Neyemiya 2 - Baibo Busansulushi Bwa Libuku Ili

Atasakisesi mbwaakatuma Neyemiya kuJelusalemu

¹ Mumweenshi wa Nisani mumwaaka wamakumi obilo wa bwaami bwakwe Atasakisesi, waini wakwe ndiwakaletwa ndakoobwesa akuutola kumwaami. Taana kumbonawo kale aciwa cilokete mbuli bushiku ubo.

² Aboobo mwaami wakanjipusha ayi, “Ceebonshi utooboneka kutasangalala pameenso otabete mulwashi? Taaku acimwi, sombi nkuungumana kwa moyo.” Ndakaloonda abuumbi,

³ sombi ndakaambila mwaami ayi, “Kamweendela buumi lyoonse nobaami! Sa nsheelete kuboneka kutasangalala pameenso na ndabala inene umo mwakoona bamashali bangu bakulukulu ili mumatongo, aminjililo ya njiyo yakanyonyoolwa kumulilo?”

⁴ Mpeeke mwaami wakanjipusha ayi, “Ino ulisuninshi?” Lyalo ndakapaila kuli Lesa wa kwiculu

⁵ akukumbula mwaami ayi, “NoBaami, na inga camusangalasha alimwi na mwamfwita nkumbu, nebo nemusebenshi wanu, ntoosenga kwaamba ayi muntume mucishi ca Juda, kundabala uko kulete bamashali bangu bakulukulu ayi nkeeyakulule.”

⁶ Mpomunyaawo mwaami kaashiite lubamba amukaakwe wakanjipusha ayi, “Ino ulaakutola nshiku shongaye alimwi ulaakupiluka lili?” Mwaami wakakondwa kuntuma, aboobo ndakaamba ciindi.

⁷ Lyalo ndakaambila mwaami ayi, “Na inga camusangalasha nobaami, ntoomusenga makalata akutolela beendeleshi bakwitala lya Mulonga wa Yufuletisi kwaamba ayi bancaafwe mulweendo lwangu kushikila nkashike kucishi ca Juda kwakubula cakulisukama.

⁸ Ntoosenga ankalata yakutolela Asafu, shikulama musaansa wa mwaami kwaamba ayi akampe shisamu shakuyakisha minjililo ya kulilinga lya Ŋanda yakwe Lesa, lubumbu lwa ndabala inene iyo alimwi aŋanda njeshi nkanookalaamo.” Mwaami wakampa shoonse nshendakasenga ceebo Lesa wakalinga andime.

⁹ Mpomunyaawo ndakaya kubeendeleshi bakwitala lya Mulonga wa Yufuletisi akubapa makalata akaswa kumwaami. Mwaami wakatuma bamatanjilili bamwi ba bashilumamba alimwi abeshikweendela pamaaki kwaamba ayi nje ambabo.

¹⁰ Ono Sanibalati mwine Beti Oloni alimwi aTobiya wacinenenene mucishi ca Amoni ndibakanyumfwa kwaamba ayi kwesa muntu mukusumpula buumi bwa bene Isilaeli, bakakalala abuumbi.

¹¹ Ndakaya kuJelusalemu alimwi ndakekala uko kwanshiku shotatwe.

¹² Mpeeke ndakanyamuka abantu baniini mashiku. Paciindi ici kaantana kulwiitawo nabi womwi isho Lesa nshaakabika mumoyo wangu kwaamba ayi ncitile ndabala ya Jelusalemu. Nshindakalinga kucite cifubwa nabi comwi, sombibo ceenka ncendakalinga kutantiteewo.

¹³ Ono ciindi ca mashiku ndakaswita kuMwinjililo wa Cinyika akululama kuMukalo wa Shinshimwe akushika kuMwinjililo wa Ntantaala. Ndakalinga kuya cibona lubumbu lwa Jelusalemu ulo lwakamwayululwa aminjililo ya ndulo iyo yakanyonyoolwa amulilo.

¹⁴ Mpeeke kuswa kwicwe lya ndabala ndakaya kuMwinjililo wa Kantupu akuKashiba ka Mwaami. Sombi tekwakalinga musena wakwaamba ayi mbongolo njendakalinga kutantite yiindeewo.

¹⁵ Aboobo ndakeenda kuCinyika ca Kidiloni kakushiyite kuya bulangalanga lubumbu. Kuswawaawo ndakaboola akwinjilila kuMwinjililo wa Cinyika.

¹⁶ Beendeleshi tabakwe kwishiba nkondakalinga ndaya nabi ncendakalinga kucita. Nshikwe kulwiitaawo baJudanyinaangu bamwi boonse, nabi bapailishi, bacinenenene, bamatanjilili abamwi boonse abo bakalinga kweelete kusebensa mulimo uyo tabakwe kwishiba.

¹⁷ Mpeeke ndakabaambila ayi, “Mwabona mapensho ngotubeteemo? Ndabala ya Jelusalemu ilimwayulwitwe aminjililo ya njiyo yakapya. Amwise tuyakulule lubumbu lwa Jelusalemu kwaamba ayi tumane musebaanyo ngotucite.”

¹⁸ Lyalo ndakabalwiita Lesa wangu mbwaakalinga andime ambwaakalinga kuncafwa alimwi ashaakaŋambila mwaami Atasakisesi. Abalo bakankumbula ayi, “Anu atutalikekobo kwiiyakulula.” Aboobo bakatalika mulimo uyu ubotu.

¹⁹ Sombi Sanibalati mwine Beti Oloni, Tobiya wacinenenene wa mucishi ca Amoni aGeshemu mwine Alabu, ndibakanyumfwa makani aya, bakatuseka akutuweluluka ayi, “Ono nciinshi ici ncemutoocita? Sa mulisuni kwaashukila mwaami?”

²⁰ Mpomunyaawo ndakabakumbula ayi, “Lesa wa kwiculu ulaakutulengesha kuswitilila. Swebo sobasebenshi bakwe tutootalika kuyakulula alimwi, sombi mwebo tamucitewo nkusu pacipansha ca ndabala ya Jelusalemu nabi comwi alimwi taaku cintu nabi comwi nceenga mwaamba ayi ncanu.”