Naamu 3 - Baibo Busansulushi Bwa Libuku Ili

¹ Mapensho kundabala inene itila bulowa buunji. Ndabala iyo iswitebo bubeshi abuboni bwakusaala. Ndabala iyo teebuli bakupensha.

² Amunyumfwe kulila kwa shiswepu, kulila kwa mawilo, kutambala kwa maaki, akuyobeka kwa shikoci.

³ Beshimaaki baliciteeko kucica! Mipeeni itoobekookabo! Aalo masumo alipiyeenepiyeenebo! Mituntu ya bantu yeelinkana! Ncakwiila mibili ya baabo bacaikwa teebelengeki. Bantu batoolisuntulaamobo akuwitaawo pakweenda.

⁴ Ndabala ya Ninife itoopekwa mulandu, ndabala iyo yakalinga anga ngumwanakashi mufuule. Yakalinga anga ngumwanakashi uyo wakalinga kukondelesha bantu kukubota kwakwe alimwi wakalinga kuswite bwaanga bwa lufu. Aboobo wakayungoola mishobo iinji kwiinda mubufuule bwakwe alimwi abantu baanji kubuloshi bwakwe.

⁵ Mwaami Lesa Shinkusu shoonse waamba ayi, “Ondabala ya Ninife ndikupatite. Ndaakunyamununa shifunga shako akukufwekaasho kumeenso. Ndaakubonesha mishobo yoonse matakosha ako ansooni shako kumalelo oonse.

⁶ Ndaakukuwaala sha matombe alimwi ndaakukunaama. Ndaakukulengesha kuba cintu cakuseka.

⁷ Boonse beshi bakakuboone balaakukucica akwaamba ayi, ‘Ndabala ya Ninife yanyonyoolwa! Anu ngani weshi akeelileeko? Ngani weshi akasune kuyuumbulushaako?’ ”

⁸ Sa webo Ninife uleenda pandabala ya Tebesi iyo yakalinga kucanika muya Mulonga wa Nailo? Ndabala iyo yakalinga kushingulukitwe amaanshi. Mulonga uyo wakalinga ndyelilinga lya njiyo. Ncakwiila maanshi akalinga ndolubumbu lwa njiyo.

⁹ Yakalinga kweendelesha cishi ca Kushi aca Ijipiti. Cishi ca Puti aca Libya nsheshakalinga kucafwana andabala iyo munkondo.

¹⁰ Nakubi boobo bantu ba njiyo bakacatwa busha. Bakateta babo bakoomwa kushikila bafwa moonse mupetukila mikwakwa ya mundabala inene. Cisolo cakoomwa kubaana bamaloba ba njiyo abalo bacinenenene bakaangwa muncetani.

¹¹ Awebo ondabala ya Ninife ulaakukolwa. Lyalo ulaakuya mukuyuba akweelesha kucicila balwani bako.

¹² Shiyubilo shako shoonse shili anga nshisamu sha nkuyu ashisepo sha nshisho shitaanguna kupya. Na mwashitenkaanya, inkuyu shilalokela mumulomo wa muntu uyo ushilya.

¹³ Bashilumamba bako bali anga mbanakashi! Minjililo yako ilibo bwaashi kubalwani bako. Mulilo watenta mpingilo sha njiyo.

¹⁴ Nobene Ninife amuteke maanshi akusebensesha na bamushinkile. Amuyumye malinga anu! Amukande bulongo kwaamba ayi muume ncelwa! Amubambe shikombole.

¹⁵ Nakubi boobo mulilo ulaakumutenta ayalo mipeeni ilaakumutimboola akumulobya anga ncisoshi mbocilya shishango. Mwakashalanabo anga ncisoshi.

¹⁶ Mwakafusha beshimakwebo banu ee, kubafusha kwiinda nyenyeenshi sha mwiculu. Sombi bulya bamana kuya anga ncisoshi cooluka.

¹⁷ Bacinenenene banu bali anga cisoshi, ico ciba mulilinga na kuli mpewo. Sombi lisuba na lyaswa, shilooluka alimwi taaku ushiba nkoshaya.

¹⁸ Nobaleli banene ba bene Asilya, Beendeleshi banu bamana kufwa. Ncakwiila bacinenenene banu boonse boonena limwi. Bantu banu bapalanganina mutulundu alimwi taaku weshi akababooshe kumishaabo.

¹⁹ Taaku musamu wa cilonda cako, ee, cilonda cako tacishilikiki. Boonse banyumfwa makani a kunyonyooka kwako, balakamba mapaka cakusangalala ceebo taaku utana kupengawo kale kulunkutwe lwako.