Osiya 8 - Baibo Busansulushi Bwa Libuku Ili

Mwaami Lesa mbwaakapa mulandu bene Isilaeli ceebo cakulambila shibumbwabumbwa

¹ Mwaami Lesa waamba ayi, “Amulishe mapeenga ankondo. Balwani besa mucishi cangu anga ngumumbankwashi ceebo bantu bangu bakapwaya cipangano alimwi baashukila milawo yangu.

² Nakubi kwaamba ayi bene Isilaeli balandilila ayi, ‘Swebo sobene Isilaeli tulimwishi mwebo noBaami baLesa. Ndushinisho swebo tuli bantu banu!’

³ Nakubi boobo bene Isilaeli bakakaka cipangano cibotu. Paceebo ceeco balwani babo balaakubatandaanya.

⁴ “Bantu bangu bakalinga kusala bamaami palwaabobo beene. Ncakwiila bakalinga kupa shuuna beendeleshi babo kwakutabasuminisha nebo. Kwiinda musilifa agolodi wabo balapangamo shibumbwabumbwa shabo isho sheshi shibaletelebo kunyonyooka.

⁵ Cibumbwabumbwa ca mucende mwaana ico cilambila bene Samaliya ndicipatite. Aboobo ndikalalite abuumbi pali mbabo. Anu citooba ciindi cilaamfu buyani bantu aba kabacilambila shibumbwabumbwa?

⁶ Cibumbwabumbwa ico ngumwine Isilaeli wakacibumba. Aboobo teshi lesa, sobwe! Cibumbwabumbwa cine Samaliya ico cilaakupwayoolwa mutupanshapansha!

⁷ “Bene Isilaeli balashanga muuwo, aboobo balaakutebula kapupuulwa. Shibuba sha maila kutaaku masanse, taaku shakulya shibaako. Ono nabi shakulya shabaako, shilalikwabo kubaswamashi.

⁸ Bene Isilaeli bamana ncito, bababo anga njimishobo imwi. Tabacite incito balibo anga nshikaye.

⁹ Aba bantu mbaashubo anga nimbongolo ya muluundu. Baya kale kubene Asilya mukusenga lucafwo, ee, balipila mishobo imwi ayi inoobatabilila.

¹⁰ Nakubi boobo ndaakubabunganya pantu pomwi akubalengesha kulyatililwa kumwaami ucite nkusu.

¹¹ Nakubi kwaamba ayi bene Isilaeli bakayaka shipaililo shiinji sha milambu yakulekelelwa shibiibi. Shipaililo isho shababo pakucitila shibiibi.

¹² Ndakabapa milawo iinji ilembetwe, sombi bakeekaka akunookwiilangabo anga ncintu ceensu.

¹³ Balabenga milambu kuli ndime akulya nyama ya njiyo. Sombi nebo neMwaami Lesa mumilambu iyo nshisangalaliliimo. Ono bulya ntokwiibaluka shibiibi shabo akubapa mulandu ceebo ca nshisho. Ndaakubaboosha kucishi ca Ijipiti.

¹⁴ Bene Isilaeli bakaluba Mulengi wabo akuliyakila maanda a bwaami. Abalo bene Juda bakayaka mandabala aanji acite malinga. Sombi ndaakutuma mulilo pamandabala abo anene uyo weshi ukanyonyoole shiyubilo shabo.”