Neyemiya 4 - Baibo Busansulushi Bwa Libuku Ili

Neyemiya mbwaakakoma abo bakalinga kumukasha kucita mulimo wakwe

¹ Ono Sanibalati ndyaakanyumfwa ayi twatalika kuyakulula lubumbu, wakakalala abuumbi akutalika kutuseka.

² Lyalo wakaamba pameenso ababye abashilumamba bene Samaliya ayi, “Ino baJuda aba balefukite batoocitanshi? Sa batooyeeya kuyakulula lubumbu lwabo? Sa balo batooyeeya ayi inga bamanisha mulimo pabushiku bomwi kwiinda mukubenga milambu? Sa inga bapanga mabwe akuyakishako kuswa pamabwe aya akapwayoolwa akutentwa?”

³ Tobiya mwine Amoni uyo ngwaakalingaakwe wakakumbulawo ayi, “Ndubumbunshi ndweenga bayaka? Lubumbu lwakwaamba ayi nabi mwaaba watantaawo inga walumwayulula.”

⁴ Mpomunyaawo ndakapaila ayi, “NobaLesa besu, amunyumfwe mbobatootuseka. Amubaboosheshe mucobwe wabo, ee, matushi abo aalundane pamitwi yabo beene. Abapambwe shintu shoonse nshebacite alimwi batolwe busha kucishi cimwi.

⁵ Mutabalekeleli shibiibi nshebacita alimwi shibiibi shabo mutashiluubi mukwiinga bacobola ndiswe sotutooyaka.”

⁶ Aboobo twakayakulula lubumbu kushikila lweela pakati kuya mwiculu ceebo bantu bakalinga kusebensa camoyo womwi.

⁷ Ono Sanibalati, Tobiya, bene Alabu, bene Amoni abene Ashidodi ndibakanyumfwa kwaamba ayi kuyakulula lubumbu lwa Jelusalemu kwatolelela alimwi ashipense shamana kushinkwa, bakakalala abuumbi.

⁸ Lyalo bakapangana kulwana Jelusalemu alimwi akubusha shimfulunganya.

⁹ Sombi twakapaila kuli Lesa wesu akubika beshikulindilila malumwi amashiku mukutabilila ndabala.

¹⁰ Paciindi ico bene Juda bakeemba lwiimbo lwakwaamba ayi, “Twakopoka kunyamuna shilemu. Afulisha mabwe apwayookite akusowa. Ino inga twayakulula buyani lubumbu sunu?”

¹¹ Balwani besu bakalinga kuyeeya kwaamba ayi teshi tubaboone nabi kwishiba nshebatoocita kushikila bakatucaaye soonse akucaya mulimo ngotutoocita.

¹² BaJuda abo bakalinga kwikala pakati ka balwani besu bakesa mankanda maanji mukutulwiita balwani besu abo mbobakalinga kupinga kulwana ndiswe.

¹³ Mpomunyaawo ndakabika bantu mumisena itana kumana kuyakululwa. Bakaya mushipani sha mumikowa yabo kabacite mipeeni, masumo alimwi amata.

¹⁴ Ono ndindakabona kwaamba ayi bantu bapenga mumyoyo, ndakabambila pantu pomwi abamatanjilili babo alimwi abacinenenene ayi, “Mutaloondi balwani besu. Amwiibaluke Mwaami Lesa munene uyoosha. Amulwanine bene mishaanu, bana banu, bamakaanu alimwi amaandaanu.”

¹⁵ Balwani besu bakanyumfwa kwaamba ayi tweshiiba miyeeyo yabo alimwi ayi Lesa weepilinganya. Lyalo soonse twakaboolela kumulimo wesu wakuyakulula lubumbu.

¹⁶ Kuswawaawo musa wa basankwa bakalinga kusebensa mulimo wakuyakulula, musa umwi wakalinga kulindilila kabacite masumo, mayawo, mata alimwi kabafwete ashakufwala sha nkondo. Abalo bamatanjilili bakacafwa bantu

¹⁷ abo bakalinga kuyakulula lubumbu. Abo bakalinga kunyamuna shakuyakisha bakalinga kunyamusha lyaansa lyomwi, limwi kalicite cakulwanisha.

¹⁸ Abalo beshikuyakulula bakalinga kusebensa kabacite mipeeni mubukome. Sombi lakwe shikulisha lupeenga lwakucenjesha ndakalingaakwe.

¹⁹ Lyalo ndakaambila bamatanjilili, bacinenenene abantu boonse ayi, “Mulimo uyu ulitandabukite abuumbi alimwi tulitalangene. Nkokwaamba ayi womwi awomwi uli kulaamfu amubye.

²⁰ Anu kuli koonse nkweenga mwanyumfwa lupeenga, amuyoboloke akwisa kuli ndime. Lesa wesu ulaakutulwanina.”

²¹ Aboobo bushiku abushiku twakalinga kusebensa kuswa kumuyamaca kushikila nyenyeenshi shaswa mashiku. Musa wa likoto lyesu bakalinga kusebensela kulubumbu, musa umwi kabalindilila amasumo.

²² Mpomunyaawo ndakaambila bantu abo bakalinga kweendelesha mulimo uyo abeshikubacafwa kwaamba ayi, balyeelete kuba muJelusalemu mashiku ayi tunoolindilila ndabala inene akunoosebensa mulimo uyo malumwi.

²³ Anu nebo, mbondalinga kusebensaabo, basebenshi bangu nabi beshikunindilila tetwakalinga kufuulaawo shakufwala shesu nabibo mashiku. Womwi awomwi pakati kesu wakalinga kwikala ashakulwanisha shakwe muliimfwa.