Sekaliya 8 - Baibo Busansulushi Bwa Libuku Ili

¹ Mpeeke liswi lya Mwaami Lesa Shinkusu shoonse lyakanyumfwika kuli ndime.

² “Maswi angu nebo neMwaami Lesa ngaaya. Ndabala ya Siyoni ndiisuni abuumbi. Busuba bwangu pandabala iyo butoofutilabo muli ndime anga ngumulilo mukubililisha balwani ba njiyo.

³ “Ndaakuboola kuSiyoni alimwi akwikala muJelusalemu. Lyalo ndabala ya Jelusalemu ulaakunokwiitwa ayi, ‘Ndabala ya Lushinisho,’ akalo kalundu kangu nebo neMwaami Lesa Shinkusu shoonse kalaakunokwiitwa ayi, ‘Kalundu Kasalalite.’ ”

⁴ Mwaami Lesa waamba ayi, “Lyalo banakashi abasankwa bakulite cakucembela balaakunoocanika mumikwakwa ya ndabala ya Jelusalemu. Womwi awomwi pakati kabo ulaakunokweendesha kunkoli ceebo cakucembela.

⁵ Mikwakwa iyo ilaakusulabo banike basankwa abanakashi beshi bakanoosekaninaamo.”

⁶ Mwaami Lesa Shinkusu shoonse waamba ayi, “Ici inga caboneka kuyuma kubaabo beshibakacaaleewo, sombi tacikoonshi kunjumina anebo. Nebo neMwaami Lesa Shinkusu shoonse ndaamba.”

⁷ Mwaami Lesa Shinkusu shoonse waamba ayi, “Ndaakupulusha bantu bangu kuswa kushishi sha kwicwe asha kumbo.

⁸ Ndaakubaboosha kwaamba ayi bakanookala muJelusalemu alimwi. Balaakuba bantu bangu anebo ndaakuba Lesa wabo ubalela cakushomeka alimwi cabululami.”

⁹ Mwaami Lesa Shinkusu shoonse waamba ayi, “Ono mwebo nomutoonyumfwa maswi aya kuswa kumilomo ya balaluki abo bakalingaako lwiimbi lwa Ŋanda yangu ndilwakayakwa, maansaanu aayume kwaamba ayi Ŋanda yangu iyakwe.

¹⁰ Kacitana kushikila ciindi ico, tekwakalinga kufola maali na muntu wenjila ncito nabi kulipila weenga wakupa ŋombe yakusebensesha. Tekwakalinga kwikala kwakubula cakulisukama balwani ceebo nebo ndakalengesha muntu womwi awomwi kubukila mubye.

¹¹ Sombi bulya nshitoocitila bantu bakacaalaawo ba mumushobo uyu bweenka mbondakacita kalekale. Nebo neMwaami Lesa Shinkusu ndaamba.

¹² “Bantu abo balaakunooshanga shakulya muluumuno. Minyansa yabo ilaakucata shisepo, cishi cilaakukusha shishango alyalo liculu lilaakulosha mfula. Ncakwiila ndaakupa shoolwe shoonse ishi kubamumushobo uyu beshi bakacaaleewo.

¹³ Nobene Juda abene Isilaeli, kalekale baswamashi bakalinga kushingana womwi awomwi mukwaamba ayi, ‘Aamulokele mapensho eenka akacitikila bene Juda abene Isilaeli!’ Sombi nebo ndaakumupulusha. Lyalo baswamashi abo balaakwaambilana womwi awomwi ayi, ‘Tambula shoolwe isho shakapekwa bene Juda abene Isilaeli!’ Aboobo amuyumye myoyo, mutaloondi.”

¹⁴ Mwaami Lesa Shinkusu shoonse waamba ayi, “Ono bweenka mbondakalinga kushinishite kuleta mapensho cakubula nkumbu pabamashali banu bakulukulu ndibakankalasha,

¹⁵ mbweeke ubo ndishinishite kupa shoolwe bene Jelusalemu abene Juda bulya. Aboobo mutaloondi.

¹⁶ Ono shintu nshemweelete kucita nsheeshi. Kamwaamba calushinisho kumuntu womwi awomwi. Kamoombolosha cakutanyengelela munkuta kwaamba ayi kube luumuno.

¹⁷ Mutapingi kucita bubi kuli shikamukobonyoko, mutanoobeca pakushomesha cakulumbila. Nebo ndipatite shintu sha mushobo uyo. Nebo neMwaami Lesa ndaamba.”

¹⁸ Mwaami Lesa Shinkusu shoonse wakaamba maswi aya kuli ndime neSekaliya ayi,

¹⁹ “Kulikasha kulya uko kuba mumweenshi wane, wasanu, wasanu ayobilo amweenshi walikumi kulaakuba kusekelela kwakusangalala akukondwa kwa bene Juda. Paceebo ceeci amusune lushinisho aluumuno.”

²⁰ Mwaami Lesa Shinkusu shoonse waamba ayi, “Ciindi cilaakushikila ba mumandabala amwi aanji ndyeshi bakese kuJelusalemu.

²¹ Abo bekala mundabala yomwi balaakuya kundabala imwi akwaamba ayi, ‘Tutooya mukulambila Mwaami Lesa Shinkusu shoonse akusenga kwaamba ayi atupe coolwe. Katiya soonse!’

²² Bantu baanji alimwi abamumishobo icite nkusu balaakwisa kuJelusalemu mukulambila ndime neMwaami Lesa Shinkusu shoonse akusenga kwaamba ayi abape coolwe.”

²³ Mwaami Lesa waamba ayi, “Munshiku isho baswamashi bali likumi balaakwisa kumuJuda womwi, kumucata kumupeto wa mungaanjo wakwe akwaamba ayi, ‘Katiya soonse mukwiinga twanyumfwa ayi Lesa uli awebo.’ ”