Sekaliya 5 - Baibo Busansulushi Bwa Libuku Ili

Mulaluki mbwaakabona cakulembelaawo cuuluka mucili anga nciloto

¹ Ono ndindakalangilisha alimwi ndakabona cakulembelaawo kacuuluka mwiculu.

² Mpomunyaawo munjelo wakanjipusha ayi, “Ino wabonanshi?” Anebo ndakamukumbula ayi, “Ndabona cakulembelaawo citokuuluka mwiculu cicite mamita ali 9 mubulaamfu alimwi mamita ali 4.5 mubufwaafwi.”

³ Lyalo wakandwiita ayi, “Mucakulembelaawo umo mulilembetwe lishingo litooya mucishi coonse. Kulubasu lumwi kulilembetwe maswi akwaamba ayi mwiipi uli woonse ulaakutandaanishikwa alimwi kulubasu lumwi kulilembetwe ayi uyo woonse weshi anooshomesha cakulumbila cabubeshi alakwe ulaakutandaanishikwa.

⁴ Mwaami Lesa Shinkusu shoonse waamba ayi, ‘Ndaakutuma lishingo ilyo lyeshi likenjile muŋanda ya mwiipi woonse amuŋanda ya wooyo ushomesha cakulumbila cabubeshi muliina lyangu. Lilaakunooshiite mumaandaabo kushikila likaanyonyoole cakumaninina.’ ”

Mulaluki mbwaakabona mwanakashi uli mumutaanga mucili anga nciloto

⁵ Munjelo uyo wakalinga kubandika anebo wakesa alimwi akuŋambila ayi, “Langilisha! Ncilya cintu cimwi citoosa.”

⁶ Mpeeke ndakamwiipusha ayi, “Ino nciinshi?” Alakwe wakankumbula ayi, “Ngumutaanga wakupimishaako uyo utokwiimikanina shibiibi sha mucishi coonse.”

⁷ Mutaanga uyo wakalinga kucite cakufwekaawo cakapangwa amuntomfwe. Ono kaanceebela, cakufwekaawo cakafwekuka. Mukati mumutaanga mwakalinga mwanakashi wakalinga kushiite.

⁸ Mpomunyaawo munjelo wakaamba ayi, “Mwanakashi uyu utookwimikanina shibiibi.” Lyalo wakamushindikila mumutaanga akuboosha cakufwekaawo ca muntomfwe pali nguwo.

⁹ Kuswawaawo ndakabona banakashi bobilo kabesa cuulukila nkondakalingila. Bakalinga kucite mapapaminwa ayumu bweenka mbuli a nkobokobo. Banakashi aba bakabwesa mutaanga uyo akuuluka anguwo.

¹⁰ Mpomunyaawo ndakeepusha munjelo uyo wakalinga kubandika anebo ayi, “Ino batootola kuli mutaanga?”

¹¹ Alakwe wakankumbula ayi, “Batooutola kuBabiloni uko nkweshi bakooyakile ŋanda. Ŋanda iyi yaakumana kuyakwa, mutaanga ulaakubikwa mumo ayi kabaya mukuulambila.”