Osiya 7 - Baibo Busansulushi Bwa Libuku Ili

¹ Na ndayanda kulengesha bantu kuswitilila alimwi, na ndayanda kushilika bene Isilaeli, shibiibi sha bene Efuleemu abo shilaletwa patuba. Ee, shibiibi sha bene Samaliya abo shilayubuluka. Bantu abo balabeca, balenjila mumaanda akwiipa, balapamba shintu mumashila.

² Sombi tabeshibi ayi micito yabo yoonse ya bubi ndiilabilite. Shibiibi shabo shilabafwekelesha alimwi lyoonse tashinswi pameenso.”

Bantu bakabukila bakuŋanda ya bwaami

³ Mwaami Lesa waamba ayi, “Bantu balabeca mwaami abwikaalo bwabo bubiibi, bacinenenene balabasangalasha kububeshi bwabo.

⁴ Boonse mbeshi kupampooka alimwi tabashomeki. Lupato lwabo lulamotabo anga ngamakalangasha a mulilo wa mucitofu, ee, ayo shikupanga shinkwa ngwaatanyanyaanshi kushikila fulaulo wakandwa akunyamuka.

⁵ Bushiku bwakusekelela bwa mwaami, bantu abo bakalengesha mwaami abacinenenene bakwe kukolwa. Mpeeke mwaami wakalinjishabo mulikoto lya baabo bakalinga kumupingite.

⁶ Myoyo ya bantu abo yakalinga kulungulabo anga ngumulilo wa mucitofu. Mashiku oonse bukali bwabo bwakalinga kufutilabo anga ngumulilo utoomota. Lyalo kumuyamaca bwakatukuka akunyaka anga ngumulilo.

⁷ “Balacaya baleli babo mubukali bwabo. Bamaami balacaikwa womwi awomwi, sombi taaku nabi womwi usenga lucafwo kuli ndime.”

Bene Isilaeli amishobo imwi

⁸ Mwaami Lesa waamba ayi, “Bene Isilaeli bali anga ngushinkwa wapya lubasu ceebo balacinka manungo mumishobo ibashingulukite.

⁹ Tabeshibi ayi kucinka manungo mumishobo iyo kwabamana nkusu. Nshiku sha buumi bwabo shitooya kumeelelesho, sombi balo taaku ancebabwene.

¹⁰ Kulisumpula kwabo kulabashinina, ono nakubi boobo balo tabasandukili kuli ndime neMwaami Lesa, Lesa wabo, nabibo kunyandoola.

¹¹ “Bene Isilaeli balibo anga nimpolobe iyo icenjeekwabo paniini alimwi itacite maano. Sunu inga baya mukusenga lucafwo kubene Ijipiti, sombi ciilo nkucicila kubene Asilya.

¹² Ono baakunooya, ndaakubateya koombe akubacatisha bweenka mupalu mbwaacatisha bayuni. Ndaakubapa mulandu ceebo ca bubi mbobakacita.

¹³ “Mapensho kuli mbabo ceebo bakapambuka kuswa munshila yangu. Kunyonyoolwa kulaakubashikila ceebo bakangashukila. Ndisunishi kubalubula, sombi balo balaamba shabubeshi pali ndime.

¹⁴ Tabapaili kuli ndime cakushinisha, sombi balaya mukulilila pamalo abo bweenka bucita bakunsengwe. Balalinengoola ceebo cakuyandabo shakulya ashakunwa bweenka bucita bakunsengwe.

¹⁵ Ndakabeeisha akubalengesha kuba ankusu, sombi balapinga kucita bubi mukundwana.

¹⁶ Bantu aba tabasandukili kuli ndime neMwaami Lesa Shinkusu shoonse. Ncakwiila kutashomeka kwabo kulibo anga nkwa buta busendeme. Ono bamatanjilili babo balaakucaikwa kunkondo ceebo ca maswi a mucobwe ngobasebensesha. Paceebo ceeco balaakusekwa abuumbi kubene Ijipiti.”