Neyemiya 12 - Baibo Busansulushi Bwa Libuku Ili

Meena a bapailishi abene Lefi

¹ Mundando wa meena a bapailishi abene Lefi abo bakaboola aSelubabelo mwanaakwe Sheyalutyelo alimwi aJeshuwa mupailishi munene ngooyu. Selaya, Jelemiya, Esila,

² Amaliya, Maluki, Atusha,

³ Shekaniya, Leyumu, Melemoti,

⁴ Ido, Ginetoni, Abija,

⁵ Mijamini, Madiya, Biluga,

⁶ Shemaya, Joiyalibu, Jedaya,

⁷ Salu, Amoku, Ilikiya alimwi aJedaya. Aba mbo bakalinga bamatanjilili abamakwababo munshiku shakwe Jeshuwa.

⁸ Bene Lefi nguJeshuwa, Binuyi, Kadimyelo, Shelebiya, Juda alimwi aMataniya. Aba mbobakalinga kweendelesha nyimbo shakulumba Lesa.

⁹ Bakibukiya, Uni abacafwi babo bakalinga kukumbushanya pakwiimba.

Bamulunyungu lwakwe Jeshuwa mupailishi munene

¹⁰ Jeshuwa wakashala Joiyakimu, Joiyakimu wakashala Eliyashibu, Eliyashibu wakashala Joiyada,

¹¹ Joiyada wakashala Jonasani alakwe Jonasani wakashala Jaduwa.

¹² Munshiku shakwe Joiyakimu mupailishi munene, bakalinga bamatanjilili ba mushipani sha bapailishi mbaaba: Mucipani cakwe Selaya nguMelaya, mucipani cakwe Jelemiya nguAnaniya,

¹³ mucipani cakwe Esila nguMeshulamu, mucipani cakwe Amaliya nguJeowanani,

¹⁴ mucipani cakwe Maluki nguJonasani, mucipani cakwe Shekaniya nguJosefu,

¹⁵ mucipani cakwe Alimu nguAdina, mucipani cakwe Melemoti nguElikayi,

¹⁶ mucipani cakwe Ido nguSekaliya, mucipani cakwe Ginetoni nguMeshulamu,

¹⁷ mucipani cakwe Abija nguSikili mucipani cakwe Minyaminu acakwe Madiya nguPilutayi,

¹⁸ mucipani cakwe Biluga nguShamuwa, mucipani cakwe Shemaya nguJeonatani,

¹⁹ mucipani cakwe Joiyalibu nguMatenayi, mucipani cakwe Jedaya nguUsi,

²⁰ mucipani cakwe Salu nguKalayi, mucipani cakwe Amoku nguEba,

²¹ mucipani cakwe Ilikiya nguAshabiya, mucipani cakwe Jedaya nguNetanelo.

²² Munshiku shakwe Eliyashibu, Joiyada, Jowanani aJaduwa bamatanjilili ba bamumaanda a bene Lefi bakalembwa pantu pomwi aba bamumaanda a bapailishi. Aba bakalembwa muciindi ca bwaami bwakwe Dalyasi mwaami wa bene Pesha.

²³ Bamatanjilili ba bamumaanda bene Lefi kushika kuciindi cakwe Jowanani mwanaakwe Eliyashibu bakalembwa mulibuku lya makani a bulelo.

Mulimo wa basebenshi ba muŊanda yakwe Lesa

²⁴ Bamatanjilili ba bene Lefi nguAshabiya, Shelebiya Jeshuwa mwanaakwe Kadimyelo. Bamatanjilili aba bakapansaanya bene Lefinyinaabo mumakoto. Makoto obilo akalinga kwiimba nyimbo shakulumbaisha akulumba Lesa cakukumbushanya paciindi comwi acomwi kweelana abwakaamba Defedi muntu wakwe Lesa.

²⁵ Mataniya, Bakibukiya, Obadiya, Meshulamu, Talimoni alimwi aAkubu mbobakalinga beshikulindilila kuminjililo ya kumaanda akusungilamo shintu pafwaafwi aminjililo ya Ŋanda yakwe Lesa.

²⁶ Bantu aba bakalinga kusebensa munshiku shakwe Joiyakimu mwanaakwe Jeshuwa mwishikulu wakwe Josadaki, amunshiku shakwe Neyemiya mweendeleshi alimwi ashakwe Esila mupailishi alimwi mufundishi wa Milawo.

Neyemiya mbwaakasalasha lubumbu lwa ndabala ya Jelusalemu

²⁷ Ono paciindi cakusalasha lubumbu lwa ndabala ya Jelusalemu, bene Lefi bakeetwa kuswa mumisena mobakalinga kwikala kwaamba ayi babeeko pakusekelela kusalasha uku akwiimba nyimbo shakulumba alimwi akulisha tusenke atulumbu tunene atuniini.

²⁸ Beshikwiimba abo bakaletwa kuswa mumisena ishingulukite Jelusalemu amandabala a bene Netofa.

²⁹ Bamwi bakaswa kundabala ya Beti Gilugala, cishi ca Geba aca Asimafeti ceebo beshikwiimba bakayaka mishi yabo kushinguluka Jelusalemu.

