Sekaliya 7 - Baibo Busansulushi Bwa Libuku Ili

Mwaami Lesa mbwaakalalila kulikasha kulya kwabubeshi

¹ Mumwaaka wane wa bwaami bwakwe Dalyasi, Mwaami Lesa wakaamba kuli ndime neSekaliya pabushiku bwane bwa mweenshi wasanu ayone uyo wiitwa ayi Kisilefu.

² Bene Betelo bakatuma Shalesa alimwi aLegemu Meleki kubikaawo abasankwa bakwe kuya kuŊanda ya Mwaami Lesa Shinkusu shoonse mukusenga nkumbu kuli nguwe

³ akwiipusha kubapailishi abalaluki. Bakeepusha ayi, “Sa inga twatolelela kulila mukwiinga wa kunyonyoolwa kwa Ŋanda yakwe Lesa mukulikasha kulya mumweenshi wasanu bweenka mbotwakalinga kucita myaaka iinji yeenda?”

⁴ Aya ngomaswi akaswa kuMwaami Lesa kwisa kuli ndime.

⁵ Lakwe wakaamba ayi, “Lwiita bantu ba mucishi abapailishi ayi ndibakalinga kulikasha kulya akulila mumweenshi wasanu alimwi awasanu ayobilo mumyaaka ili 70 yeenda, tebakalinga kundemeka nebo, sobwe.

⁶ Ndibakalinga kulya akunwa bakalinga kucitabo cakulisangalasha beene.”

⁷ Ici ncaakaamba Mwaami Lesa kwiinda mubalaluki bataanshi paciindi ndabala ya Jelusalemu keecite bubile buunji kamuli abantu baanji. Paciindi ico bantu bakalinga kwikala muteeshibo mumandabala akalinga kwiishingulukite, sombi bamwi bakalinga kwikala kuNegefu akutulundu tuniini kumbo.

Mbobakaya mubusha mukwiinga wakutanyumfwa

⁸ Mwaami Lesa wakaamba alimwi kuli ndime neSekaliya ayi,

⁹ “Kalekale ndakapa milawo iyi kubantu bangu ayi, ‘Mulyeelete koombolosha cakutanyengelela, kutondesha luse akunyumfwila nkumbu muntu womwi awomwi.

¹⁰ Tamweelete kulita masuku pamitwi ya bamukalubinje, bana banshiwa, baswamashi mbomwikalaabo nabi bakandu. Mutanoopinga kucisa babyaanu.’

¹¹ “Sombi bantu bangu bakakaka kunyumfwa. Ncakwiila bakacala matwi abo

¹² akuyumya myoyo yabo anga ngumwaandami. Tabakwe kunyumfwa milawo nabi maswi ayo nebo neMwaami Lesa Shinkusu shoonse ngondakatuma kwiinda muMushimu wangu mubalaluki abo bakalinga kwikala mucishi kalekale. Paceebo ceeci ndakakalala abuumbi.

¹³ Tabakwe kunyumfwa ndindakalinga kubaambila. Aboobo anebo nshikwe kubakumbulaawo ndibakalinga kupaila kuli ndime.

¹⁴ Lyalo bucita cipuupu ndakaboolulushila mushishi sha baswamashi. Munshila iyo cishi cino cibotu cakashiikwabo akuba matongo kwakubula awiindaamo.”