Neyemiya 9 - Baibo Busansulushi Bwa Libuku Ili

Bene Isilaeli mbobakalyaambilila shibiibi shabo

¹ Pabushiku bwamakumi obilo anshiiku shone mumweenshi weenka uyo, bene Isilaeli bakabungana akulikasha kulya, kabafwete masaka akulibika lusuko pamitwi kutondesha buumba.

² Bamulunyungu lwa bene Isilaeli bakalipatula kuswa kubaswamashi. Mpeeke bakeemikana akulyaambilila shibiibi shabo abubi bwa bamashali babo bakulukulu.

³ Bakeemikana mpomunya mpobakalinga kwamaawala ali otatwe Libuku lya Milawo yakwe Lesa, Lesa wabo kalibelengwa kuli mbabo. Maawala amwi otatwe akakonkela, bakalinga kulyaambilila shibiibi shabo akulambila Mwaami Lesa, Lesa wabo.

⁴ Bene Lefi bakatanta pacintu cakwiimikanaawo akupaila cakoolobesha kuMwaami Lesa, Lesa wabo. Meena a bene Lefi abo ngaaya: Jeshuwa, Bani, Kadimyelo, Shebaniya, Buni, Shelebiya, Bani alimwi aKenani.

⁵ Bene Lefi nkokwaamba ayi Jeshuwa, Kadimyelo, Bani, Ashabineiya, Shelebiya, Odiya, Shebaniya alimwi aPetayiya bakaambila bantu ayi, “Amunyamuke mulumbaishe Mwaami Lesa, Lesa wanu. Amumulumbaishe kwalyoonse alyoonse. Bantu boonse abalumbaishe liina lyakwe lyabulemu, nakubi kwaamba ayi muntu taakoonshi kulilumbaisha cakulishishaawo.”

Mupailo wakulyaambilila shibiibi

⁶ Lyalo bene Isilaeli bakapaila ayi, “Mwebo noBaami baLesa, mwebo nweenka ndimwe Baami baLesa. Ndimwe mwakalenga liculu alimwi anyenyeenshi sha mwiculu. Ndimwe mwakalenga cishi ca panshi, lweenge ashoonse shiliimo. Ndimwe mupa buumi kushintu shoonse. Abaanjelo boonse balamulambila.

⁷ “Mwebo noBaami baLesa, mwakasala Abulamu akumukusha kuUli mucishi ca bene Babiloni. Mwakasandula liina lyakwe kunookwiitwa ayi Abulaamu.

⁸ Mwakacana kwaamba ayi moyo wakwe wakalinga kushomeka kuli ndimwe akupanga cipangano anguwe. Mwakashomesha kupa bamulunyungu lwakwe cishi ca bene Kenani, bene Iti, bene Amoli, bene Pelisi, bene Jebusi alimwi abene Gegashi. kwaamba ayi cibe cishi cabo. Mwakacita kweelana acipangano canu ceebo mulashomeka.

⁹ “Mwakabona mapensho a bamashali besu bakulukulu muIjipiti. Mwakanyumfwa kulila kwabo kuLweenge Lusalala.

¹⁰ Mwakacita shaankamiko kuli Falawo mwaami wa bene Ijipiti, bacinenenene bakwe akubantu ba mucishi cakwe coonse ceebo mwakalinga kwishi mbuli mbobakalinga kulyatilila bantu banu. Aboobo liina lyanu lyakaya mpuwo bweenka mbuli mboliyiite asunu.

¹¹ Mwakapansaanya lweenge kunembo lyabo kwaamba ayi beende akusubukila payumu. Sombi abo bakalinga kubakonkela mwakabalobya mumaanshi alaamfu bweenka libwe mbolipila mulweenge lulaamfu.

¹² Malumwi mwakalinga kubatanjilila alikumbi, mashiku mwakalinga kubamunikila munshila amulilo.

¹³ KuKalundu ka Sinayi mwakaseluka kuswa kwiculu akwaamba abantu banu. Mwakabapa milawo ibotu akwiisha kululeme.

¹⁴ Mwakabeeisha kusalasha bushiku bwakookesha bwa Cibelu. Kwiinda mumusebenshi wanu Mose mwakabapa milawo amilasho yanu.

¹⁵ “Ndibakafwa nsala mwakabapa cakulya kuswa kwiculu. Ndibakafwa nyotwa mwakabapa maanshi kuswa mumwaandami. Mwakabaambila ayi baye mukubwesa cishi ico ncemwakabashomesha kubapa.

¹⁶ Sombi balo bamashali besu bakulukulu bakalisumpula akuba beshicimpamya. Bakakaka kunyumfwila milawo yanu.

¹⁷ Bakakaka kunyumfwila alimwi bakaluba shintu shoonse nshemwakacita. Bakaluba shaankamiko isho nshemwakabacitila. Mukulisumpula kwabo bakasala mutanjilili kwaamba ayi ababooshe mubusha mucishi ca Ijipiti. Sombi mwebo muli baLesa balekelela shibiibi, bacite luse alusuno alimwi batafwambaani kukalala. Nkuumbu shanu shilakankamika, aboobo tamukwe kubafutatilaawo, sobwe.

¹⁸ Bakalibumbila cibumbwabumbwa ca mucende mwaana akwaamba ayi, ‘Uyu ngoLesa wanu wakamukusha mucishi ca Ijipiti.’ Mukucita boobo bakamucobola abuumbi noBaami baLesa!

