Sefaniya 1 - Baibo Busansulushi Bwa Libuku Ili

¹ Mubwaami bwakwe Josiya mwaami wa cishi ca Juda, Josiya mwanaakwe Amoni, Mwaami Lesa wakatuma maswi aya kwiinda muli Sefaniya mwanaakwe Kushi, mwishikulu wakwe Gedaliya. Gedaliya ngowakashala Amaliya mwishikulu wakwe Esekiya.

Bushiku bwakoombolosha kwa Mwaami Lesa

² Mwaami Lesa wakaamba ayi, “Ndaakunyonyoola shintu shoonse sha pacishi ca panshi.

³ Ndaakunyonyoola bantu abanyama boonse, tuyuni twa mwiculu answi sha mulweenge. Lyalo bamucita shibi balaakuba ntantaala ndaakumana kulobya bantu pacishi ca panshi. Nebo neMwaami Lesa ndaamba.”

⁴ “Ndaakufungulula lyaansa lyangu mukupa mulandu bene Jelusalemu ee, mukupa mulandu bene Juda boonse. Ndaakunyonyoola boonse beshibakacaaleewo balambila Baali mumusena uyo. Ncakwiila ndaakunyonyoola abapailishi bakwe Baali boonse cakwaamba ayi kukabule ubeebaluka tubili.

⁵ Ndaakunyonyoola baabo batanta pashiluli akulambila mimuni ya mwiculu. Ndaakunyonyoola abaabo balambila akushomesha kunyumfwila ndime neMwaami Lesa, sombi pesule balumbila muliina lyakwe Moleki lesa wakubeca.

⁶ Ndaakunyonyoola baabo bacileka kukonkela ndime neMwaami Lesa ee, bantu abo batanyandooli nabi kunjipusha ayi mbalwiite nshila iluleme.”

⁷ Amuumune noonse kunembo lya Mwaami Lesa Shinkusu shoonse ceebo bushiku bwa Mwaami Lesa buli pafwaafwi. Mwaami Lesa wabamba bantu ayi babengwe anga ngumulambu, ncakwiila watamba kale abalwani babo ayi bababeenge.

⁸ Mwaami Lesa waamba ayi, “Pabushiku bwakubenga mulambu wangu Nebo neMwaami Lesa ndaakupa mulandu boonse bacinenenene, banaabaami abaabo boonse bafwete shakufwala sha baswamashi.

⁹ Pabushiku bweenka ubo ndaakunyonyoola boonse abo balambila anga mbakunsengwe ee, abo beepa akucaya kwaamba ayi basushe shintu muŋanda ya mwaami wabo ngobalambila.”

¹⁰ Mwaami Lesa waamba ayi, “Pabushiku ubo mulaakunyumfwa kulila kuMwinjililo waNswi mundabala ya Jelusalemu. Mulaakunyumfwa mibila kucipansha cipya ca ndabala inene iyo alimwi amulukutu wakuwa kuswa kutulundu.

¹¹ Ono mwaakunyumfwabo boobo mwebo nomwikala kunkunamo ya ndabala mukaliile ceebo beshimakwebo boonse balaakuloba.

¹² “Paciindi ico ndaakuyandoola muJelusalemu alilampi akupa mulandu kubaabo balibona kubota abo bali anga nguwaini wakalila panshi. Balo balayeeya ayi, ‘Mwaami Lesa taaku nceenga wacita, kucita cibotu nabi cibiibi.’

¹³ Buboni bwabo bulaakumana kusaalwa. Maandaabo alaakupwayoolwa. Ncakwiila balaakuyaka maanda sombi teshi bakekaleemo. Balaakulima minyansa, sombi teshi bakanweewo waini.”

¹⁴ Bushiku bunene bwa Mwaami Lesa buli pafwaafwi, ncakwiila bulaakwisa coonoono. Kulila pabushiku bwa Mwaami Lesa kulaakubica. Abalo bashilumamba bacibwene kulwana balaakoolobesha ceebo ca buumba.

¹⁵ Bushiku ubo bulaakuba bushiku bwa bukali, bushiku bwa mapensho amakatasho, bushiku bwakupwayoolwa akunyonyoolwa, bushiku bwa munshinshe akutabona, bushiku bwa makumbi akushiya mbi,

¹⁶ bushiku bwa mapeenga a nkondo akulila kwa bashilumamba abo beshi bakalwane mandabala acite malinga alimwi amaanda alaamfu.

¹⁷ Mwaami Lesa waamba ayi, “Ndaakuleta mapensho kubantu balaakweenda anga mboofu mukwiinga bakabisha kuli ndime neMwaami Lesa. Bulowa bwabo bulaakutilwa anga ngamaanshi alimwi mituntu yabo ilaakubola mubulongo.”

¹⁸ Silifa nabi golodi wabo teshi shikabafuneewo pabushiku ubo Mwaami Lesa ndyeshi akatondeshe bukali bwakwe. Mubukali bwakwe butenta anga ngumulilo cishi ca panshi cilaakunyonyoolwa coonse. Ulaakucinyonyoola cakufwambaana abantu boonse bekalaamo.