Osiya 4 - Baibo Busansulushi Bwa Libuku Ili

Mwaami Lesa mbwaakapa mulandu bene Isilaeli

¹ Amunyumfwe liswi lya Mwaami Lesa mwebo nobene Isilaeli mukwiinga Mwaami Lesa ulicite mulandu ngwaatoomupa mwebo nomwikala mucishi cino. Waamba ayi, “Mucishi cino taaku kushomeka, lusuno nabi lwishibo lwakwaamba ayi ndime Lesa.

² Mulibo kushingana, bubeshi alimwi abucayi, kwiipa alimwi abulale. Shibiibi shafula, kucayana kwaba ndolwiimbo.

³ Ceebo ca shintu isho cishi citoobula maanshi. Shintu shoonse shikalaamo shilaakumana kufwa. Nkokwaamba ayi banyama boonse, bayuni alimwi answi shoonse shilaakumana kufwa.”

Mwaami Lesa mbwaakapa mulandu bapailishi

⁴ Mwaami Lesa waamba ayi, “Kutabi muntu upa mulandu mubye. Ee, kubule muntu ukalalila mubye. Nebo ntootongooka ndimwe nobapailishi.

⁵ Mulawa mashiku amalumwi, abalo balaluki ngumushobo womwibo. Paceebo ceeco ntoonyonyoola nyinawanu, ee, mushobo wa Isilaeli.

⁶ Bantu bangu bamana kunyonyoolwa ceebo cakubula kwishiba ndime. Mwebo nobapailishi mwakaaka kwinshiba, aboobo ndamukaka kuba bapailishi bangu Ono ceebo cakwaamba ayi mwaluba milawo yangu anebo ndaakukaka bana banu basankwa kuba bapailishi.

⁷ “Mwebo nobapailishi ndimwakafula, akwalo kubishisha ndimwe ndikwakeendaawo kufula. Mwebo bulemu bwanu mwakabushinta acintu ciletela musebaanyo.

⁸ Mwebo mulabilila pakubisha kwa bantu bangu. Paceebo ceeco mulisuni ayi kababisha lyoonse.

⁹ Ono bweenka mbweshi nkape milandu bantu abo panshila shabo amicito yabo, mbweeke ubo amwebo nobapailishi mbweshi mukacitwe pabubi bwanu.

¹⁰ Mulaakunoolya shipansha shanu sha milambu, sombi teshi mukanookuta. Mulaakulambila balesa banshalo, sombi teshi mukanooshalaawo mukwiinga mwafutatila ndime neMwaami Lesa akukonkela balesa bamwi.”

Mwaami Lesa mbwaakatongooka kulambila balesa beensu

¹¹ Mwaami Lesa waamba ayi, “Waini upya alimwi aukulukulu utoomana bantu bangu maano akunyumfwisha shintu.

¹² Balasenga kuyubulwitwa shintu kucisamu. Lyalo kasamu kalabakumbula. Nebo banshiya anga ngumwanakashi mufuule. Ee, balyaaba kuli lesa mweensu anga ngumwanakashi mufuule.

¹³ Balabenga milambu pansonga sha tulundu akutenta tununkila kabotu patulundu tuniini munshaashisamu shilaamfu shicite matewu aanji mukwiinga shilicite shimfule shibotu. Paceebo ceeco bana banu banakashi balaya cicita bufuule abalo bamalokashi banu balaya cicita bulale.

¹⁴ Nakubi boobo teshi nkape mulandu bana banu banakashi ndibaya cicita bufuule, nabi kupa mulandu bamalokashi banu ndibaya cicita bulale mukwiinga mwebo nobeene mulaya cicita bulale akubenga milambu abafuule ba kushipaililo sha bakunsengwe. Ncakwiila bantu batacite maano balaakunyonyooka.

¹⁵ “Nakubi kwaamba ayi bene Isilaeli tabashomeki kuli ndime, bene Juda balo batakaciti mulandu wa mushobo uyo. Tabeelete kuya mukulambilila kuGilugala nabi kuBeti Afeni alimwi tamweelete kushomesha cakulumbila uko ayi, ‘Kweelana ambocibete lushinisho ayi Mwaami Lesa ngumuumi!’

¹⁶ Bene Isilaeli mbeshicimpamya anga ngumucongoshi, ino ono bantu ba mushobo uyo inga ndabasanina buyani anga mbana ba mbelele?

¹⁷ Bene Isilaeli balilyaabite kushibumbwabumbwa, ono amubaleeke beene, ndwabo!

¹⁸ Na bamana kunwa waini, balasangalala mukucita bufuule bwabo. Ncakwiila balisunishi kucita shintu shilensha nsoni kwiinda shipa bulemu.

¹⁹ Balaakubwesekwa anga ncintu catolwa akapupuulwa, milambu yabo njebabenga kubalesa bamwi ilaakubalengesha kusebaana.