Sefaniya 2 - Baibo Busansulushi Bwa Libuku Ili

Mbwaakaambila bantu ayi basanduke kuswa kushibiibi

¹ Amubungane, amubungane mwebo nomushobo utacite nsoni

² kacitana kushika ciindi cakasalwa, kamutana kunyana akufwa anga ndiluba, kabutana kwisa bukali bwa Mwaami Lesa pali ndimwe.

³ Amuyandoole Mwaami Lesa noonse mwebo nobantu babombu ba mucishi, mwebo nomukonkela milawo yakwe. Amuyandoole bululami alimwi mulibombye. Mpashi mulaakutabililwa pabushiku Mwaami Lesa ndyeshi akatondeshe bukali bwakwe.

Kunyonyoolwa kwa mishobo ishingulukite bene Isilaeli

⁴ Ndabala ya Gasa balaakwiishiya, ayalo ndabala ya Ashikeloni ilaakuba matongo. Lisuba lyakushika pakati ka mutwi bene Ashidodi balaakutandaanishikwa ayalo ndabala ya Ekiloni ilaakumwayululwa.

⁵ Mapensho kuli ndimwe nobene Filisiti, mwebo nomwikala mulombe lwa lweenge. Maswi a Mwaami Lesa atokwaamba pamapensho ako webo ocishi ca Kenani ca bene Filisiti. Maswi ayo aamba ayi, “Ndaakukunyonyoola alimwi taaku eshi akacaaleewo.”

⁶ Cishi canu mulombe lwa lweenge cilaakusanduka cikabe musena wa beembeshi alimwi ashimpati sha mbelele.

⁷ Cishi ico cilaakuba ca bene Juda abo beshi bakacaaleewo. Balaakunoocana mafulo a mbelele shabo uko. Macolesha na kwashiya balaakunokoona mumaanda a ndabala ya Ashikeloni. Mwaami Lesa, Lesa wabo ulaakunoobalama akubalengesha kuswitilila alimwi.

⁸ Mwaami Lesa Shinkusu shoonse waamba ayi, “Ndanyumfwa matushi a bene Moabu, akunyansha kwa bene Amoni. Boonse bakalinga kutukana bantu bangu akwaamba ayi balaakubwesa cishi cabo.

⁹ Bweenka mbocibete lushinisho ayi Nebo neMwaami Lesa Shinkusu shoonse, Lesa wa bene Isilaeli ndi muumi, ntooshomesha cakulumbila ayi bene Moabu balaakuba anga mbene Sodoma abalo bene Amoni balaakuba anga mbene Gomola. Shishi shabo shilaakuba musena wa nsaku alimwi ashikanda sha mwiinyo, ee, shilaakuba shishi umo mutekaali bantu kwalyoonse alyoonse. Bantu bangu beshi bakacaaleewo, balaakusaala akubwesa shishi shabo.”

¹⁰ Munshila iyo bene Moabu abene Amoni balaakupekwa mulandu ceebo ca kulisumpula kwabo pakutukana akuweluluka bantu ba Mwaami Lesa Shinkusu shoonse.

¹¹ Mwaami Lesa ulaakubaloondesha ndyeshi akanyonyoole balesa boonse ba mucishi ca panshi. Bantu bamumishobo yoonse balaakumulambila, mushobo womwi awomwi mucishi ca nguwo.

¹² Amwebo nobene Kushi, mulaakuyaswa kumupeeni wa Mwaami Lesa munkondo.

¹³ Mwaami Lesa ulaakufungulula lyaansa lyakwe kubantu ba kumatwa akunyonyoola bene Asilya. Ulaakulengesha ndabala ya Ninife kuba litongo. Ncakwiila ilaakuyuma anga nduyanga.

¹⁴ Shifubwa shoonse shilaakupanga mulela kweenka uko, kubikaawo anyama sha muluundu. Abalo bamwiina balaakunookala mumatongo a njiyo. Balaakunoolila pambwelyo sha maanda. Bacikwangala balaakunookala kumilyango ya njiyo. Mitanti ya sida ya maanda a njiyo ilaakucaala patuba.

¹⁵ Iyi njendabala ilisumpula iyo ikala muluumuno. Yakalinga kulyaamboosha ayi, “Ncakwiila taaku ndabala ili mbuli ndime, sobwe.” Bulya yababo matongo mwakuyuba banyama ba muluundu! Abo boonse beendaamo balaakwiiseka akunooitondeka maansaabo.