Neyemiya 11 - Baibo Busansulushi Bwa Libuku Ili

Bantu bakalinga kwikala muJelusalemu

¹ Lyalo bamatanjilili bakekala muJelusalemu. Ono bantu bamwi bakooma cisolo kusala ŋanda yomwi pamaanda ali likumi kwaamba ayi bamuŋanda iyo bekale muJelusalemu, ndabala inene isalalite. Bamwi boonse bakalinga kweelete kwikala mumandabalaabo beene.

² Bantu bakalumba boonse bakasumina amyoyo yabo beene kwikala muJelusalemu.

³ Bene Isilaeli bamwi, bapailishi, bene Lefi, basebenshi ba kuŊanda yakwe Lesa alimwi abamulunyungu lwa basebenshi bakwe Solomoni bakekala mumandabala a mucishi ca Juda, womwi awomwi pacipansha cakwe ca cishi. Bamatanjilili ba mucishi ca Juda abo bakalinga kwikala muJelusalemu mbaaba:

⁴ Kuswa kumukowa wakwe Juda nguAtaya mwanaakwe Usiya, mwishikulu wakwe Sekaliya mwanaakwe Amaliya. Amaliya wakalinga mwanaakwe Shefatiya, Shefatiya wakalinga mwanaakwe Maalalelo wamulunyungu lwakwe Pelesi.

⁵ Wabili nguMaseiya mwanaakwe Baluki, mwishikulu wakwe Koluwose mwanaakwe Adaya, Adaya wakalinga mwanaakwe Joiyalibu, Joiyalibu wakalinga mwanaakwe Sekaliya wamulunyungu lwakwe Shela.

⁶ Bamulunyungu lwakwe Pelesi boonse abo bakalinga kwikala muJelusalemu bakalinga 468. Aba boonse bakalinga basankwa bacibwene kulwana.

⁷ Kuswa kumukowa wakwe Benjameni nguSalu mwanaakwe Meshulamu mwishikulu wakwe Jowedi. Jowedi wakalinga mwanaakwe Pedaya, Pedaya wakalinga mwanaakwe Kolaya, Kolaya wakalinga mwanaakwe Maseiya, Maseiya wakalinga mwanaakwe Itiyelo, Itiyelo wakalinga mwanaakwe Jeshaya,

⁸ Gabayi aSalayi bamakwabo Jeshaya. Bene Benjameni boonse bakalinga kwikala muJelusalemu bakalinga 928 pantu pomwi.

⁹ Jowelo mwanaakwe Sikili ngowakalinga mutanjilili wabo, kuboolaawo nguJuda mwanaakwe Asenuwa.

¹⁰ Kuswa kubapailishi nguJedaya mwanaakwe Joiyalibu, Jakini,

¹¹ Selaya mwanaakwe Ilikiya, mwishikulu wakwe Meshulamu mwanaakwe Sadoki. Sadoki wakalinga mwanaakwe Melayoti, Melayoti wakalinga mwanaakwe Aitubu mupailishi munene.

¹² Bamucipani ici abo bakalinga kusebensela muŊanda yakwe Lesa bakalinga 822 pantu pomwi. Adaiya mwanaakwe Jeloyamu, mwishikulu wakwe Pelaliya. Pelaliya wakalinga mwanaakwe Amusi, Amusi wakalinga mwanaakwe Sekaliya, Sekaliya wakalinga mwanaakwe Pashuwa, Pashuwa wakalinga mwanaakwe Malukija.

¹³ Bamucipani ici abo bakalinga bamatanjilili ba bamumaandaabo bakalinga 242 pantu pomwi. Amashisayi mwanaakwe Asalelo, mwishikulu wakwe Aasayi. Aasayi wakalinga mwanaakwe Meshilemoti, Meshilemoti wakalinga mwanaakwe Ima.

¹⁴ Bamucipani ici abo bakalinga bashilumamba bacibwene kulwana bakalinga 128 pantu pomwi. Mutanjilili wabo wakalinga Sabudyelo mwanaakwe Agedolimu.

