Osiya 2 - Baibo Busansulushi Bwa Libuku Ili

¹ Bene Isilaelinyoko basankwa kobatumba ayi, ‘Bantu bangu’ abalo banakashi ayi, ‘Basunikwi bangu.’

Bene Isilaeli mbobatakwe kushomeka mbuli Goma

² “Nobana bangu, amukalalile banyinawanu, amubakalalile, nakubi kwaamba ayi tabacibete bakaangu alimwi nebo neMwaami Lesa nshicibete ibaabo. Mubakombelele kwaamba ayi bacileeke bufuule bwabo, ee, kucileka kutashomeka kwabo.

³ Na babule kucita boobo, ndaakubafuula akubashiyabo matakosha mbobakalinga pakushalwa. Ndaakubalengesha kuba anga nduyanga, ee, ndaakubasandula kuba anga ncishi citacite maanshi. Lyalo ndaakubacaya kunyotwa.

⁴ Amwebo nobana bangu muli baana ba mufuule, aboobo teshi nkamunyumfwilewo nkumbu.

⁵ Banyinawanu tebakalinga kushomeka alimwi bakalinga kuliletela musebaanyo. Balo bakaamba ayi, ‘Ntooya kubasunikwi bangu, abo beshi bakampe shakulya, shakunwa, shakufwala sha booya bwa mbelele, nsalu shiteshimite, mafuta a olifi alimwi awaini.’

⁶ “Paceebo ceeco nebo neMwaami Lesa ndaakushinka nshila yabo amyuumfwa. Ee, ndaakuyaka lubumbu kushinka nshila yabo.

⁷ Balaakunooya cikonkela basunikwi babo, sombi teshi bakabeensheewo. Balaakunooya cibayandoola, sombi teshi bakabacaneewo. Lyalo balaakwaamba ayi, ‘Ntooboolela kubeebaangu bataanshi ceebo kuli mbabo ndakalingako kabotu kwiinda mboombete bulya.’

⁸ “Tabakwe kwishiba kwaamba ayi ndime ndakabapa shili anga ngamaila, waini amafuta a olifi. Ncakwiila ndime ndakabapa silifa agolodi isho nshaakalinga kusebensesha kulambila Baali.

⁹ Aboobo ndaakubanyaya shili anga ngamaila shaakupya. Ndaakubanyaya waini pakutyana minyansa. Ndaakubanyaya shakufwala sha booya bwa mbelele ansaalu shiteshimite isho nshendakabapa ayi kabafwala.

¹⁰ Ndushinisho ndaakubafuula pameenso abasunikwi babo alimwi taaku weshi akakonshe kubafuna kuswa mumaansaangu.

¹¹ Ndaakumanisha kusekelela kwabo koonse. Nkokwaamba ayi, kusekelela kwa pamwaaka, kusekelela kwa Myeenshi ipya, nshiku shakookesha sha Cibelu, ee, kusekelela kwabo koonse.

¹² Ndaakunyonyoola minyansa yabo ashisamu shabo sha nkuyu isho nshebakalinga kwaamba ayi ncilambu cabo kuswa kubasunikwi babo. Ndaakusandula myuunda yabo ya minyansa aya shisamu sha shisepo shimwi kuba luundu lushinkite alimwi banyama bamuluundu balaakwiinyonyoola.

¹³ Ndaakubapa mulandu ceebo ca shiindi nshebakatentela Baali tununkila kabotu. Bakalifwalika ninga abulungu bwamakwebo akuya cikonkela basunikwi babo, sombi nebo bakandubaako. Nebo neMwaami Lesa ndaamba.

Lusuno lwa Mwaami Lesa pabantu bakwe

¹⁴ “Paceebo ceeco ndaakubatola muluyanga alimwi. Umo ndaakubanyengelela amaswi abotu a lusuno kwaamba ayi mbabooshe kumubili.

¹⁵ Lyalo uko ndaakubabooshesha myuunda yabo ya minyansa alimwi ndaakulengesha Cinyika ca Ako kuba mulyango wakulangila. Muluyanga umo balaakutalika kunkonkela bweenka mbobakalinga kucita kale kale, ee, ndibakaswabo mucishi ca Ijipiti.

¹⁶ “Paciindi ico balaakunoonjita ayi beebaangu, teshi bakanjitewo tubili ayi baBaali bangu. Nebo neMwaami Lesa ndaamba.

¹⁷ Ndaakukusha liina lya Baali mumilomo yabo. Teshi bakasebenseshewo tubili meena abo pakupaila.

¹⁸ Pabushiku ubo ndaakupanga cipangano abanyama bamuluundu, bayuni alimwi atulongolo toonse kwaamba ayi batakacisi tubili bantu bangu. Ndaakumanisha mata amipeeni, ee, kumanisha nkondo mucishi canu coonse. Ncakwiila ndaakulengesha bantu bangu kwikala muluumuno alimwi kwakubula cakulisukama.

¹⁹ “Webo Isilaeli, ndaakukulengesha kuba mukaangu walyoonse alyoonse. Ndaakucita boobo mubululami alimwi cakushomeka. Ndaakunookutondesha lusuno akukunyumfwila nkumbu.

²⁰ Ndaakukweeba mukushomeka alimwi ulaakusumina ayi ndime Mwaami Lesa.

²¹ “Pabushiku ubo ndaakukumbula kupaila kwako. Ndaakulengesha mfula kuloka pacishi ca panshi.

²² Cishi ca panshi cilaakukusha shili anga ngamaila, waini upya alimwi amafuta a olifi. Shintu shoonse ishi shilaakuboneka muJesiliilu.

²³ Isilaeli ndaakumushanga mucishi kwaamba ayi akabe waangu. Ndushinisho ndaakutondesha lusuno kubaabo bakalinga kwaambwa ayi, ‘Bateshi basunikwi bangu.’ Ndaakwaambila baabo bakalinga kwaambwa ayi, ‘Bateshi bantu bangu’ ayi, ‘Mwebo muli bantu bangu,’ abalo balaakukumbula ayi, ‘Muli baLesa besu.’ ”