Sekaliya 1 - Baibo Busansulushi Bwa Libuku Ili

Mwaami Lesa mbwaakeeta bantu bakwe kusandukila kuli nguwe

¹ Mumweenshi wasanu ayotatwe mumwaaka wabili wa bwaami bwakwe Dalyasi, maswi a Mwaami Lesa akesa kuli nebo neSekaliya mwanaakwe Belekiya mwishikulu wakwe Ido.

² Mwaami wakaambila nebo neSekaliya kulwiita bantu ayi, “Nebo neMwaami Lesa, ndakakalala abuumbi pabamashali banu bakulukulu.

³ Sombi ntoomulwiita mwebo ayi, ‘Amusandukile kuli ndime anebo nsandukile kuli ndimwe.

⁴ Mutabi anga mbamashali banu bakulukulu. Kalekale balaluki bangu bakabapa maswi angu akubalwiita ayi basanduke kuswa kunshila shabo shibiibi amicito yabo ibiibi. Sombi balo tabakwe kunyumfwa nabi kukonkela maswi angu.

⁵ Bamashali banu bakulukulu alimwi abalaluki boonse abo bakamana kufwa.

⁶ Ndakapa bamashali banu bakulukulu milawo amilasho kwiinda mubasebenshi bangu balaluki, sombi balo bakeekaka akupekwa mulandu. Kuswawaawo bakasanduka kuswa kushibiibi shabo akusumina ayi nebo neMwaami Lesa Shinkusu shoonse ndakabapa mulandu kweelana akubisha kwabo bweenka mbondakayeeya kucita.’ ”

Mulaluki mbwaakabona maaki mucili anga nciloto

⁷ Pabushiku bwamakumi obilo anshiiku shone bwa mweenshi walikumi awomwi, mweenshi ngobeeta ayi Shebati, mumwaaka wabili wa bwaami bwakwe Dalyasi, maswi a Mwaami Lesa akesa kuli nebo neSekaliya mwanaakwe Belekiya mwishikulu wakwe Ido.

⁸ Mashiku mucili anga nciloto ndakabona musankwa kaatantite liaki lisalala. Wakesa weemikana mushisamu sha masompe mucinyika ca mulonga. Kwisule kwakalinga aamwi maaki asalala, acite shibala shisalala aatubabo tu.

⁹ Ono ndakeepusha ayi, “Nkambo, ino maaki aya atokwaambanshi?” Munjelo uyo wakalinga kubandika anebo wakankumbula ayi, “Ntookubonesha ncaatokwaamba.”

¹⁰ Lyalo musankwa wakalinga kwiimfwi pakati ka shisamu sha masompe wakasansulula ayi, “Mwaami Lesa watuma maaki aya kwisa mukubona cishi ca panshi mbocibete.”

¹¹ Lyalo beshikutanta pamaaki bakaluula kumunjelo uyo wakalinga kwiimfwi pakati ka shisamu sha masompe ayi, “Tweendaana mucishi coonse akucana kwaamba ayi cishi coonse ca panshi citokookesha muluumuno.”

¹² Mpeeke munjelo wa Mwaami Lesa wakaamba ayi, “NoBaami baLesa Beshinkusu shoonse, mwakakalalila bene Jelusalemu aba mumandabala a muJuda mumyaaka ili 70. Ino mulaakubafwita lili nkumbu?”

¹³ Mwaami Lesa wakakumbula munjelo maswi abotu akuumbulusha.

¹⁴ Mpomunyaawo munjelo wakandwiita ayi, “Ambilisha maswi akaamba Mwaami Lesa Shinkusu shoonse ayi, ‘Jelusalemu ndabala yangu inene isalalite ndiisuni alimwi ndeebikaako maano.

¹⁵ Sombi ndikalalite abuumbi pamishobo iyo ishiite cakuliiba. Mukwiinga ndindakalinga kukalalite paniini pabantu bangu, bantu balo abo bakeelikaawo mapensho pali mbabo.

¹⁶ Paceebo ceeci nebo ndaboola kuJelusalemu mukubonesha nkumbu kundabala yangu. Ŋanda yangu ilaakuyakululwa pantu pomwi andabala yangu. Nebo neMwaami Lesa Shinkusu shoonse ndaamba.’ ”

¹⁷ Lyalo munjelo wakandwiita ayi, “Ambilisha kubantu ayi, ‘Mwaami Lesa waamba ayi mandabala anene akwe alaakuswitilila alimwi. Ulaakucafwa Jelusalemu akwiisaala ayi ibe ndabala yakwe mwiine.’ ”

Mulaluki mbwaakabona meeca mucili anga nciloto

¹⁸ Mucili anga nciloto cimwi ndakabona meeca one.

¹⁹ Ndakeepusha munjelo uyo wakalinga kubandika anebo ayi, “Ino meeca aya alaambanshi?” Alakwe wakankumbula ayi, “Atokwiimikanina shishi shankusu isho shakapalanganya bene Juda, bene Isilaeli alimwi abene Jelusalemu.”

²⁰ Lyalo Mwaami Lesa wakambonesha basebenshi bakalinga bone kabacite ashakupopesha.

²¹ Ndakeepusha ayi, “Ino bantu aba besa mukucitanshi?” Lakwe wakankumbula ayi, “Besa mukuloondesha akukoma shishi shankusu isho shakamana kupwayoola cishi ca Juda akupalanganya bantu boonse ba ncico.”