Obadiya 1 - Baibo Busansulushi Bwa Libuku Ili

Mwaami Lesa ulaakupa mulandu bene Edomu

¹ Ishi nshesheeshi Mwaami Lesa nshaakayubulwita Obadiya anga muciloto. Makani aya atokwaamba pabene Edomu. Mwaami Lesa wakatuma shikwiimikaninaako kumishobo imwi yoonse alimwi twakanyumfwa makani akwe akwaamba ayi, “Amulibambile! Tiya tukalwaane abene Edomu.”

² Mwaami Lesa utokwaambila bene Edomu ayi, “Ncakwiila ndaakumulengesha kuceya pamishobo yoonse. Bantu boonse balaakumunyansha.

³ Kulisumpula kwa myoyo yanu kwamubeca. Mukwiinga mulekala mulilinga lya myaandami, alimwi ŋanda yanu ili peculu, mulaamba mumyoyo yanu ayi, ‘Ngani weenga watuboosha panshi?’

⁴ Nabi muuluke akuya mwiculu abuumbi anga ngumumbankwashi, akuyakila ŋanda yanu pakati ka nyenyeenshi, nebo ndaakumuboosha panshi. Nebo neMwaami Lesa ndaamba.”

⁵ “Ono na beepi bamupolela mashiku, balabwesabo nshebasuni. Bantu ndibayapa minyansa, balashiyaako iniini. Ono mwebo balwani banu bamumaninabo limwi.

⁶ Sombi mwebo nobamulunyungu lwakwe Esau, bubile bwanu bwakalinga kushisitwe babusaala!

⁷ Babyaanu bamucenjeeka, akumutanda mucishi canu. Abo mbomwakalinga kunyumfwanaabo bamubukila akumukoma. Mbomunya mbomwakalinga kulyaabo, bamuteya koose. Mwebo akwishibawobo napaceyi.”

⁸ Mwaami Lesa utokwaamba ayi, “Pabushiku ubo, ndaakunyonyoola basongo ba muEdomu, bantu abo bacite lushibo ba mumalundu a Esau.

⁹ Bashilumamba banu ba mucishi ca Temani balaakuloonda abuumbi, abantu boonse ba mumalundu a Esau balaakucaikwa.

Bene Edomu nceshi bakapetwe mulandu

¹⁰ “Ceebo ca shimfulunganya nshemwakacita kubamakwabanu bamulunyungu lwakwe Jakobo, mulaakulenshekwa nsoni, alimwi mulaakunyonywetwabo limwi.

¹¹ Pabushiku ubo mwakeenkemanabo palubasu akuleka balwani babo kabababwesela bubile. Baswamashi abo ndyebakenjila muminjililo yabo akunokuuma cisolo ayi babaane Jelusalemu. Amwebo mwakeelanabo ambabo kubica.

¹² Temwakalinga kweelete kukondwa ceebo ca mapensho abamakwabanu bene Juda, nabi kusangalala pabushiku ndibakalinga kunyonyoolwa, nabi kulisumpula ceebo cakuungumana kwabo.

¹³ Temwakalinga kweelete kwinjila mundabala inene ya bantu bangu pabushiku bwa mapensho abo, nabi kusangalalila mumakatasho abo, pabushiku bwa mapensho abo nabi kubanyaya bubile bwabo pabushiku bwa mapensho abo.

¹⁴ Anu temwakalinga kweeletewo kwiimikana pamampambaanwa anshila ayi munoocata baabo bakalinga kuloboka. Abalo abo bakalinga kupuluka, temwakalinga kweelete kubaboosha kubalwani babo, pabushiku ubo ndibakalinga kuungumene.

Mwaami Lesa ulaakoombolosha mishobo yoonse

¹⁵ “Bushiku buli pafwaafwi ubo nebo neMwaami Lesa, mbweshi nkoomboloshe mishobo yoonse. Sheenka nshemwakacita kubamwi nobene Edomu, ntoomulwiita ayi shilaakucitika akuli ndimwe. Micito yanu ibiibi ilaakumuboolela.

¹⁶ Bweenka mbuli mbomwakanwa munkomeshi ya bukali pakalundu kangu kasalalite, mbweeke ubo mishobo yoonse imushingulukite ilaakunoonwaamobo. Balaakunoocitekobo kunwa tibili bakanyonyooke cakutacaalaako.”

Kukoma kwa bene Isilaeli

¹⁷ Mwaami Lesa waamba ayi, “Sombi pakalundu ka Siyoni, bamwi balaakupulushikwa. Kalaakuba musena usalalite. Bamulunyungu lwakwe Jakobo balaakuboola mucishi ico cakabalasha Lesa.

¹⁸ Bamulunyungu lwakwe Jakobo balaakuba mulilo, abamulunyungu lwakwe Josefu balaakunoonyaka. Bamulunyungu lwakwe Esau balaakuba mabuba, mpeeke balaakubatenta akubalobya. Taaku weshi akapuluke mulunyungu lwakwe Esau.”

¹⁹ “Bantu ba kumalenge a cishi ca Juda, balaakwikala mumalundu a Esau, alimwi abo baswa mutulundu tuniini, balaakubwesa cishi ca Filisiti. Balaakwikala mucishi ca Efuleemu aSamaliya, Benjameni ulaakubwesa cishi ca Gilyadi.

²⁰ Likoto lya bene Isilaeli bakaloboka, abo bali muKenani, balaakubwesa cishi kweela kuSalefati. Bakaloboka kuswa muJelusalemu, abo bali muSefaladi, balaakubwesa mandabala a bakuNegefu.

²¹ Beshikupulusha balaakutanta pakalundu ka Siyoni ayi bakeendeleshe bamumalundu a Esau. Mpeeke Mwaami Lesa mwiine ulaakuba Mwaami wabo.”