Naamu 2 - Baibo Busansulushi Bwa Libuku Ili

Ndabala ya Ninife mboyakawa

¹ Mwebo nobene Ninife balwani banu bashika. Amubike beshikulindilila kuciyubilo! Amubike beshikulindilila kumukwakwa! Amulibambile kulwana! Amwiimikane cankusu!

² Mwaami Lesa uli pafwaafwi kubooshesha bene Isilaeli bulemu bweenka mbobwakalinga kalekale ciindi balwani babo kabatana kubasaala akunyonyoola minyansa yabo.

³ Bashilumamba bali mulikoto lya balwani baliyumwite mayawo asalala. Ashalo shakufwala shabo sha nkondo nshisalalabo pyu anga mbulowa. Ncakwiila batoolibambila kulwana. Sheela sha kushikoci shabo shitoobekookabo ee, kubeka anga ngumulilo. Aalo masumo ayo acite shisamu sha mapaini atoobekabekabo.

⁴ Shikoci shiinji shitokweenda lubamba mumikwakwa. Shitooya kashisa mumisena icanika bantu baanji ya ndabala inene. Shitoonyaka anga nshimunimweenge, shitoocitabo anga nkubeka kwa mfula.

⁵ Bashilumamba babo bakusaloola beetikwa, sombi batoolisuntula pakuya ceenda. Batoofuumukila kulubumbu uko nkobatoobika cakulifunishako kuumwa pamitwi.

⁶ Mulonga wacalulwa, ayalo ŋanda ya bwaami yawa!

⁷ Mwaami mwanakashi watolwa busha. Bamyooye bakwe batoolila anga nimpolobe, akulyuuma pashaamba shabo ceebo cabuumba.

⁸ Bweenka bupoomoka maanshi kuswa mucishiba capasuka mbweeke ubo bantu mbobatooswa mundabala ya Ninife. Batokoolobesha ayi, “Amwiimikane! Amwiimikane!” Sombi taaku nabi womwi utokwiimikana.

⁹ Amusaale silifa! Amusaale golodi! Ncakwiila ndabala iyi iliswitebo buboni bwa makwebo alimwi tabumaani.

¹⁰ Ndabala ya Ninife yanyonyoolwa, yacaala cisuukila alimwi yaba matongo. Myoyo yamanamobo kuboowa amwalo mumanungo mwaboolabo tontolo ceebo nkusu shoonse shamana. Shiwa shoonse shaloka kuboowa.

¹¹ Anu ndabala ya Ninife ili kuli? Anu njili ndabala iyo yakalinga anga ncimfwengo mwikala nkalamu? Uli kuli musena uko bana ba nkalamu nkobakalinga kusanininwa ankalamu isankwa ayanakashi nkoshakalinga kuya abana ba nshisho kabatacite cakulisukama?

¹² Nkalamu isankwa yakacaya banyama baanji bakwana bana ba njiyo ankalamu yanakashi. Ciyubilo ca njiyo cakalinga kuswitebo nyama. Ncakwiila yakalinga kususha cimfwengo ico abanyama mboyakalinga kucaya.

¹³ Mwaami Lesa waamba ayi, “Ndi mulwani wako ondabala ya Ninife. Ndaakutenta shikoci shako shoonse. Ndaakunyonyoola bashilumamba abo kunkondo. Ndaakukunyaya shoonse nshemwakasaala kubantu bamwi. Maswi abeshinkombe banu teshi akanyumfwikeewo tubili.”