Sekaliya 12 - Baibo Busansulushi Bwa Libuku Ili

Ndabala ya Jelusalemu mbweshi ikafuunwe

¹ Aya ngamakani abulaluki akaambwa aMwaami Lesa pabene Isilaeli. Ngamaswi a Mwaami Lesa uyo wakayala liculu, kubika lwiimbi lwa cishi ca panshi akupa buumi muntu. Lesa uyo waamba ayi,

² “Amubone, ndaakulengesha ndabala inene ya Jelusalemu kuba anga ninkomeshi ya waini iyo mishobo yoonse ishingulukite njeshi ikanweemo akutalantanta anga mbantu bakoletwe. Kuswawaawo balwani balaakushinguluka ndabala inene ya Jelusalemu pantu pomwi amandabala amwi oonse a muJuda.

³ Ono ciindi ico caakushikila, mishobo ya mucishi ca panshi yoonse yaakubungana pantu pomwi ayi ilwane ndabala iyo, ndaakulengesha Jelusalemu kuba anga ndibwe lilemu. Nkokwaamba ayi kulila mushobo uyo weenga weelesha kulinyamuna, ulaakulicisa.

⁴ Pabushiku ubo ndaakulengesha maaki abo oonse kuba aboowa alimwi ndaakufulunganya beshi kwaatanta boonse. Ndaakunoolama mushobo wa bene Juda, sombi ndaakupofosha maaki a mishobo imwi yoonse.

⁵ Lyalo bamatanjilili ba bene Juda balaakunoolyaamboosha ayi, ‘Bene Jelusalemu mbayumu ceebo Mwaami Lesa Shinkusu shoonse nguLesa wabo.’

⁶ “Pabushiku ubo ndaakulengesha bamatanjilili ba bene Juda kuba anga nimbabula yabikwa pamulwi wa nkuni. Ee, kubabo anga ncimunimweenge cabikwa pamile ya bwiisu. Nkokwaamba ayi balaakunyonyoola mishobo yoonse ibashingulukite. Sombi balo bene Jelusalemu balaakunooshiitebo kwakubula cakulisukama mundabala yabo.

⁷ “Nebo neMwaami Lesa ndaakutaanguna kulengesha bene Juda kukoma kwaamba ayi bulemu bwa bamulunyungu lwakwe Defedi alimwi abwa bene Jelusalemu, butakasotoki bwa bene Juda.

⁸ Pabushiku ubo nebo neMwaami Lesa ndaakutabilila bantu bekala mundabala ya Jelusalemu kwaamba ayi abo batacite nkusu pakati kabo bakabebo ankusu bweenka mbuli Defedi. Abalo bamulunyungu lwakwe Defedi balaakunoobatanjililabo anga ngumunjelo wangu neMwaami Lesa, ee, anga ndime nemwiine neentoobatanjilila.

⁹ Pabushiku ubo ndaakunyonyoola mushobo uli woonse uyo weshi ukalwane ndabala ya Jelusalemu.

¹⁰ “Ndaakutila mushimu wa luse akupaila pabamulunyungu lwakwe Defedi alimwi apabene Jelusalemu. Lyalo balaakulanga kuli ndime ngobakayasa akundila bweenka muntu mbwaalila mwanaakwe womwibo na wafwa, ee, kundila bweenka muntu mbwaalila mwanaakwe wakwiiya.

¹¹ Pabushiku ubo kulila buumpute mundabala inene ya Jelusalemu kulaakukomena abuumbi. Ncakwiila kulaakubabo anga nkulila buumpute pali Adadi Limoni kuliwesa lya Megido.

¹² Cishi coonse cilaakulila, cipani comwi acomwi ceenka. Abalo bamakaabo balaakunoolila beenka. Nkokwaamba ayi bamucipani ca bamulunyungu lwakwe Defedi abamakaabo, bamucipani ca bamulunyungu lwakwe Natani abamakaabo,

¹³ bamucipani ca bamulunyungu lwakwe Lefi abamakaabo, bamucipani ca bamulunyungu lwakwe Shimeyi abamakaabo

¹⁴ alimwi ashipani shimwi shoonse abamakaabo.”