³⁰ Lyalo bapailishi abene Lefi bakalisalasha kweelana aMilawo, pantu pomwi abantu, minjililo alimwi alubumbu lwa ndabala inene iyo.

³¹ Mpomunyaawo ndakabunganya bamatanjilili ba bene Juda peculu lya lubumbu ayi beendeleshe makoto obilo anene akalinga kuya bwiimba nyiimbo shakulumba. Likoto limwi lyakalulama kululyo lwa lubumbu kuya kuMwinjililo wa Ntantaala.

³² Kwisule lyabo kwakalinga kweendela Oshaya amusa wa bamatanjilili ba bene Juda

³³ pantu pomwi aAsaliya, Esila, Meshulamu,

³⁴ Juda, Benjameni, Shemaya, Jelemiya

³⁵ alimwi abapailishi bamwi bakalinga kucite mapeenga. Alakwe Sekaliya mwanaakwe Jonasani mwishikulu wakwe Shemaya, Shemaya wakalinga mwanaakwe Mataniya, Mataniya wakalinga mwanaakwe Mikaya, Mikaya wakalinga mwanaakwe Sakuwa, Sakuwa wakalinga mwanaakwe Asafu.

³⁶ Pesule lyakwe pakalinga bamakwabo, nkokwaamba ayi Shemaya, Asalelo, Milalayi, Gilalayi, Mayi, Netanelo, Juda alimwi aAnani kabacite ashakulisha isho shakaamba Defedi muntu wakwe Lesa. Esila mufundishi wa Milawo ngowakalinga kutanjilila likoto ilyo.

³⁷ Ono kuMwinjililo wa Kantupu bakalulama kuNdabala yakwe Defedi pamatantilo a njiyo, baya mukwiinda kuŋanda ya bwaami yakwe Defedi akuboola kulubumbu paMwinjililo wa Maanshi uli kwicwe lya ndabala.

³⁸ Lyalo likoto lya beshikwiimba limwi lyakalulama kucipiko. Ndakabakonkela peculu lya lubumbu pantu pomwi amusa umwi wa bantu. Twakaya mukwiinda kuŊanda ilaamfu ya Shitofu kuya mukushika kuLubumbu Lunene,

³⁹ ndiswe peculu lya Mwinjililo wa Efuleemu, Mwinjililo wa Jeshana alimwi apeculu lya Mwinjililo wa Nswi. Lyalo twaya mukwiinda kuŊanda Ilaamfu ya Ananelo, akuŊanda Ilaamfu ya Mwaanda tibili akuMwinjililo wa Mbelele. Swebo twakaya mukweela kuMwinjililo wa Beshikulindilila kuŊanda yakwe Lesa.

⁴⁰ Mpeeke makoto obilo akalinga kuya cilumba Lesa akashika kuŊanda yakwe Lesa akwiimikana mumisena ya ngawo. Nebo amusa wa bamatanjilili twakenjila muŊanda yakwe Lesa

⁴¹ pantu pomwi abapailishi aba kabacite amapeenga. Eliyakimu, Maseiya, Mijamini, Mikaya, Eliyoenayi, Sekaliya alimwi aAnaniya.

⁴² Bakalinga pesule lyesu nguMaseiya, Shemaya, Eleyasa, Usi, Jeowanani, Malukija, Elamu alimwi aEsa. Beshikwiimba abo bakalinga kutanjililwa aJesilaiya.

⁴³ Pabushiku ubu bakaleta milambu iinji, abantu bakasekelela cakusangalala ceebo Lesa wakabasangalasha abuumbi. Banakashi abaana abalo bakasekelela, aboobo ciyobeyobe cakusangalala kwabo muJelusalemu cakalinga kunyumfwikilabo kulaale.

Kuleta shakusebensesha pakulambila muŊanda yakwe Lesa

⁴⁴ Lyalo paciindi ici basankwa bakasalwa kunokweendelesha maanda akusungilamo shipo, shisepo shitaanshi ashalikumi. Bantu aba bakaba amulimo wakuyobolola shipansha sha bapailishi asha bene Lefi kuswa mumandabala kweelana abwaamba Milawo. Bapailishi abene Lefi bakasangalasha bene Juda boonse

⁴⁵ ceebo bakalinga kusebensa mulimo wakusalasha amulimo wakwe Lesa woonse. Beshikwiimba abeshikulindilila kuŊanda yakwe Lesa abalo bakalinga kusebensa mulimo wabo kweelana abwakaamba mwaami Defedi aSolomoni mwanaakwe.

⁴⁶ Kuswa muciindi cakwe Defedi aAsafu shikwiimba, beshikwiimba mbobakalinga kutanjilila nyimbo shakulumbaisha akulumba Lesa.

⁴⁷ Ono muciindi cakwe Selubabelo amuciindi cakwe Neyemiya, bene Isilaeli boonse bakalinga kuleta shipo sha bushiku abushiku sha beshikwiimba abeshikulindilila minjililo. Bakalinga kuleta cipansha ceelete kubene Lefi, abalo bene Lefi bakalinga kupa cipansha ceelete kubapailishi.