¹⁹ Sombi tamukwe kubafutatila muluyanga umo ceebo nkumbu shanu shilakankamika abuumbi. Likumbi talikwe kucileka kubatanjilila munshila yabo malumwi nabi mulilo mashiku kucileka kumunikila nshila njebeelete kutola.

²⁰ Mwakabapa Mushimu wanu ubotu ayi unoobeeisha shakucita. Mwakabapa mana ayi balye akubapa maanshi ayi banwe.

²¹ Mwakabalama muluyanga kwamyaaka makumi one. Taakuuwo ancebakalinga kulila. Shakufwala shabo tashikwe kukwamookaawo alimwi myeendo yabo taikwe kushimbaawo.

²² “Mwakabapa malelo amishobo, ee, mishobo iyo njebakalinga kubaanaayo manyinsa. Bakabwesa cishi cakwe Sioni mwaami wa kuEshiboni alimwi acakwe Ogi mwaami wa kuBashani.

²³ Mwakalengesha baana babo kufula anga ninyenyeenshi mwiculu alimwi mwakabalengesha kukoma cishi ico ncemwakashomesha kupa bamashali babo bakulukulu.

²⁴ Mwakabalengesha kukoma cishi ca Kenani. Ee, mwakakoma bene Kenani abo bakalinga kwikalaamo. Mwakapa bantu banu nkusu shakucita mbuli mbobasuni kubantu bene Kenani pantu pomwi abamaami babo.

²⁵ Bantu banu bakakoma mandabala acite malinga acishi cicite bulongo bubotu. Bakabwesa maanda ayo akalinga kuswite buboni, mikalo yakakabilwa limwi, shisamu sha maolifi, shisamu shicata shisepo shimwi amyuunda ya minyansa. Bakalinga kulya cili coonse ncebasuni akwiina abuumbi. Bakasangalala abuumbi mushintu shibotu nshemwakabapa.

²⁶ “Nakubi boobo bakamubukila akukaka kumunyumfwila. Bakafutatila Milawo yanu. Bakacaya balaluki banu abo bakalinga kubacenjesha akubalwiita shakusandukila kuli ndimwe. Bakalinga kumucobola ciindi aciindi.

²⁷ Paceebo ceeco mwakabaaba mumaansa a balwani babo abo bakalinga kubalyatilila. Sombi ndibakamulilila mumapensho abo, mwakabakumbula kuswa kwiculu uko nkomubete. Munkumbu shanu mwakabatumina bamatanjilili abo bakabafuna kuswa mumaansa a balwani babo.

²⁸ Sombi na baboola muluumuno, bakalinga kubisha alimwi. Lyalo mwakalinga kubaaba mumaansa a balwani babo alimwi. Sombi na basanduka akusenga ayi mubafuune, mwakalinga kunyumfwa kwiculu uko ciindi aciindi akubafuna kwiinda munkumbu shanu shikankamika.

²⁹ Mwakabacenjesha kunyumfwila kwiisha kwanu, sombi balo bakalisumpula akukaka kukonkela milawo yanu nakubi kwaamba ayi Milawo yanu ilapa buumi kumuntu na weekonkela. Ceebo ca bushicimpamya bwabo bakaka kumunyumfwila.

³⁰ Kwamyaaka iinji mwakalinga kukomenyabo caamba pali mbabo. Mwakalinga kubacenjesha aMushimu wanu kwiinda mubalaluki banu. Sombi balo tebakalinga kumunyumfwila, sobwe. Aboobo mwakabaaba mumaansa a balwani babo.

³¹ Ceebo ca nkumbu shanu shikankamika, tamukwe kubanyonyoola nabi kubafutatila. Mwebo muli baLesa beshiluse alimwi beshinkumbu.

³² “Ono nobaLesa besu, ncakwiila muli baLesa beshinkusu, mulalemekwa alimwi mulakankamika abuumbi! Mulacita kweelana acipangano canu ca lusuno. Twapeenga abuumbi kuswa kuciindi bamaami ba bene Asilya ndibakatulyatila kushikila asunu. Bamaami besu, bamatanjilili, bapailishi, balaluki, bamashali besu bakulukulu abantu besu bamwi boonse bapenga abuumbi. Ono amwiibaluke mbotwakapenshekwa!

³³ Mwebo muliluleme mukutupa mulandu wa mushobo uyo. Mwakalinga kushomeka, nabi swebo twakalinga kumubishisha.

³⁴ Bamaami besu, bamatanjilili, bapailishi abamashali besu bakulukulu tabakwe kukonkela Milawo yanu. Ncakwiila tabakwe kunyumfwila milasho yanu nabi kunyumfwa kucenjesha kwanu.

³⁵ Mwakalinga kubapa coolwe mubulelo bwabo ee, ndibakalinga kwikala mucishi cinene cicite bulongo bubotu ico ncemwakabapa, sombi bakaalilwa kusanduka kuswa kushibiibi shabo akumusebensela.

³⁶ Ono amubone sunu tuli basha mucishi ico ncemwakapa bamashali besu bakulukulu cishi ico cicite bulongo bubotu umo mweelete kuswa shakulya shesu.

³⁷ Ceebo ca shibiibi shesu, shoonse shitebulwa shilaya kubamaami mbomwakaleta ayi batweendeleshe. Balacita mbuli mbobasuni kuli ndiswe ashifubwa shesu. Ndushinisho tuli mumapensho anene abuumbi!

Bantu mbobakapanga cipangano

³⁸ “Ono ceebo ca sheeshi, tutoopanga cipangano ceelete kukonkelwa cakushomeka. Tutoocilemba abalo bamatanjilili besu, bene Lefi abapailishi batoobikawo kalamatila wa twishibilo twabo.”