Osiya 12 - Baibo Busansulushi Bwa Libuku Ili

¹ Bene Isilaeli balatandaanya muuwo ee, batandaanya muuwo uswa kwicwe bushiku boonse. Bubeshi ashalunkutwe shilacanwabo pali poonse. Balapanga shipangano abene Asilya akutuma mafuta a olifi kucishi ca Ijipiti.”

² Mwaami Lesa ulicite mulandu wakupa bene Juda. Ulaakupa mulandu bamulunyungu lwakwe Jakobo kweelana amicito yabo. Ulaakubabooshela cishole ceebo ca shintu isho nshebacita.

³ Jakobo wakalwana aEsau kabacili mulifumo alimwi ndyaakakula wakalwana aLesa.

⁴ Wakalwana amunjelo akumukoma. Wakalila akusenga ayi amupe coolwe. KuBetelo Lesa wakesa kumushali wesu mukulukulu akubandikaakwe kweenka uko.

⁵ Lesa uyo wakalinga Mwaami Lesa Shinkusu shoonse! Mwaami Lesa ndyeliina bantu ndyebeelete kumulambililaamo.

⁶ Paceebo ceeco nobamulunyungu lwakwe Jakobo mulyeelete kuboolela kuli Lesa wanu. Amube bantu bashomeka kuli nguwe, baluleme alimwi mulindile lucafwo kuswa kuli Lesa wanu cakukalika myoyo lyoonsebo.

Maswi amwi akoombolosha

⁷ Mwaami Lesa waamba ayi, “Bene Isilaeli tabashomeki bweenka mbuli bene Kenani. Balisunishi kunyengelela bamwi mukusebensesha shakupimisha shabubeshi.

⁸ Balaamba ayi, ‘Twabiila abuumbi. Twaba abuboni buunji abuumbi alimwi taaku weenga watwaambila ayi twabilila mukutashomeka.’

⁹ Ndime Mwaami Lesa, Lesa wanu uyo wakamukusha mucishi ca Ijipiti. Ndaakumulengesha kwikala mumatente alimwi bweenka mbomwakalinga kucita ndindakesa kuli ndimwe muluyanga.

¹⁰ “Ndakabandika abalaluki akubapa shili anga nshiloto shiinji. Kwiinda muli mbabo, ndakalinga kumucenjesha nobantu bangu.

¹¹ Nakubi boobo shibumbwabumbwa shilalambilwa muGilyadi. Abo bashilambila balaakunyonyoolwa. Ndushinisho bacende balabengwa muGilugala. Shipaililo uko shilaakuba milwi ya mabwe mweela lya myuunda.

¹² Jakobo wakacicila kucishi ca Silya. Isilaeli wakasebensa kwaamba ayi eebe mukaakwe. Ee, kwaamba ayi amulipilile, wakeembela mbelele.

¹³ Nebo neMwaami Lesa ndakatuma mulaluki kwaamba ayi akushe bene Isilaeli kuswa muIjipiti. Ndakabeembela kwiinda mumulaluki uyo.

¹⁴ Bene Isilaeli bakalengesha Mwaami Lesa kukalala abuumbi. Balyeelete kufwa ceebo ca shibiibi shabo. Mwaami Lesa ulaakubapa mulandu ceebo ca musebaanyo uyo ngobakamuletela.”