Osiya 6 - Baibo Busansulushi Bwa Libuku Ili

Bantu mbobakasanduka kuswa kushibiibi cakutashinisha

¹ Bantu batokwaamba ayi, “Atuboolele kuMwaami Lesa, watukwamoona mutupanshapansha, sombi ulaakutushilika alimwi. Ncakwiila watucisa, sombi ulaakwaanga nsalu pashilonda shesu alimwi.

² Muciindi ciniinibo ulaakutubusha, ee, munshiku shobilo nabi shotatwe ulaakutubusha kwaamba ayi tube abuumi pameenso akwe.

³ Ncakwiila atwishibe Mwaami Lesa. Atweeleshe cankusu kumwishiba. Ulaakuboneka kuli ndiswe bweenka buswa lisuba macuunsa. Ee, ulaakwisa kuli ndiswe akutupa coolwe bweenka bwisa mfula meensa, ncakwiila bweenka mbuli mfula itontosha inshi.”

⁴ Sombi Mwaami Lesa waamba ayi, “Nobene Isilaeli anobene Juda anu mwebo inga ndamucitawo buyani? Lusuno lwanu lulibo anga ngushikunku wa macuunsa, ee, anga ngumume uyo ukupuka na lumwi lwabala.

⁵ Paceebo ceeco ndakatuma balaluki bangu kwisa mukwaambilisha milandu akunyonyoolwa kwanu pakati kanu. Bupingushi bwangu bulibweneketebo patuba.

⁶ Nebo ndisunishi nkumbu, kuteshi milambu. Ndisunishi bantu beshiba ayi ndime Lesa, kwiinda milambu yakutenta.

⁷ Ono mwebo mwapwaya cipangano bweenka bwakapwaya Adamu.

⁸ Gilyadi nindabala umo muswitebo bamucita shibi, ee, iliswitebo bantu abo batila bulowa.

⁹ Ono bweenka bacayi mbobabelamina bamwi muluundu, mbweeke ubo bapailishi mbobalibunganya akucita. Abalo balacaya bamwi munshila iya kuShekemu. Ncakwiila balacita shibiibi shilensha nsoni abuumbi.

¹⁰ Nebo ndaboona cintu ciloondesha abuumbi muIsilaeli. Bantu bangu balibisha kwiinda mubufuule bwakulambila shibumbwabumbwa.

¹¹ Ono amwebo nobene Juda, ndamubambila ciindi ndyeshi mukapekwe mulandu pasheesho nshemutoocita.