Osiya 13 - Baibo Busansulushi Bwa Libuku Ili

Koombolosha kwakweelaako kwa bene Isilaeli

¹ Kalekale na bene Efuleemu baamba, bamumikowa imwi ya bene Isilaeli bakalinga kuloonda. Ncakwiila bene Efuleemu bakalinga kulemekwa pakati ka bene Isilaeli, sombi bakabisha kwiinda mukulambila Baali. Aboobo balaakumana kufwa.

² Ono batolelela kubisha kwiinda mukulipangila shibumbwabumbwa sha silifa. Shibumbwabumbwa isho shakabumbwa cabusongo alimwi shoonse shakabumbwa abacishi shakupangapanga. Bantu abo balaambwa ayi, “Balabenga bantu ayi njimilambu akunoofyonta shibumbwabumbwa sha bacende baana.”

³ Paceebo ceeco balaakuba anga ngushikunku wa macuunsa, ee, anga ngumume uyo upalangana na lwabala. Ncakwiila balaakuba anga mbuungu butolwa amuuwo kulubansa lwakulupwitaawo nabi anga mbwiishi butooswita pambwelyo.

⁴ Mwaami Lesa waamba ayi, “Nebo ndime neMwaami Lesa, Lesa wanu nendakamukusha mucishi ca Ijipiti. Tamweelete kwishiba balesa bamwi kuleka ndime. Nebo neenka ndime Mupulushi wanu.

⁵ Ndakamulama kabotu muluyanga, ee, mulya mucishi muli lumwi luyoosha.

⁶ Ndindakamusanina mucishi cibotu mwakalinga kukuta. Ono ingayi mutalike kukuta mwakalisumpula. Lyalo nebo mwakandubaako.

⁷ Aboobo ndaakumulwana anga ninkalamu. Ndaakumuyubilila munshaanshila anga ngushiluwe.

⁸ Ndaakumulwana anga ngubeya utoolangoola mwanaakwe. Ndaakumukwamoona. Ndaakumunyonyoola mpomunyaawo anga ninkalamu itoolya munyama. Ncakwiila ndaakumukwamoona anga ngumunyama wa muluundu.

⁹ “Nobene Isilaeli, ndaakumunyonyoola ceebo mwabukila ndime neemucafwa.

¹⁰ Mwakasenga mwaami alimwi abacinenenene. Ono mwaami wanu kwaamba ayi amupulushe uli kuli? Bacinenenene banu mumandabala anu oonse bali kuli?

¹¹ Mubukali bwangu ndakamupa mwaami alimwi mubukali bwangu buyoosha ndakamukushaawo.

¹² “Shibiibi ashilubo sha bene Isilaeli shililembetwe alimwi moshilembetwe mulibikitwe pateendi koswe.

¹³ Bene Isilaeli balicite ciindi cakunoocili boomi, sombi tabacite maano akusebensesha ciindi ico. Bali anga ngumwaana weelete kushalwa, sombi taacite maano akuswa mulifumo lya banyina.

¹⁴ “Ndaakubapulusha kuswa kunkusu sha musena wa bafu. Ndaakubalubula kuswa munkusu sha lufu. Myaalu yako olufu ili kuli? Kunyonyoola kwako omusena wa bafu kuli kuli? “Teshi nkabeewo ankuumbu pabantu aba.

¹⁵ Ono nabi bene Isilaeli bakanooswitilila pakati ka bamakwabo bamwi, ndaakutuma muuwo ulungula kuswa kuluyanga. Muuwo uyo ulaakuyumya tuntupu alimwi amikalo yabo. Muuwo uyo ulaakunyonyoola shintu shoonse shamakwebo mushipinda shabo shakusungilamo buboni.

¹⁶ Cishi ca Samaliya cilyeelete kupekwa mulandu ceebo cakwaashukila ndime neLesa wabo. Bantu ba ncico balaakufwita munkondo. Bakateta balaakupwaikwa panshi banakashi beshi bakanoomitite balaakupasulwa mafumo.”