Shakubelenga 12 - Baibo Busansulushi Bwa Libuku Ili

Milyamu mbwaakapekwa mulandu

¹ Ono Milyamu aAloni bakatalika kutongookela Mose ceebo wakeeba mwanakashi mwine Kushi.

² Lyalo bakaamba ayi, “Sa Mwaami Lesa ulaambilabo muli Mose eenka? Sa taakwe kwaambilawo kale kwiinda muli ndiswe?” Mpomunyaawo Mwaami Lesa wakanyumfwa nshebakaamba.

³ Mose wakalinga muntu shikuliceesha kwiinda muntu uli woonse mucishi ca panshi.

⁴ Paciindi ceenka ico Mwaami Lesa wakaambila Mose, Aloni alimwi aMilyamu ayi, “Kamwisa kuTente ya Cipangano noonse notatwe.” Lyalo boonse bakaya.

⁵ Mpeeke Mwaami Lesa wakesa mulicincilo lya likumbi, weemikana pamulyango wa Tente, akwiita Aloni aMilyamu. Mpomunyaawo bobilo abo bakasena kunembo.

⁶ Lyalo Mwaami Lesa wakaamba ayi, “Ono amunyumfwe nceshi ŋambe! Na pali mulaluki pakati kanu, ndaliyubulula kuli nguwe kwiinda mushili anga nshiloto alimwi akwaambaakwe mushiloto.

⁷ Sombi cilipusene na ntokwaamba amusebenshi wangu Mose. Ndakamubika ayi anokweendelesha bantu bangu bene Isilaeli.

⁸ Aboobo ndaamba anguwe bweenka mbuli muntu mbwaamba amubye, kaanyumfwite kuteshi mumapinda. Lakwe wakabonaawo ambomboneka! Nceebonshi ncemwabulila boowa kutongooka musebenshi wangu Mose?”

⁹ Mpeeke Mwaami Lesa wakabakalalila akubashiya.

¹⁰ Likumbi ndilyakaswa paTente, paciindi ceenka ico Milyamu wakaba abulwashi bwa manata akuboolabo tuu anga mbusu. Ono Aloni ndyaakamulangilisha akubona ayi waba abulwashi ubo,

¹¹ wakaambila Mose ayi, “Ndapapaata nkambo, ayi mutatulengeshi kuba amulandu uyu ceebo ca cibiibi ca buluya bwesu.

¹² Mutamuleeki ayi abe anga ngumwaana washalwa kaafwite, amusa wa mubili wakwe koolitwe.”

¹³ Lyalo Mose wakalilila Mwaami Lesa ayi, “NobaLesa, amumushilike!”

¹⁴ Alakwe Mwaami Lesa wakakumbula ayi, “Baishi nibakamushipila mate kumeenso, naakwiinga wekala nshiku shosanwe ashobilo mumusebaanyo wakwe. Mbweeke ubo atanoonjila mumisumba kwansondo yomwi. Kuswawaawo ndyeshi akabooshekwe mukati.”

¹⁵ Paceebo ceeci Milyamu taakalinga kwiinjila mumisumba kwanshiku shosanwe ashobilo. Abalo bantu tabakwe kulonga kushikila ndibakamuboosha mukati.

¹⁶ Kuswawaawo bakaswa kuAseloti akuya mukuyakila muluyanga lwa Palani.