Sekaliya 6 - Baibo Busansulushi Bwa Libuku Ili

Mulaluki mbwaakabona shikoci shone mucili anga nciloto

¹ Ndakabona mucili anga nciloto cimwi shikoci shone shakalinga kuswa pakati ka tulundu tobilo twa bulonse.

² Cikoci citaanshi cakalinga kukwelwa amaaki asalala, cabili amaaki ashiya,

³ catatu amaaki atuba, alimwi cane amaaki akalinga amabalamabala.

⁴ Mpomunyaawo ndakeepusha munjelo uyo wakalinga kubandika anebo ayi, “Nkambo, ino shikoci ishi shilaambanshi?”

⁵ Alakwe wakankumbula ayi, “Uyu njimyuuwo yone yaswa kunembo lya Mwaami Lesa wa cishi coonse ca panshi.”

⁶ Cikoci cakalinga kukwelwa amaaki ashiya cakaya kumatwa kucishi ca Babiloni, maaki atuba akaya kumbo, aalo maaki amabalamabala akaya kucishi cakalinga kumalenge.

⁷ Ono maaki aya amabalamabala ndyaakaswa, akalinga kwiingene kuya mukubona cishi ca panshi. Lyalo munjelo wakaamba ayi, “Kamuya mubone cishi ca panshi mbocibete!” Mpeeke maaki ayo akaya.

⁸ Mpomunyaawo munjelo uyo wakoolobesha kuli ndime ayi, “Maaki ayo akaya kumatwa kuBabiloni aya mukutontosha bukali bwa Mwaami Lesa.”

Joshuwa mbwaakafwalikwa mushini

⁹ Ono Mwaami Lesa wakandwiita maswi aya.

¹⁰ Wakaamba ayi, “Bwesa shipo sha golodi asilifa shakapa Eludai, Tobija alimwi aJedaya uyaasho kuŋanda yakwe Josiya mwanaakwe Sefaniya. Bantu abo boonse bakaswa mubusha kucishi ca Babiloni.

¹¹ Panga mushini wa silifa agolodi uyo akufwalika mupailishi munene Joshuwa mwanaakwe Jeosadaki.

¹² Kuswawaawo umulwiite ayi Mwaami Lesa Shinkusu shoonse waamba ayi, ‘Muntu uyo utokwiitwa ayi Musampi ulaakukomena kabotu pamusena apo mpwaabete akuyakulula Ŋanda ya Mwaami Lesa.

¹³ Lakwe ngowooyo weshi akeeyakulule akutambula bulemu ubo bweelete kupekwa mwaami alimwi ulaakulela bantu bakwe. Mupailishi ulaakunokwiimikana pafwaafwi acuuna cakwe ca bwaami. Bantu aba bobilo balaakunoosebensela pantu pomwi muluumuno alimwi akunyumfwana.

¹⁴ Mushini uyo ulaakuba ncakwiibalushishaako muŊanda ya Mwaami Lesa mukulemeka Eludai, Tobija, Jedaya alimwi aJosiya.’

¹⁵ “Bantu bekala kulaamfu balaakwisa mukucafwa kuyakulula Ŋanda yakwe Lesa iyo. Na ikamane kuyakululwa ndyeshi mukeshibe ayi anu nguMwaami Lesa Shinkusu shoonse ngowakantuma kuli ndimwe. Shintu ishi shilaakucitika na ncakwiila mukanyumfwile milawo ya Mwaami Lesa, Lesa wanu.”