¹⁵ Kuswa kubene Lefi nguShemaya mwanaakwe Ashubu, mwishikulu wakwe Asilikamu. Asilikamu wakalinga mwanaakwe Ashabiya, Ashabiya wakalinga mwanaakwe Buni.

¹⁶ Shabetayi aJosabadi bamatanjilili bamwi ba bene Lefi abo bakalinga kubona milimo ya pansengwe lya Ŋanda yakwe Lesa.

¹⁷ Mataniya mwanaakwe Mika mwishikulu wakwe Sabudi. Sabudi wakalinga mwanaakwe Asafu uyo wakalinga kutanjilila likoto lya beshikwiimba abo bakalinga kwiimba lwiimbo lwakulumba Lesa. Bakibukiya uyo wakalinga mucafwi kuli Mataniya. Abuda mwanaakwe Shamuwa, mwishikulu wakwe Galalu. Galalu wakalinga mwanaakwe Jedutuni.

¹⁸ Bene Lefi bakalinga kwikala muJelusalemu, ndabala inene isalalite bakalinga 284 pantu pomwi.

¹⁹ Kuswa kubeshikulindilila minjililo mbaaba, Akubu, Talimoni abamakwababo bakalinga 172 pantu pomwi.

²⁰ Bene Isilaeli bamwi boonse, bapailishi abene Lefi bamwi bakekala pashipansha shakwe sha cishi mumandabala amwi a mucishi ca Juda.

²¹ Basebenshi ba kuŊanda yakwe Lesa bakekala mucipansha ca ndabala ya Jelusalemu ciitwa ayi Ofelo. Siya aGishipa mbobakalinga kubeendelesha mumulimo wabo.

²² Mutanjilili wa bene Lefi kuJelusalemu nguUsi mwanaakwe Bani mwishikulu wakwe Ashabiya. Ashabiya wakalinga mwanaakwe Mataniya, Mataniya wakalinga mwanaakwe Mika. Usi wakalinga wamucipani cakwe Asafu ico cakalinga kucite mulimo wakwiimba muŊanda yakwe Lesa.

²³ Beshikwiimba bakalinga kupekwa milawo kuswa kumwaami iyo yakalinga kweendelesha milimo yabo ya bushiku abushiku.

²⁴ Petaiya mwanaakwe Meshesabelo, wamulunyungu lwakwe Sela mwanaakwe Juda, ngowakalinga shikwiimikanina bene Isilaeli kunembo lyamwaami wa bene Pesha.

Bantu bakalinga kwikala mumandabala amwi

²⁵ Bantu baanji bakalinga kwikala mumandabala akalinga pafwaafwi amyuunda yabo. Bene Juda bakalinga kwikala kuKilyati Aba, Diboni, Jekabusiilu amishi yakalinga kushingulukite mandabala ayo.

²⁶ Bamwi bakalinga kwikala kuJeshuwa, Molada, Beti Peleti,

²⁷ Asa Shuwalu, Biyasheba amishi yakalinga kwaashingulukite.

²⁸ Bamwi bakalinga kwikala kuSikilagi, Mekona amishi yakalinga kwaashingulukite.

²⁹ Bamwi bakalinga kwikala kuEni Limoni, Sola, Jamuti,

³⁰ Sanowa, Adulamu amishi yakalinga kwaashingulukite. Bamwi kundabala ya Lakishi amyuunda ya njiyo, bamwi kundabala ya Aseka amishi ya njiyo. Nkokwaamba ayi bakalinga kwikala kuswa kuBiyasheba kuya mukushika kuCinyika ca Inomu.

³¹ Bamulunyungu lwakwe Benjameni bakalinga kwikala kuGeba, Mikimashi, Aija, Betelo amishi ya njiyo,

³² Anatoti, Nobu, Ananiya

³³ Asoli, Lama, Gitaimu,

³⁴ Adidi, Seboimu, Nebalati,

³⁵ Lodi, Ono alimwi amuCinyika ca Bacibwene shakupangapanga.

³⁶ Makoto amwi a bene Lefi ayo akalinga kwikala kucishi ca Juda bakatumwa kuya mukwikala pakati ka bene Benjameni.