Sekaliya 14 - Baibo Busansulushi Bwa Libuku Ili

Ndabala ya Jelusalemu amishobo imwi

¹ Bushiku bwa Mwaami Lesa butoosa ndabala ya Jelusalemu ndyeshi ikasaalwe. Lyalo buboni bweshi bukasaalwe bulaakubaanishikwa kamubweneeko.

² Lyalo Mwaami Lesa ulaakubunganya bantu ba mishobo yoonse kwaamba ayi bese balwane ndabala ya Jelusalemu. Bantu abo balaakukoma ndabala iyo akusaala maanda oonse. Banakashi balaakukumanishikwa cakukakatishikwa. Musa wa bantu ba mundabala iyo balaakutolwa busha, sombi bamwi balaakucaala mweenka umo.

³ Mpeeke Mwaami Lesa ulaakwisa mukulwana mishobo iyo bweenka bulwana shilumamba pabushiku bwa nkondo.

⁴ Pabushiku bweenka ubo Mwaami Lesa ulaakwiimikana paKalundu ka Olifi ako kalangene andabala ya Jelusalemu kulubasu lwa kwicwe. Lyalo kalundu ako kalaakubanishikwamo tobilo kuswa kwicwe kuya kumbo akupanga cinyika cinene. Musa wa kalundu ako kalaakusena kulubasu lwa kumatwa alimwi musa umwi kumalenge.

⁵ Lyalo mwebo mulaakuloboka akwiinda mucinyika ceenka ico ceebo cilaakuya mukushika akuAselo. Mulaakucica bweenka mbomwakacica ciindi cilya citentanshi ndicakacitika mubwaami bwakwe Usiya mwaami wa bene Juda. Kuswawaawo Mwaami Lesa ulaakwisa pantu pomwi abasalalite bakwe boonse.

⁶ Ubo bushiku bwaakushika, teshi kukabewo mpewo nabi caandwa.

⁷ Bulaakuba bushiku bubotu butacite munshinshe, bushiku ubo bushibikitwebo kuMwaami Lesa. Pabushiku ubo amacolesha kulaakunoolibo mumuni.

⁸ Ncakwiila bushiku ubo bwaakwisa, maanshi atontola alaakukunka kuswa mundabala ya Jelusalemu. Musa wa maanshi ayo ulaakukunkila muLweenge lwa Mwiinyo, musa umwi muLweenge lwa Mediteleniyani. Alaakunookunkabo mwaaka oonse, cilimo amainsa.

⁹ Lyalo Mwaami Lesa ulaakuba mwaami wa cishi coonse ca panshi. Pabushiku ubo kulaakuba Mwaami Lesa womwibo ndondoli. Nkokwaamba ayi bantu boonse balaakulambilabo liina lyakwe lyeenka.

¹⁰ Cishi coonse kuswa kuGeba kuya mukushika kuLimoni kumalenge lya ndabala ya Jelusalemu, cilaakuba ceelene anga ncishi ca Alaba. Sombi ndabala ya Jelusalemu ilaakutolwa peculu akwikalilila peenka apo. Ndabala ilaakutalikila kuMwinjililo wakwe Benjameni kuya mukushika kumusena wa Mwinjililo Utaanshi, nkokwaamba ayi kuMwinjililo wa paLikonko alimwi kuswa kuŋanda ilaamfu ya Ananelo kuya mukushika kushilindi shakutyaninamo minyansa sha kubwalo.

¹¹ Lyalo bantu balaakwikalaamo muluumuno. Ncakwiila ndabala ya Jelusalemu iyo teshi ikanyonyoolwewo tubili.

¹² Mwaami Lesa ulaakuleta mwaalu uyoosha kubamumishobo yoonse abo balwana ndabala ya Jelusalemu. Mibili yabo ilaakuboola kabacili boomi. Ncakwiila meenso abo alaakuboolela mumakobo ayalo milaka yabo ilaakuboolela mumilomo yabo.

¹³ Pabushiku ubo, Mwaami Lesa ulaakubalengesha miyeeyo yabo kufulungana alimwi balaakuba aboowa cakwaamba ayi umwi ulaakucata mubye uli pafwaafwi anguwe palyaansa akutalika kulwanaakwe.

¹⁴ Abalo bene Juda balaakunoolwana mukufuninina Jelusalemu. Balaakubwesa shintu sheshi bakasaale kuswa kumishobo imwi. Ncakwiila balaakusaala buboni buli mbuli golodi, silifa kubikaawo ashakufwala shiinji abuumbi.

¹⁵ Mwaalu uyoosha ulaakupola apamaaki, pashifubwa shili anga nimbongolo, pangamela, apambongolo. Ncakwiila ulaakupola pashifubwa shoonse mumisumba yoonse ya balwani babo.

¹⁶ Lyalo boonse beshi bakacaaleewo pamishobo iyo yeshi ikalwane Jelusalemu balaakunooya kooko mwaaka amwaaka mukulambila Mwaami, Mwaami Lesa Shinkusu shoonse. Balaakunooya mukucanika kuKusekelela kwa Shimpaka.

¹⁷ Na bamumishobo imwi ikakake kuya mukulambila Mwaami, Mwaami Lesa Shinkusu shoonse, mfula teshi ikalokelewo mumyuunda yabo.

¹⁸ Na bene Ijipiti bakakake kunoocanika kuKusekelela kwa Shimpaka, mfula teshi bakanooibonaawo. Nkokwaamba ayi Mwaami Lesa ulaakubaletela mwaalu weenka uyo ngweshi akalosheshe bamumishobo yoonse abo beshi bakakake kuya mukucanika kuKusekelela kwa Shimpaka.

¹⁹ Uyu ulaakuba ngomulandu weshi ukapekwe bene Ijipiti alimwi bamumishobo yoonse abo beshi bakakake kucanika kuKusekelela kwa Shimpaka.

²⁰ Pabushiku ubo, pamilangu ya maaki palaakulembwa ayi, “Cisalalite kuMwaami Lesa.” Ayalo mipika yakutelekelaamo muŊanda ya Mwaami Lesa ilaakuba anga nimbale shifongomene shisalalite shili kunembo lya cipaililo.

²¹ Mipika yoonse muJelusalemu amuJuda ilaakunoosalalite kuMwaami Lesa Shinkusu shoonse. Lyalo boonse beshi bakanoosa mukubenga milambu balaakunooisebensesha kutelekelaamo nyama ya mulambu. Ncakwiila pabushiku ubo teshi kukabewo shimakwebo muŊanda yakwe Mwaami Lesa Shinkusu shoonse.