Sekaliya 2 - Baibo Busansulushi Bwa Libuku Ili

Mulaluki mbwaakabona ntambo yakupimisha mucili anga nciloto

¹ Mucili anga nciloto cimwi ndakabona musankwa kaaimfwi kunembo lyangu antaambo yakupimishaako mulyaansa.

² Mpeeke ndakamwiipusha ayi, “Ino webo utooya kuli?” Alakwe wakankumbula ayi, “Ntooya mukupima ndabala ya Jelusalemu kwaamba ayi nshibe mboibete mubufwaafwi alimwi amubulaamfu.”

³ Mpomunyaawo munjelo uyo wakalinga kubandika anebo wakanshiya. Lyalo munjelo umwi wakesa mukumukumanya

⁴ akumulwiita ayi, “Cica uye ulwiite musankwa ulya cikula bwangu ayi, ‘Ndabala ya Jelusalemu teshi ikabeewo alubumbu ceebo ca kufula kwa bantu ashifubwa.

⁵ Mwaami Lesa washomesha ayi lakwe mwiine ulaakuba lubumbu lwa mulilo lwakushinguluka ndabala iyo akuba bulemu bwa njiyo.’ ”

Bakatolwa busha mbobakeetwa kuboola kumishaabo

⁶ Ono Mwaami Lesa waamba ayi, “Kamwisa! Kamwisa! Amuciceeko kucishi cakumatwa mukwiinga ndakamupalanganishisha kumbasu shone sha cishi.

⁷ Kamwisa nobene Siyoni. Amulobokeeko kuswa kucishi ca Babiloni!

⁸ Uyo woonse umutyunka munwe cilyeelenebo akutyunka ndime muliinso.” Paceebo ceeci Mwaami Lesa Shinkusu shoonse wakantuma kwaambila baabo bakalinga kusaala bantu bakwe ayi,

⁹ “Nebo neMwaami Lesa ndaakumulwana alimwi mulaakusaalwa kubantu beenka abo bakalinga basebenshi banu.” Cintu ici ndyeshi cikacitike, muntu uli woonse ulaakwishiba ayi Mwaami Lesa Shinkusu shoonse wakantuma.

¹⁰ Mwaami Lesa waamba ayi, “Amoolobeshe akusangalala nobene Siyoni ceebo ntoosa mukwikala pakati kanu.”

¹¹ Paciindi ico mishobo iinji ilaakwisa kuMwaami Lesa akuba bantu bakwe. Ulaakwikala pakati kanu alimwi mulaakwishiba ayi Mwaami Lesa Shinkusu shoonse ngowantuma kwisa kuli ndimwe.

¹² Lyalo cishi ca Juda cilaakuba cipansha Mwaami Lesa ncaasuni abuumbi mucishi cakwe cisalalite. Ndabala ya Jelusalemu ilaakuba njendabala njeshi akanoosuni kwiinda mandabala amwi oonse.

¹³ Ono noonse amuumune kunembo lya Mwaami Lesa ceebo utooswa mumusena wakwe usalalite.