Naamu 1 - Baibo Busansulushi Bwa Libuku Ili

¹ Aya ngamaswi akaswa kuMwaami Lesa kwaamba pandabala ya Ninife. Ili ndibuku lya cili anga nciloto cakabona Naamu mwine Ekiloshi.

Mwaami Lesa mbwaakakalalila bene Ninife

² Lesa ngushibusuba alimwi ngushikuboosha cishole. Mwaami Lesa ulaboosha cishole alimwi ngumukali abuumbi. Mwaami Lesa ulaboosha cishole kubaabo bamupatite alimwi ulatolelela kukalala kubalwani bakwe.

³ Mwaami Lesa taakalali bwaangu alimwi ngushinkusu shiinji. Taalangibo muntu wabisha kutamupa mulandu. Uleendela mukapupuulwa amucipuupu. Makumbi alaba ndolusuko lwa myeendo yakwe.

⁴ Ulakalalila lweenge alwalo lulayuma, ee, ulalengesha milonga yoonse kuyuma. Myuunda ya kuBashani aya kuKamelo ilayuma aalo maluba a kuLebanoni alanyana.

⁵ Tulundu tunene tulatenkaana kunembo lyakwe atwalo tulundu tuniini tulasunguluka. Cishi ca panshi cilatenkaana kunembo lyakwe, ncakwiila cishi coonse cilatenkaana aboonse abo bekalaamo.

⁶ Ngani weenga weemikana kubukali bwakwe? Ngani ukonsha kwiimikana kubukali buyoosha? Bukali bwakwe bulanyaka anga ngumulilo. Mabwe oonse alapwayooka kunembo lyakwe.

⁷ Mwaami Lesa ngumubotu. Uli anga nciyubilo mushiindi sha mapensho. Ulafuna baabo bacinkite manungo muli nguwe.

⁸ Sombi ulaakunyonyoola balwani bakwe anga ngamaanshi asefuka acite mukuuku unene. Ulaakutandaanishila baabo bamupatite mumunshinshe.

⁹ Shintu shoonse balwani abo nshebapinga kucita kuMwaami Lesa, ulaakushilengesha kumaninina. Ncakwiila Mwaami Lesa taabooshi cishole lyobilo.

¹⁰ Balaakucatwa mumyuumfwa akukolwa waini wabo. Balaakutentwabo anga mbwiisu buyumu.

¹¹ Kuswa kuli ndiwe ondabala ya Ninife mulaakuswa wooyo upinga kucita shibiibi kuMwaami Lesa akupanda maano mukucita bubi.

¹² Mwaami Lesa waamba ayi, “Nakubi kwaamba ayi bene Asilya balicite nkusu alimwi mbaanji, balaakunyonyoolwa akumaninabo limwi. Mwebo nobantu bangu bene Juda, nabi ndakamupensha teshi nkamupensheewo tubili, sobwe.

¹³ Ono bulya ntootyola lijoko lya bweendeleshi bwabo kuswa munshingo shanu akusutoola ncetani shimwaangite shoonse.”

¹⁴ Mwebo nobene Asilya, Mwaami Lesa wapa mulasho pali ndimwe ayi, “Teshi mukabeewo abamulunyungu abo beshi bakanokwiitwa meena anu. Ndaakunyonyoola shikoshanyo shakubesa ashibumbwabumbwa isho shili mumaanda akulambililaamo balesa banu. Ndaakubamba cuumbwe canu mukwiinga tamweelete kunoocili boomi.”

¹⁵ Amubone, shinkombe utoosa kucilingana tulundu ee, shinkombe utooleta makani abotu, utokwaambilisha shaluumuno! Mwebo nobene Juda kamuba anshiiku shanu shakusekelela akucita kweelana ambomwakashomesha cakulumbila. Bamucita shibi teshi bakamulwaneewo tubili ceebo balaakunyonyoolwa cakumaninina.