Neyemiya 6 - Baibo Busansulushi Bwa Libuku Ili

Sanibalati ababye mbobakeelesha kukasha mulimo

¹ Ono Sanibalati, Tobiya, Geshemu mwine Alabu abalwani besu boonse bakanyumfwa ayi twamanisha kuyakulula lubumbu, alimwi ayi taaku musena wakacaala koomwayulukite muli ndulo. Nakubi boobo paciindi ico katutana kubika ashisasa kuminjililo.

² Ndibakanyumfwa boobo Sanibalati aGeshemu bakantumina nkombe yakwaamba ayi, “Kwesa, tukumane kumushi umwi uli muCinyika ca Ono.” Iyi yakalinga ninshila yakwaamba ayi bancisileemo.

³ Lyalo ndakabatumina beshinkombe mukubaambila ayi, “Ndicite mulimo unene abuumbi cakwaamba ayi nshikoonshi kwisa kooko. Nshikoonshi kwiimika mulimo uyu paceebo cakwisa mukubona ndimwe.”

⁴ Bakantumina nkombe iyo kwamankanda ali one, anebo ndakalinga kubakumbulabo mushobo womwi mumankanda oonse ayo.

⁵ Lyalo Sanibalati wakantumina nkombe yomwi linkanda lyasanu. Wakatuma musebenshi wakwe kaacite ankalata mulyaansa lyakwe italamatikitwe

⁶ umo mwakalinga kulembetwe ayi, “Canyumfwika pakati ka mishobo, alakwe Geshemu wakaamba ayi webo abaJudanyoko mutooyeeya kubukila mwaami wa kuPesha. Anu nceceeco ncootooyakulwita lubumbu. Twanyuumfwa alimwi ayi ndiwe utooyanda kuba mwaami wabo

⁷ alimwi wakasala balaluki kwaamba ayi bakwaambilishe kubene Jelusalemu ayi ndiwe mwaami wa cishi ca Juda. Cikani ico cilaakunyumfwika kumwaami wa kuPesha, anu use tubandikile pantu pomwi.”

⁸ Ndakamukumbula ayi, “Makani ngowaamba taapo. Wabumbabo akubumba omwiine.”

⁹ Anu bakalinga kweelesha kutukonga ayi tucileeke mulimo wesu. Sombi ndakapaila ayi, “Ono nobaLesa, amumpe nkusu.”

¹⁰ Lyalo bushiku bumwi ndakaya kuŋanda yakwe Shemaya mwanaakwe Delaya, mwishikulu wakwe Meetabelo uyo utakwe kukonsha kuswa muŋanda yakwe. Nakubi boobo lakwe wakandwiita ayi, “Webo anebo tulyeelete kuya mukuyuba soonse muŊanda yakwe Lesa, tulicalile ceebo bantu batoosa mukukucaya. Ncakwiila mashiku batoosa mukukucaya.”

¹¹ Sombi ndakakumbula ayi, “Sa muntu uli mbuli ndime inga wacica? Sa muntu uli mbuli ndime ulakonsha kuya mukuyuba muŊanda yakwe Lesa kufuna buumi bwakwe? Nebo teshi njeeko.”

¹² Lyalo ndakabona kwaamba ayi teshi Lesa wakamutuma, sombi wakaamba maswi aya ceebo Tobiya aSanibalati bakamupa makulo.

¹³ Bakamulipila maali kwaamba ayi anoondeshe ayi mbishe mukucita ncaakaamba. Bakacita boobo kwaamba ayi babishe liina lyangu akunensha nsoni.

¹⁴ Mpomunyaawo ndakapaila ayi, “NobaLesa bangu, amwiibaluke shakacita Tobiya aSanibalati akubapa mulandu. Amwiibaluke amulaluki mwanakashi Nowadiya pantu pomwi abalaluki bamwi abo bakalinga kusuni kunoondesha.”

Mulimo mbowakamanishikwa

¹⁵ Lyalo lubumbu lwakamanishikwa pabushiku bwamakumi obilo anshiiku shosanwe mumweenshi wa Eluli. Nkokwaamba ayi mulimo uyo wakatola nshiku makumi osanwe anshiiku shobilo.

¹⁶ Balwani besu boonse abamumishobo itushingulukite ndibakanyumfwa cikani ici, bakatyongola abuumbi ceebo bakeshiba kwaamba ayi mulimo uyo wakacitwa kwiinda mukucafwikwa aLesa.

¹⁷ Ciindi coonse ico bamatanjilili ba bene Juda bakalinga kulembelana makalata aTobiya.

¹⁸ Bene Juda baanji bakalinga kulubasu lwakwe ceebo cakwe Shekaniya mupongoshi wakwe mwine Juda mwanaakwe Ala. Kwiilika waawo alakwe Jeowanani mwanaakwe wakeeba mwanaakwe Meshulamu mwanaakwe Belekiya.

¹⁹ Bantu abo bakalinga kucitekobo kuluula kuli ndime pashintu shibotu nshaakalinga kucita akuya mukuluula nshendakalinga kukumbula pali nguwe. Aboobo wakatolelela kuntumina makalata akunkonga.