Neyemiya 1 - Baibo Busansulushi Bwa Libuku Ili

Neyemiya mbwaakayeeya Jelusalemu

¹ Maswi akwe Neyemiya mwanaakwe Akaliya ngaaya: Mumweenshi wa Kisilefu mumwaaka wamakumi obilo wa bwaami bwakwe Atasakisesi mwaami wa bene Pesha, ndindakalinga mundabala inene ya Susa,

² Anani, mukwesu umwi, wakesa kuswa kucishi ca Juda pantu pomwi ababye bamwi. Mpeeke ndakabeepusha shabaJuda abo bakaboola kuswa kucishi ca busha ca Babiloni alimwi ashandabala ya Jelusalemu.

³ Ono bakankumbula ayi, “Abo bakapuluka mubusha akuboolela kumishaabo bali mumapensho anene akucobolwa kubantu babashingulukite. Lubumbu lwa Jelusalemu lwakapwaikwa, aminjililo ya ndulo yakatentwa alimwi teena kubambululwa kuswa kuciindi ico.”

⁴ Mpeeke ndindakanyumfwa boobo, ndakekala panshi akulila. Ndakalila akulikasha kulya kwanshiku shiinji kunembo lyakwe Lesa wa kwiculu.

⁵ Ndakapaila ayi, “NoBaami baLesa, baLesa ba kwiculu, nobaLesa banene, nomulemekwa, mulalama cipangano ca lusuno kuli baabo bamusuni alimwi bakonkela milawo yanu.

⁶ Amumboone noBaami baLesa akuteya matwi anu kwaamba ayi munyumfwe mupailo wangu nemusebenshi wanu uyo ngoontoopaila kunembo lyanu malumwi amashiku pabasebenshi banu bene Isilaeli. Ndalyaambilila shibiibi shesu sobene Isilaeli, nebo abamuŋanda ya bata, nshetwakamubishisha.

⁷ Twakamubishisha abuumbi. Tatukwe kukonkela milawo amilasho iyo njemwakapa Mose musebenshi wanu.

⁸ “Amwiibaluke mulasho ngomwakapa Mose musebenshi wanu wakwaamba ayi, ‘Na mukabule kushomeka kuli ndime, ndaakumupalanganishisha pakati ka mishobo imwi.

⁹ Sombi na mukasandukile kuli ndime akukonkela milawo yangu, ndaakumuboosha mumusena ngondakasala ayi noolambililwa nabi bantu banu bamwi bali mushishi sha busha shili kulaamfu.’

¹⁰ “NoBaami baLesa aba mbasebenshi banu alimwi mbantu banu, abo mbomwakafuna kwiinda munkusu shanu shiinji, ee, nkusu shanu shiindaawo.

¹¹ Amukutike mupailo wangu nemusebenshi wanu pantu pomwi amipailo ya basebenshi banu bamwi boonse abo basangalala mukumulemeka. Amumpe coolwe nemusebenshi wanu kwaamba ayi mwaami uyo anyumfwile nkumbu.” Muciindi ico ndakalinga shikupa mwaami waini.