bakaamba ayi, “Tunanoolibo mumukwakwa unene alimwi na swebo tunwe maanshi, nabi shifubwa shesu shinwe nshisho, tutoolipila. Swebo ncetusuni nkwiindakobo mucishi canu.”

²⁰ Bene Edomu bakabooshaawo ayi, “Bana twakaaka!” Mpomunyaawo bakanyamuka alikoto lya bashilumamba liyumu abuumbi kuya mukulwana bene Isilaeli.

²¹ Ono ceebo cakwaamba ayi bene Edomu bakakasha bene Isilaeli kwiinda mucishi cabo, bene Isilaeli bakapiluka akwiinda nshila imwi.

Lufu lwakwe Aloni

²² Mpomunyaawo bene Isilaeli boonse bakaswaako kuKadeshi akushika kuKalundu ka Ole,

²³ kumanyinsa a Edomu. Kweenka uko, Mwaami Lesa wakaambila Mose aAloni ayi,

²⁴ “Aloni teshi akenjile mucishi ico ncendakalasha kupa bene Isilaeli. Ulaakufwa mukwiinga mwebo nobilo tamukwe kunyumfwila mulawo wangu kuMeliba.

²⁵ Tola Aloni aEliyasa mwanaakwe kuKalundu ka Ole,

²⁶ uko nkweshi ufuulile Aloni shakufwala sha bupailishi akufwalika Eliyasa. Aloni utoofwita kweenka uko.”

²⁷ Mpeeke Mose wakacita kweelana abwakaamba Mwaami Lesa. Boonse botatwe bakatanta paKalundu ka Ole bene Isilaeli boonse kababweneeko.

²⁸ Lyalo Mose wakafuula Aloni shakufwala sha bupailishi akufwalika Eliyasa. Aloni wakafwita pakalundu peculu peenka apo, lakwe Mose alimwi aEliyasa bakaseluka.

²⁹ Mpomunyaawo bene Isilaeli boonse bakanyumfwa ayi Aloni wafwa. Lyalo bakamulila kwanshiku shili makumi otatwe.