Neyemiya 8 - Baibo Busansulushi Bwa Libuku Ili

Esila mbwaakabelengela bantu milawo

¹ Ono mumweenshi wasanu ayobilo bene Isilaeli boonse bakakalikana mumandabalaabo. Bantu boonse bakabungana pabushiku butaanshi bwa mweenshi uyo mulubansa luli pafwaafwi aMwinjililo wa Maanshi. Bakaambila Esila mufundishi wa Milawo ayi alete libuku mulembetwe Milawo yakwe Mose iyo Mwaami Lesa njaakapa bene Isilaeli.

² Lyalo Esila mupailishi wakaleta Libuku lya Milawo pameenso a bantu. Libungano ili lyakalinga lya basankwa, banakashi abanike boonse abo bakonsha kunyumfwa.

³ Mpeeke wakababelengela kuswa macuunsacuunsa kushikila lisuba ndilyakashika pakati ka mutwi palubansa ulo luli pafwaafwi aMwinjililo wa Maanshi. Bantu bakalinga kukutika cakubikaako maano.

⁴ Esila mufundishi wa Milawo wakatanta pacintu cakwiimikanaawo pakwaamba ca shisamu ico ncebakapangila mubala uyo. Kulubasu lwakwe lwalulyo kwakeemikana Matitiya, Shema, Anaya, Uliya, Ilikiya alimwi aMaseiya. Kulubasu lwakwe lwa cipiko kwakeemikana Pedaya, Mishaelo, Malukija, Ashumu, Ashibadana, Sekaliya alimwi aMeshulamu.

⁵ Esila wakacalula Libuku. Bantu boonse bakalinga kumubwene ceebo wakalinga pacintu cakwiimikanaawo. Ndyaakacalulabo libuku, bantu boonse bakeemikana.

⁶ Mpomunyaawo Esila wakaamba ayi, “Aalumbaishikwe Mwaami Lesa, Lesa munene!” Lyalo bantu boonse bakanyamuna maansaabo akukumbula ayi, “Ameni! Ameni!” Mpeeke bakafukama akulambila Mwaami Lesa cakushisha shiwa panshi.

⁷ Kuswawaawo bantu bakanyamuka akwiimikana mumisena yabo. Lyalo bene Lefi, nkokwaamba ayi Jeshuwa, Bani, Shelebiya, Jamini, Akubu, Shabetayi, Odiya, Maseiya, Kelita, Asaliya, Josabadi, Anani aPelaya bakalinga kubasansulwita Milawo.

⁸ Bakasansulula Milawo yakwe Lesa. Bakeesansulula kabotu kabotu cakwaamba ayi banyumfwishe isho shakalinga kubelengwa.

⁹ Kuswawaawo Neyemiya mweendeleshi, Esila mupailishi alimwi mufundishi wa Milawo abene Lefi abo bakalinga kusansulwita bantu, boonse bakaambila bantu abo ayi, “Bushiku bwasunu mbushiku busalalite bwa Mwaami Lesa, Lesa wanu. Aboobo tamweelete kulila bumpute nabi kulila cakoolobesha.” Bakabaambila boobo ceebo bakalinga kulila ndibakanyumfwa shakalinga kubelengwa muMilawo.

¹⁰ Lyalo Neyemiya wakabaambila ayi, “Kamuya mukalye shakulya shibotu, akunwa shakunwa shamise. Mutumineko shimwi kuli babo batacite shibambitwe kale. Bushiku bwasunu mbushiku busalalite kuMwaami Lesa. Mutoongumani ceebo kusangalala uko kumupa Mwaami Lesa, nkokumupa nkusu.”

¹¹ Bene Lefi bakoomusha bantu boonse ayi, “Amuumune, ceebo bushiku bwasunu mbushiku busalalite. Mutoongumani, sobwe.”

¹² Mpomunyaawo bantu boonse bakaya mukulya akunwa akwaabilaako bamwi. Bakasekelela kabasangalete abuumbi mukwiinga maswi ayo ngobakabelengelwa bakaanyumfwisha.

Kusekelela kwa Shimpaka

¹³ Ono pabushiku bwabili mumweenshi uyo bamatanjilili ba bamumaandaabo, bapailishi alimwi abene Lefi bakabungana kuli Esila kwaamba ayi abeeishe maswi ali muMilawo.

¹⁴ Mumulawo wakapa Mwaami Lesa kwiinda muli Mose bakacana kamulembetwe ayi bene Isilaeli balyeelete kwikala mushimpaka ciindi cakusekelela kwa mweenshi wasanu ayobilo.

¹⁵ Aboobo bakabapa milasho akutuma nkombe kumandabala abo oonse alimwi akuJelusalemu yakwaamba ayi, “Amuye kutulundu mukalete misampi ya shisamu sha maolifi akushanga, maolifi a muluundu, mushikili, tupukupuku aya shisamu shicite shimfule shibotu, kwaamba ayi muyakishe shimpaka kweelana ambocilembetwe muMilawo.”

¹⁶ Mpomunyaawo bantu bakaya mukuleta misampi akwisa mukuyaka shimpaka peculu lya maandaabo, mumansa shabo, mulubansa lwa Ŋanda yakwe Lesa, mulubansa lwa kuMwinjililo wa Maanshi alwa kuMwinjililo wa Efuleemu.

¹⁷ Likoto lya baabo boonse bakaswa mushishi sha busha lyakayaka shimpaka akutalika kwikala mumo. Kuswa munshiku shakwe Joshuwa mwanaakwe Nani kushika bushiku ubo, bene Isilaeli tabana kusekelelawo kale ca mushobo uyu. Aboobo bushiku ubo boonse bakasangalala abuumbi.

¹⁸ Bushiku abushiku bwa kusekelela uko, nkokwaamba ayi kuswa pabushiku butaanshi kushikila kubwakweelaako, Esila wakalinga kubelenga muLibuku lya Milawo yakwe Lesa. Bakasekelela kwanshiku shosanwe ashobilo. Lyalo pabushiku bwasanu ashotatwe bakaba alibungano lyakucala kusekelela uko kweelana aMilawo.