Neyemiya 13 - Baibo Busansulushi Bwa Libuku Ili

Mbobakapansaana abaswamashi

¹ Pabushiku ubo Milawo yakwe Mose ndiyakalinga kubelengwa kubantu cakoolobesha, bakashika pamakani akalembwa ayi taaku mwine Amoni nabi mwine Moabu weshi akasuminishikwe kwinjila mulikoto lya bantu bakwe Lesa.

² Cakalinga boobo ceebo bakeema bene Isilaeli shakulya amaanshi, alimwi bakatamba Balamu kwaamba ayi abashingane. Nakubi boobo Lesa wesu wakasandula lishingo kuba coolwe.

³ Bene Isilaeli ndibakanyumfwa mulawo uyo, bakakusha baswamashi boonse pakati kabo.

Shintu Neyemiya nshaakasandula

⁴ Eliyashibu mupailishi wakapekwa mulimo wakweendelesha maanda akusungilamo shintu a kuŊanda yakwe Lesa. Eliyashibu wakalinga mubye Tobiya.

⁵ Aboobo wakamupa cipinda cinene umo kalekale mwakalinga kusungilwa shipo sha shili anga ngamaila, tununkila kabotu pakutenta, shisebensesho, shalikumi sha shili anga ngamaila, waini upya alimwi amafuta a maolifi isho shakalinga kupekwa kubene Lefi, beshikwiimba, beshikulindilila minjililo alimwi ashipo sha bapailishi.

⁶ Ono shintu shoonse ishi ndishakalinga kucitika, nshindakalinga muJelusalemu ceebo mumwaaka wamakumi otatwe amyaaka yobilo wa bwaami bwakwe Atasakisesi kuBabiloni, ndakaboolela kuli nguwe. Ono ndipakeenda ciindi ndakamusenga ayi ansuminishe kuboolela kuJelusalemu.

⁷ Aboobo ndakesa kuJelusalemu. Ndindakashika ndakanyumfwa cibiibi cakacita Eliyashibu cakumupa Tobiya cipinda ca mulubansa lwa Ŋanda yakwe Lesa.

⁸ Ndakakalala abuumbi akusoweela shintu shakwe Tobiya shoonse pansengwe lya cipinda ico.

⁹ Mpomunyaawo ndakapa mulawo wakusalasha shipinda akwinjishamo shisebensesho sha Ŋanda yakwe Lesa, shipo sha shili anga ngamaila alimwi atununkila kabotu pakutenta.

¹⁰ Ndakacana alimwi ayi shipansha sheelete kupekwa bene Lefi, teshakalinga kupekwa kuli mbabo. Aboobo beshikwiimba abene Lefi bamwi bakaboolela womwi awomwi kumuunda wakwe.

¹¹ Paceebo ceeco ndakakalalila bacinenenene pakulekelesha Ŋanda yakwe Lesa. Lyalo ndakaleta beshikwiimba abene Lefi bamwi akubabika mumilimo yabo.

¹² Lyalo bene Juda boonse bakatalika kuleta calikumi ca shili anga ngamaila, waini alimwi amafuta a olifi kumaanda akusungilako shintu kuŊanda yakwe Lesa.

¹³ Lyalo ndakabika bantu ayi banoolanga pamaanda akusungilako shintu, nkokwaamba ayi Shelemiya mupailishi, Sadoki mufundishi wa Milawo alimwi aPedaya mwine Lefi. Ndakabika Anani mwanaakwe Saka, mwishikulu wakwe Mataniya ayi anoobacafwa. Bakabikwa pamulimo wakwaabila bamakwababo shintu isho ceebo bakalinga kushomeka.

¹⁴ NobaLesa bangu, kamunjibaluka pashintu shoonse nshendakacitila Ŋanda yanu akulambila kwakalinga kuba kooko.

¹⁵ Munshiku isho ndakabona bantu bamwi mucishi ca Juda bakalinga kutyana minyansa pabushiku bwakookesha bwa Cibelu. Bamwi bakalinga kubika shili anga ngamaila, waini, minyansa, inkuyu ashimwi shintu pambongolo shabo akutola kuJelusalemu. Ndakabacenjesha ayi batanokuulisha cintu cili coonse pabushiku bwakookesha bwa Cibelu.

