Shakubelenga 13 - Baibo Busansulushi Bwa Libuku Ili

Basenseshi

¹ Mpomunyaawo Mwaami Lesa wakaambila Mose ayi,

² “Kuswa mumikowa ili likumi ayobilo, usalemo mutanjilili womwi akubatuma ayi basense cishi ca Kenani, ico ncentoopa bene Isilaeli.”

³ Ono kweelana abwakaamba Mwaami Lesa, Mose wakabatuma kuswa muluyanga lwa Palani. Boonse bakalinga bamatanjilili ba bene Isilaeli.

⁴ Meenaabo ngaaya. Mukowa Mutanjilili Lubeni Shamuwa mwanaakwe Saka

Mukowa Mutanjilili

⁵ Simyoni Shafati mwanaakwe Oli

⁶ Juda Kalebu mwanaakwe Jefune

⁷ Isaka Igali mwanaakwe Josefu.

⁸ Efuleemu Oshiya mwanaakwe Nani.

⁹ Benjameni Paluti mwanaakwe Lafu.

¹⁰ Sebuluni Gadyelo mwanaakwe Sodi.

¹¹ Manase Gadi mwanaakwe Susi.

¹² Dani Amiyelu mwanaakwe Gemali.

¹³ Asha Setuli Mwanaakwe Mikaeli.

¹⁴ Nafutali Naabi mwanaakwe Fofusi.

¹⁵ Gadi Gewelu mwanaakwe Maki.

¹⁶ Aya ngomeena a basankwa abo Mose mbwaakatuma mukusensa cishi ca Kenani. Mose wakatumba Oshiya mwanaakwe Nani ayi Joshuwa.

¹⁷ Ono Mose ndyaakabatuma, wakabaambila ayi, “Kuswa kokuno mwinjilile kumalenge akuya mukushika kumatwa lya cishi ca Kenani, tibili akucishi ca tulundu.

¹⁸ Muye mubone cishi mbocibete, kufula kwa bantu bekalaamo alimwi ambuli mbobabete kuyuma.

¹⁹ Mubone na cishi ncibotu nabi sobwe, alimwi na bantu balekala mumandabala atacite malinga nabi acite.

²⁰ Kuswawaawo mukabone na bulongo mbubotu akubona na cishi nca shisamu. Mutakalubiiko kuleta shisepo shimwi shimena mucishi ico pakuboola.” Ico cakalinga ciindi minyansa ndyeetalika kupya.

²¹ Aboobo basankwa abo bakenjilila kumatwa akubona cishi ico, kutalikila muluyanga lwa Sini kulubasu lwakumalenge kuya mukushika kuLewobu pafwaafwi anshila iinda pakati ka tulundu iya kuAmati kulubasu lwa kumatwa.

²² Bakataanguna kuya kumalenge a cishi akushika kuEbuloni, uko kwakalinga kwikala shipani sha bene Ayimani, Sheshayi alimwi aTalimayi, bamulunyungu lwa bantu bapolomene beetwa ayi Anakimu. Ndabala ya Ebuloni ndiyakayakwa, pakeenda myaaka yosanwe ayobilo ayi iyakwe ndabala ya Soani mucishi ca Ijipiti.

²³ Kuswawaawo bakashika kucinyika ca Eshikolu, nkomunya uko bakatimbula musampi wakalinga kucite cisankata ca minyansa. Cisankata ico cakalinga cilemu cakwaamba ayi bantu bobilo mbobakacikonsha kukulika. Bakabwesa amapomegilaneti ankuyu.

²⁴ Musena uyo bakootumba ayi Cinyika ca Eshikolu ceebo ca cisankata ca minyansa ico bene Isilaeli ncebakatimbula mpapo.

²⁵ Ndibakamana kusensa cishi ico kwanshiku shili makumi one, basenseshi abo bakaboolela

²⁶ kuli Mose, Aloni, alimwi abene Isilaeli boonse kuKadeshi muluyanga lwa Palani. Mpeeke bakaamba shoonse nshebakabona alimwi akubabonesha shisepo isho nshebakaleta kuswa kucishi ico.

²⁷ Lyalo bakaambila Mose ayi, “Cishi ico ncemwakatutumaako twakacibona, muli bubile abulongo bubotu. Shisepo shimwi sha mucishi ico nsheeshi.

²⁸ Sombi bantu bekalaamo balicite nkusu, amandabalaabo anene nganene abuumbi alimwi alicite malinga abotu. Teshi ceeco ceenka, sombi twakacana abamulunyungu lwa bantu bapolomene nkomunya uko.

²⁹ Bene Amaleki balekala kulubasu lwa kumalenge lya cishi, bene Iti, bene Jebusi alimwi abene Amoli balekalila kulubasu lwa tulundu. Balo bene Kenani balekala mweela Lweenge lwa Mediteleniyani alimwi amweela Mulonga wa Joodani.”

³⁰ Mpomunyaawo Kalebu wakoomusha bantu abo bakalinga kutongooka kuli Mose akwaamba ayi, “Tulyeelete kuya mukubalwana akubwesa cishi. Swebo tulicite nkusu shakubakoma.”

³¹ Sombi basankwa abo bakalinga baya aKalebu bakaamba ayi, “Sobwe, swebo tatucite nkusu sheelete ayi tubalwaane. Bantu balya balatwiindaawo nkusu.”

³² Paceebo ceeci bakalinga kwaamba makani akubeca kubene Isilaeli apacishi ico ncebakaya mukubona. Bakaamba ayi, “Mucishi ico tamuswi ashakulya shikwana bantu abo bekalaamo. Muntu uli woonse ngotwakabona wakalinga mulaamfu abuumbi,

³³ alimwi twakabona abantu bapolomene, bamulunyungu lwakwe Anaki. Swebo twakalinga kulibona kuceya anga mbateete, alimwi ncakwiila mbotwakalinga kuboneka mbweeke ubo kuli mbabo.”