Sekaliya 11 - Baibo Busansulushi Bwa Libuku Ili

Kukomwa kwa beshikulyatilila

¹ Calula minjililo yako webo Lebanoni, kwaamba ayi mulilo utente shisamu shako sha sida.

² Amulile cakooloma mwebo noshisamu sha mapaini ceebo shisamu sha sida shamana, ee, shisamu shilemekwa shanyonyoolwa! Ncakwiila mulile cakooloma mwebo nomibanga ya kuBashani, mulile ceebo shisaka shatemwa!

³ Amunyumfwe kooloma kwa beembeshi ceebo mafulo abo abotu anyonyoolwa. Amunyumfwe kubuluma kwa nkalamu, ceebo shisaka nsheshikalaamo sha kuJoodani shanyonyoolwa!

Makani a beembeshi bobilo

⁴ Ono Mwaami Lesa, Lesa wangu waamba ayi, “Embela litanga lya mbelele isho shakalinga kweelete kucaikwa.

⁵ Bashuula balashicaya kwakutapekwa amulandu. Abalo balya bashuulisha balaamba ayi, ‘Aalumbaishikwe Mwaami Lesa, ndabiila!’ Nabi beembeshi ba nshisho boonse tabashifwitiiwo ankumbu.

⁶ Paceebo ceeci teshi nkabanyumfwilewo nkumbu bantu ba mucishi ici. Muntu woonse ndaakumwaaba kuli shikamukobonyina akumwaami wakwe. Bantu aba balaakubalyatilila, sombi nebo teshi nkabafuneewo sobwe. Nebo neMwaami Lesa ndaamba.”

⁷ Abo bakalinga kuula mbelele akushuulisha bakampa ncito yakusheembela. Ndakatalika kweembela mbelele isho shakalinga kweelete kucaikwa. Lyalo ndakabwesa nkoli shobilo akwiita imwi ayi, “Nkumbu,” ayalo imwi ayi, “Kucatana.” Kuswawaawo ndakeembela mbelele isho kabotu.

⁸ Mumweenshi omwi ndakatandaanya beembeshi botatwe ceebo ndakabacimwa abalo bakampata.

⁹ Aboobo ndakaambila litanga ayi, “Teshi nkabe tubili mweembeshi wanu. Isho sheelete kufwa, kashifwabo. Isho sheelete kunyonyoolwa, kashinyonyoolwabo. Ashalo isho sheshi shikacaaleewo, shilaakunoolyaana.”

¹⁰ Mpomunyaawo ndakabwesa nkoli iyo iitwa ayi, “Nkumbu” akwiityola. Ndakacita boobo mukumanisha cipangano ico Mwaami Lesa ncaakapanga amishobo ya bantu yoonse.

¹¹ Aboobo pabushiku ubo cipangano cakamanishikwa. Lyalo abo bakalinga kuula mbelele akushuulisha abo bakalinga kunjebela, bakeshiba ayi Mwaami Lesa utokwaambila musheesho nshendakacita.

¹² Kuswawaawo ndakabaambila ayi, “Na mwacibona ayi ncibotu kuli ndimwe kumfolesha, amumfoleshe. Ono na tamusuni, mutamfoleshiiwo, sobwe.” Mpeeke bakamfolesha maali a silifa makumi otatwe.

¹³ Mpomunyaawo Mwaami Lesa wakaŋambila ayi, “Waala maali ayo mucipinda cakusungilaamo buboni ca muŊanda yangu.” Lyalo ndakabwesa maali a silifa ali makumi otatwe ayo ngobakayeeyela ayi ngoonjelete kupekwa akwaawaala mucipinda ico.

¹⁴ Kuswawaawo ndakatyola nkoli imwi iyo yakalinga kwiitwa ayi, “Kucatana” kutondesha kumana kwa mukowa wakalinga pakati ka bene Juda alimwi abene Isilaeli.

¹⁵ Mpomunyaawo Mwaami Lesa wakaŋambila ayi, “Ba mweembeshi alimwi, ono luno ube mweembeshi muluya.

¹⁶ Ceebo ndisuni kuleta mweembeshi mucishi uyo weshi akanoobula kubikila maano kuli sheesho shisowekete, kuyandoola twaana, kushilika shalicisa nabi kusanina shili kabotu. Sombi lakwe ulaakunoolya nyama sha mbelele shiinite abuumbi akupwaya shoondo sha nshisho.

¹⁷ Mapensho kumweembeshi uyo utaaku mbwaabete, ee, mweembeshi uyo ushiya litanga lyakwe. Aboobo nkondo ilaakunyonyoola nkusu shakwe. Lyaansa lyakwe lilaakunyana aliinso lyakwe lyalulyo lilaakupofola.”