¹⁶ Abalo bene Taya bakalinga kwikala muJelusalemu bakalinga kuleta nswi ashintu shimwi shakuulisha mundabala inene iyo akuulisha bene misheesu pabushiku bwakookesha bwa Cibelu.

¹⁷ Lyalo ndakakalalila bamatanjilili bene Juda ayi, “Mwaboona cibiibi ici ncemwacita! Mwalengesha bushiku bwakookesha bwa Cibelu kutasalala.

¹⁸ Ici ncemutoocita ncecakacita bamashali banu bakulukulu akulengesha Lesa kuleta mapensho pali ndiswe apandabala yesu inene. Ono mutoosonkomona bukali bwakwe Lesa kwisa pabene Isilaeli mukunoolengesha bushiku bwakookesha bwa Cibelu kutasalala.”

¹⁹ Mpeeke ndakapa mulawo wakwaamba ayi minjililo ya ndabala inene ya Jelusalemu ilyeelete kunoocalwa lyoonse pakwipila lisuba, bushiku bwa Cibelu ndibutalika, akutacalula kushikila bushiku ubo bwamana. Ndakabika basebenshi bangu bamwi kulindilila minjililo kwaamba ayi kubule ciletwa mundabala pabushiku bwa Cibelu.

²⁰ Ono mashiku a pacisaanu beshimakwebo apusenepusene, kwalinkanda lyomwi nabi obilo, bakoonawo kale pansengwe lya ndabala.

²¹ Sombi ndakabacenjesha ayi, “Ino nciinshi ncemoonena pansengwe lya lubumbu kulindila ayi buce? Na mukaciboosheewo, ndaakumuuma.” Kuswa bushiku ubo, tabana kwisawo kale pabushiku bwakookesha bwa Cibelu.

²² Lyalo ndakaambila bene Lefi ayi balisalashe akuya mukulindilila minjililo kwaamba ayi bushiku bwakookesha bwa Cibelu bulamwe cakubusalasha. NobaLesa bangu, amunjibaluke pacikani ici acalo akunyumfwila nkumbu kweelana alusuno lwanu lunene.

²³ Paciindi ceenka ico, ndakacana kwaamba ayi baJuda bamwi bakalinga kweebete banakashi bene Ashidodi, Amoni alimwi abene Moabu.

²⁴ Anu bana babo bamwi bakalinga kwaamba mushobo wine Ashidodi nabi umwi. Tebakalinga kwaamba kabotu ciJuda.

²⁵ Lyalo ndakabakalalila, kubashingana, bamwi ndakabooma akubanonkoola misusu. Ndakabaambila ayi bashomeshe cakulumbila ayi balo abana babo teshi bakacibooshewo kweebana abaswamashi.

²⁶ Ndakabaambila ayi, “Sa te shikwati sha mushobo uyo nsheshakalengesha Solomoni mwaami wa bene Isilaeli kubisha. Taaku mwaami mushishi shafula wakalinga kweelenaakwe mubulemu. Solomoni wakalinga kusunikwi kuli Lesa wakwe, aboobo wakabikwa pabwaami bwa bene Isilaeli boonse. Nakubi boobo wakabisha ceebo ca banakashi baswamashi.

²⁷ Ono, sa tulyeelete kukonkela bubi mbomutoocita ubu akutanyumfwila Lesa mukweeba banakashi baswamashi?”

²⁸ Mwanaakwe Joiyada umwi, mwishikulu wakwe Eliyashibu mupailishi munene, wakeeba mwanaakwe Sanibalati mwine Oloni. Aboobo ndakamutanda muJelusalemu.

²⁹ NobaLesa bangu, amwiibaluke bantu aba mbobakabisha bupailishi acipangano ca bupailishi aca bene Lefi.

³⁰ Mpomunyaawo ndakasalasha bantu boonse mukukusha shintu shoonse sha baswamashi akupa mupailishi amwine Lefi womwi awomwi mulimo wakwe.

³¹ Ndakabamba shakuleta nkuni paciindi ceelete shakusebensesha pakutenta milambu alimwi akwaambila bantu kunooleta nsomo sha shili anga ngamaila ansoomo sha shisepo. NobaLesa bangu, kamunjibaluka akunoonyumfwila nkumbu.