Milimo ya Batumwi 9 - Baibo Busansulushi Bwa Libuku Ili

Saulo mbwaakashoma muli Jesu

¹ Paciindi ico, Saulo wakalinga kupensha bantu bakalinga kukonkela kwiisha kwakwe Jesu alimwi akupinga kubacaya. Wakaya kumupailishi munene

² mukusenga makalata akumusuminisha kuya kushoonde sha baJuda kuDamasikasi. Wakalinga kusuni ayi na akacaneko bantu bakonkela kwiisha kwa Mwaami Jesu, banakashi nabi basankwa, akabaange akubatola kuJelusalemu.

³ Ndyaakashika pafwaafwi andabala ya Damasikasi, mumuni wakaswa kwiculu wakabeka pali nguwe.

⁴ Mpeeke wakawita panshi akunyumfwa liswi lyakwaamba ayi, “Saulo, Saulo! Ino utoompensheshanshi?”

⁵ Saulo wakeepusha ayi, “Ino ndimwe baani, Nkambo?” Liswi lyakanyumfwika alimwi ayi, “Ndime Jesu uyo ngootoopensha.

⁶ Ono nyamuka uye mundabala iyi, mweshi uye ulwiitwe nsheweelete kucita.”

⁷ Basankwa mbwaakalingaabo bakacelemanabo. Liswi lyalo bakalinyumfwa, sombi wakalinga kwaamba tabakwe kumubona.

⁸ Saulo wakanyamuka, sombi ndyaakashinshibatuka, taaku ncaakalinga kubona. Aboobo, abo mbwaakalingaabo bakamucatililabo kulyaansa akuyaakwe muDamasikasi.

⁹ Pakeenda nshiku shotatwe kaataboni alimwi paciindi ici taakalinga kulya nabi kunwa.

¹⁰ MuDamasikasi mwakalinga kwikala mushomi umwi wiitwa ayi Ananiyasi. Wakanyumfwa Mwaami Jesu kaamwiita anga muciloto ayi, “Ananiyasi!” Alakwe wakakumbula ayi, “Mpoondi Nkambo.”

¹¹ Mpeeke Mwaami Jesu wakamwaambila ayi, “Nyamuka uye kumukwakwa wiitwa ayi, ‘Mukwakwa ululeme.’ Na ushike kuŋanda yakwe Judasi, wiipushe kubete musankwa wa kuTasasi wiitwa ayi Saulo. Muntu uyo utoopaila,

¹² alimwi wabona musankwa wiitwa ayi Ananiyasi anga muciloto, kaanjila muŋanda akubika maansaakwe pali nguwe kwaamba ayi atalike kubona alimwi.”

¹³ Ndyaakanyumfwa, Ananiyasi wakakumbula ayi, “Nkambo, bantu baanji bakandwiita makani amuntu uyu alimwi ashintu shibiibi nshaakacita kubantu banu ba muJelusalemu.

¹⁴ Ono alimwi wesa kokuno kuDamasikasi munkusu sha bamatanjilili ba bapailishi, abo bakamusuminisha ayi ese aange bantu boonse abo balambila ndimwe.”

¹⁵ Sombi Mwaami wakamwaambila alimwi ayi, “Koyabo mukwiinga ndamusala kwaamba ayi ansebensele akunshibya kubaswamashi bakunsengwe, bamaami alimwi abene Isilaeli.

¹⁶ Aboobo, nebo nemwiine ndaakumubonesha shoonse nshaaelete kupenga ceebo ca ndime.”

¹⁷ Lyalo Ananiyasi wakaya wenjila muŋanda mwakalinga Saulo. Wakabika maansaakwe pali nguwe akwaamba ayi, “Mukwaabo Saulo, Mwaami Jesu mwiine uyo ngowakabona munshila ndiwakalinga kwisa kokuno, wantuma kwaamba ayi webo utalike kubona alimwi akwaamba ayi usushikwe Mushimu Usalashi.”

