Sekaliya 13 - Baibo Busansulushi Bwa Libuku Ili

¹ Mwaami Lesa Shinkusu shoonse waamba ayi, “Bushiku ubo kulaakucalulwa kantupu pabamulunyungu lwakwe Defedi apabene Jelusalemu kakubasansha kuswa kushibiibi alimwi akutunkowesha.

² Bushiku ubo ndaakushiminganya meena a shibumbwabumbwa mucishi alimwi teshi shikayeeyekwewo tubili. Kuswawaawo ndaakukusha balaluki amushimu wakulambila shibumbwabumbwa mucishi.

³ Lyalo na umwi akanoocisuni kulaluka, baishi abanyina balaakumwaambila ayi, ‘Webo ulyeelete kufwa ceebo utoobeca kwiinda mukusebensesha liina lya Mwaami Lesa.’ Muntu wa mushobo uyo bamashali bakwe mwiine balaakumuyasa.

⁴ “Pabushiku ubo mulaluki woonse ulaakufwa nsoni ceebo ca bulaluki bwakwe. Aboobo teshi akafwalewo shakufwala shabulaluki sha booya ayi acenjeeke bantu alimwi, sobwe.

⁵ Ulaakwaamba ayi, ‘Nebo nshiishi mulaluki. Ndi mulimi. Ncakwiila buumi bwangu boonse ndabucana mukulima.’

⁶ Ono na umwi akamwiipushe ayi, ‘Ino shilonda ishi shili pamubili wako nshanshi?’ Lakwe ulaakukumbula ayi, ‘Shilonda ishi ndakoominwa kuŋanda ya mweensuma.’ ”

Mulawo wakucaya mweembeshi wakwe Lesa

⁷ Mwaami Lesa Shinkusu shoonse waamba ayi, “Nyamuka, webo omupeeni ulwane mweembeshi wangu! Ee, umulwaane uyo unsebensela. Umucaaye, lyalo mbelele shitoopalangana. Nebo nemwiine ntoolwana bantu bangu.

⁸ Shipansha shobilo sha shotatwe sha bantu mucishi coonse, balaakufwa. Ee, kulaakucaalabo cipansha comwi.

⁹ Bamucipansha comwi ico ceshi cikacaale, ndaakubasalasha. Ncakwiila ndaakubasalasha mumulilo bweenka silifa mbooboteshekwa. Ndaakubeelesha bweenka golodi mbooweeleshekwa mumulilo. Balaakumpaila anebo ndaakubakumbula. Ndaakunoobeeta ayi, ‘Bantu bangu.’ Abalo balaakunokwaamba ayi, ‘Mwaami Lesa ngoLesa wesu.’ ”