Sekaliya 4 - Baibo Busansulushi Bwa Libuku Ili

Mulaluki mbwaakabona cakubikaawo malampi mucili anga nciloto

¹ Mpomunyaawo munjelo ulya wakalinga kubandika anebo, wakesa alimwi kuli ndime akumbusha anga ndalinga kulete.

² Mpeeke wakanjipusha ayi, “Wabonanshi?” Lyalo ndakamukumbula ayi, “Ndabona cakubikaawo malampi cakapangwa agolodi. Peculu pali mbale ifongomene yakubikamo mafuta. Cakubikaawo malampi ici cilicite malampi osanwe aobilo, limwi alimwi lilicite tulyango tosanwe atobilo twakwiindamo ntambo.

³ Kuli ashisamu shobilo sha maolifi kumbasu sha ncico. Cimwi cilibetele kululyo lwa mbale ifongomene, cimwi kucipiko.”

⁴ Mpomunyaawo ndakeepusha munjelo uyo wakalinga kubandika anebo ayi, “Nkambo, ino shintu ishi shilaambanshi?”

⁵ Lyalo wakanjipusha ayi, “Sa tooshi nceshaamba?” Nebo ndakamukumbula ayi, “Sobwe nkambo, nshicishi.”

⁶ Kuswawaawo wakaŋambila ayi, “Aya ngomaswi a Mwaami Lesa kuli Selubabelo. Waamba ayi, ‘Teshi ukakome ceebo ca nkusu sha bashilumamba nabi nkusu shako omwiine, sombi ulaakukoma ceebo ca Mushimu wangu. Nebo neMwaami Lesa Shinkusu shoonse ndaamba.

⁷ Makatasho ali anga nkalundu kanene alaakushimingana kunembo lyako. Webo ulaakuyakulula Ŋanda yangu. Ono waakushimpika libwe lyakweelaako, bantu balaakoolobesha ayi, Lesa aipe coolwe! Lesa aipe coolwe!’ ”

⁸ Kuswawaawo Mwaami Lesa wakaŋambila alimwi ayi,

⁹ “Selubabelo ngowakayaka lwiimbi lwa Ŋanda yangu alimwi ulaakwiimanisha. Shintu ishi shaakucitika, bantu bangu balaakwishiba ayi anu ndime neMwaami Lesa Shinkusu shoonse ndakakutuma kuli mbabo.

¹⁰ Balityongwete ceebo ncito taitooya panembo. Sombi balaakubona Selubabelo kaayaka Ŋanda yangu iyi, lyalo balaakusangalala abuumbi.” Lyalo munjelo wakasansulula pacili anga nciloto ayi, “Malampi ali osanwe aobilo eemikanina meenso osanwe aobilo a Mwaami Lesa ayo abona pacishi ca panshi coonse.”

¹¹ Mpomunyaawo ndakamwiipusha ayi, “Ino shisamu ishi shobilo sha maolifi shili kululyo akucipiko lya cakubikaawo malampi shilaambanshi?”

¹² Kuswawaawo ndakamwiipusha alimwi ayi, “Ino misampi iyo yobilo ya maolifi ibete kulubasu lwa shakwiindamo mafuta a maolifi sha golodi shobilo shilaambanshi?”

¹³ Lakwe wakanjipusha ayi, “Sa tooshi nceshaamba?” Nebo ndakamukumbula ayi, “Sobwe nkambo, nshicishi.”

¹⁴ Mpeeke wakaamba ayi, “Aba mbobantu bobilo abo Mwaami Lesa wa cishi ca panshi coonse mbwaakasala akunanika mafuta ayi bakanoomusebensela.”