Sekaliya 9 - Baibo Busansulushi Bwa Libuku Ili

Koombolosha kwa Mwaami Lesa pamishobo ishingulukite bene Isilaeli

¹ Aya ngamakani abulaluki akaambwa aMwaami Lesa. Mwaami Lesa washinisha kupa mulandu cishi ca Adilaki. Bukali bwakwe bulaakushikila pandabala ya Damasikasi. Meenso a Mwaami Lesa ali pabantu boonse bweenka mbwaabete pabene Isilaeli.

² Mwaami Lesa ngoolanga apacishi ca Amati ico cibaana manyinsa acishi ca Adilaki. Meenso akwe alashika akubene Taya alimwi abene Sidoni nabi balicibwene kucita shintu shiinji.

³ Bene Taya bakaliyakila ciyubilo. Babunjika silifa cakubabo pali poonse anga ndusuko. Ee, babunjika golodi cakubabo anga ngamatombe a mumikwakwa.

⁴ Sombi Mwaami Lesa ulaakukwempula buboni bwabo boonse akunyonyoola maato abo anene mulweenge. Ayalo ndabala yabo ulaakwiinyonyoola amulilo.

⁵ Mwaami Lesa waamba ayi, “Bene Ashikeloni balaakucibona akuloonda. Bene Gasa balaakunoosalookabo kumyoyo kucisa. Abalo bene Ekiloni balaakunoocita bweenka ubo ceebo kulangila kwabo kwashimingana. Ncakwiila bene Gasa balaakubula mwaami. Ndabala ya Ashikeloni ilaakucaalabo kwakubula bantu.

⁶ Baswamashi mbweshi bakekale muAshidodi. Ncakwiila ndaakumanisha kulisumpula kwa bene Filisiti.

⁷ Teshi bakalyewo tubili bulowa nabi shintu shimwi shikashikwa mumilomo yabo. Lyalo abo beshi bakacaaleewo, balaakuba bantu bangu neLesa. Balaakuba bamatanjilili muJuda. Mpeeke cakacitikila bene Jebusi cilaakucitikila bene Ekiloni.

⁸ Sombi ndaakufuna cishi cangu kuswa kumakoto a bashilumamba bakali. Taaku shikulyatilila weshi akakome tubili bantu bangu ceebo ono ntoobalama.”

Kwisa kwa mwaami umwi

⁹ Amusangalale, amusangalale mwebo nobene Siyoni! Amoolobeshe cakusangalala mwebo nobene Jelusalemu! Amubone mwaami wanu utoosa kuli ndimwe cakulibombya, ee, ulitantite pambongolo, ncakwiila pamwanaambongolo.

¹⁰ Mwaami Lesa waamba ayi, “Ndaakukusha shikoci sha nkondo muEfuleemu akukusha maaki a nkondo muJelusalemu. Ncakwiila ndaakutyola mata a nkondo. Mwaami wanu ulaakuleta luumuno pakati ka mishobo. Cishi cakwe cilaakunooswa kulweenge kuya mukushika kulweenge. Cilaakunooswa kuMulonga wa Yufuletisi akuya mukushika kupilila lisuba.”

Kubooshekwa kwa bantu bakwe Lesa

¹¹ Mwaami Lesa waamba ayi, “Ono mwebo ceebo ca cipangano ncendakapanga amwebo ico cakayuminishikwa abulowa bwa milambu, ndaakwaangulula bakaili banu kuswa mucishi ca busha cili anga ncilindi citacite maanshi.

¹² “Amuboole mwebo nomuli mucishi ca busha, ee, mwebo nomucite kulangila. Amupiluke kucishi uko nkomutacite cakulisukama. Bulya ndashomesha ayi ndaakumubooshesha shoolwe shobilo palipensho lyomwi alyomwi ilyo ndyemwakeendaamo.

¹³ Ndaakusebensesha bene Juda anga mbuta bwa shilumamba akusebensesha bene Isilaeli anga njemifwi. Balo bene Siyoni mbweshi nkasebenseshe anga ngumupeeni pakulwana bashilumamba bene Gilisi.”

¹⁴ Mwaami Lesa ulaakuboneka peculu lya bantu bakwe. Ulaakunowaala mifwi yakwe anga nkubeka kwa mfula. Mwaami Lesa Shinkusu shoonse ulaakulisha lupeenga lwa nkondo akweendela mucipuupu ca kumalenge.

¹⁵ Mwaami Lesa Shinkusu shoonse ulaakubatabilila bantu bakwe. Ncakwiila abalo balaakunyonyoola balwani babo. Munkondo balaakunokoolobeshabo anga bakolwa. Balaakutila bulowa bwa balwani babo cakwaamba ayi bulaakukunkabo anga mbwa mulambu bulya butilwa pacipaililo kuswa mumbale ifongomene.

¹⁶ Bushiku ubo bwaakushikila, Mwaami Lesa ulaakupulusha bantu bakwe bweenka mweembeshi mbwaafuna litanga lyakwe kubulwani. Bantu bakwe abo balaakunoobekabeka mucishi cakwe bweenka bubeka mabwe amakwebo kumushini.

¹⁷ Cabota cishi nceeci mwebo! Basankwa bacikula bwangu balaakushimpa kushili anga ngamaila abalo bamyooye balaakunooboneka kabotu kuwaini upya.