Osiya 5 - Baibo Busansulushi Bwa Libuku Ili

¹ “Amunyumfwishe mwebo nobapailishi, amuteye matwi kumakani aya mwebo nobene Isilaeli, ee, mukutikishe mwebo nobaana ba kubwalo! Mulandu utoomushikila, mwalinga anga nkoose kuMisipa, ncakwiila anga nkoombe kayalwa kuKalundu ka Tabo.

² Baashu beetilila mukubisha. Ndushinisho boonse ndaakubapa mulandu.

³ Ndishishi shicita bene Efuleemu boonse, ee, bene Isilaeli tabakoonshi kunjuba nebo. Bene Efuleemu tabashomeki kuli ndime, ncakwiila bene Isilaeli abo tabasalaliteewo, sobwe.

Osiya mbwaakacenjesha pakulambila shibumbwabumbwa

⁴ “Micito yabo ilabakasha kuboola kuli ndime neLesa wabo. Muuya wa bufuule ulibacatite ca nkusu, aboobo Lesa wabo tabamwishi.

⁵ Kulisumpula kwa bene Isilaeli kutoobashinina beene. Shibiibi shabo bene Isilaeli, ee, bene Efuleemu shilabawisha, ono abalo bene Juda balawa pantu pomwi ambabo.

⁶ Baakuya mukubenga mbelele aŋombe shabo kuli ndime neMwaami Lesa, teshi bakancaneewo ceebo ndalikushaawo pakati kabo.

⁷ Bantu abo tabashomeki kuli ndime neMwaami Lesa abalo bana babo teshi baangu. Aboobo balo balaakunyonyoolwa pantu pomwi amyuunda yabo pakusekelela kwa Mweenshi Upya.

Nkondo pakati ka bene Juda abene Isilaeli

⁸ “Amulishe lupeenga lwa nkondo muGibiya. Ee, amulishe lupeenga lwa lwiica muLama Amucenjeshe bene Beti Afeni bacite ciyobeyobe ca nkondo. Amutanjile kunembo nobene Benjameni, tuye kunkondo.

⁹ Efuleemu ulaakunyonyoolwa cakubabo luyanga pabushiku bwa bukali bwakwe Lesa. Nomikowa ine Isilaeli aya ngamakani a lushinisho ngoontokwaambilisha kuli ndimwe.”

¹⁰ Mwaami Lesa waamba ayi, “Bamatanjilili ba bene Juda balibo anga mbantu balya basenya libwe lya manyinsa. Aboobo ndaakupoomweta bukali bwangu buyoosha pali mbabo.

¹¹ Bene Isilaeli batoolyatililwa, bashiya cishi ico cakalinga caabo kwakubula mwiipusho ceebo cakukakatila kucinka manungo mushibumbwabumbwa isho shitakoonshi kubacafwa.

¹² Ndaakunyonyoola bene Isilaeli bweenka muswa mboonyonyoola shakufwala. Ndaakuba anga ncipwalonda kubene Juda.

¹³ “Bene Isilaeli ndibakabona mbobakalinga kucisitwe, abalo bene Juda ndibakabona shilonda shabo, bene Isilaeli bakaya mukusenga lucafwo kumwaami wa bene Asilya. Sombi taakalinga kukonsha kubashilika nabi kushilika shilonda shabo.

¹⁴ Ndaakulwana bene Isilaeli anga ninkalamu, ee, kulwana bene Juda anga ninkalamu icite nkusu abuumbi. Ndaakubakwamoona mutupanshapansha akuya. Ndaakubanyamuna akubatola kwakubula aubafunaako.

¹⁵ Lyalo ndaakubashiya akuboolela kumusena wangu kushikila bantu bangu bakapenge cakusumina ayi balicite mulandu. Balaakunyandoola cankusu kabali mubuumba bunene.”