¹⁸ Paciindi ceenka ico shimwi shintu shakalinga kuboneka anga ngamaamba a nswi, shakaloka kuswa mumeenso akwe Saulo. Lyalo wakatalika kubona alimwi. Wakanyamuka, wabombekwa.

¹⁹ Ono ndyaakamana kulya, nkusu shakaboolaamo alimwi. Saulo wakekalabo nshiku shiniini abashomi kuDamasikasi.

Saulo mbwaakashimikila muDamasikasi

²⁰ Wakeendililabo kuya mushoonde sha baJuda akutalika kushimikila ayi Jesu nguMwanaakwe Lesa.

²¹ Mpeeke boonse bakanyumfwa maswi akwe bakakankamana akwiipushanya ayi, “Sa teshi ngomusankwa uyu wakalinga kucaya bashomi muJelusalemu? Sa taakwe kwisa mukucata bashomi akubatola kubamatanjilili ba bapailishi?”

²² Ono kushimikila kwakwe Saulo kwakaba ankusu. Aboobo baJuda bakalinga kwikala muDamasikasi bakakankamana ndyaakabashinina ayi Jesu ngoUsalitwe wakwe Lesa.

²³ Ndipakeenda nshiku shiinji, baJuda bakabungana pantu pomwi akupangana ayi bacaye Saulo.

²⁴ Sombi lakwe makani aya wakaanyumfwa kubantu bamwi. Bantu aba bakalinga kulindilila paminjililo ya mundabala iyi ayi na bamuboone, bamucaaye.

²⁵ Ono bumwi bushiku mashiku, bashomi bakwe bakamubika mumutaanga akumupusha pacipense mulubumbu akumuselushila panshi.

Saulo mbwaakaboolela kuJelusalemu

²⁶ Saulo ndyaakashika kuJelusalemu, wakeelesha kwinjila mulikoto lya bashomi, sombi tabakwe kusumina ayi alakwe wakashoma muli Jesu. Mpeeke boonse bakamuloonda.

²⁷ Kuswawaawo Banabasi wakamutola kubatumwi kwaamba ayi bakabandikile pantu pomwi. Wakabasansulwita mbuli Saulo mbwaakabona Mwaami Jesu munshila ya kuDamasikasi ambuli Mwaami mbwaakaambaakwe. Wakabalwiita ambuli Saulo mbwaakashimikila muliina lyakwe Jesu cakubula boowa muDamasikasi.

²⁸ Lyalo Saulo wakekala ambabo alimwi akuya cishimikila muliina lya Mwaami Jesu muJelusalemu moonse, cakubula boowa.

²⁹ Alimwi Saulo wakalinga kwaamba akupikishanya abaJuda baamba ciGiliki, sombi balo bakalinga kupangana kwaamba ayi bakamucaaye.

³⁰ Ono bashomi ndibakanyumfwa makani aya, Saulo bakamutola kuSisaliya akumutumya kuTasasi.

³¹ Muciindi ici, bashomi mushishi shoonse sha Judeya, Galili alimwi aSamaliya bakalinga muluumuno. Bashomi aba bakalinga kucatene pantu pomwi, bakafulilaako kwiinda mukuyuminishikwa aMushimu Usalashi alimwi bakalinga kulemeka Mwaami.

Pita mbwaakacita muLida aJopa

³² Pita ndyaakalinga kuya bweendeenda mumisena ipusenepusene, wakashika akubantu bakwe Lesa bakalinga kwikala mundabala ya Lida.

³³ Nkomunya uko, wakacanako musankwa umwi wiitwa ayi Enisi uyo wakalinga kuyuminite mubili, aboobo taakalinga kucikonsha kuswa pabulo myaaka yosanwe ayotatwe.

³⁴ Pita wakamwaambila ayi, “Enisi, Jesu Klistu wakushilika. Nyamuka uyalule mpasa yako.” Paciindi ceenka ico Enisi wakanyamuka.

³⁵ Mpeeke bantu boonse bakalinga kwikala muLida amuShaloni ndibakabona Enisi, abalo bakasanduka akushoma muMwaami Jesu.

³⁶ Mundabala ya Jopa mwakalinga kwikala mwanakashi wakalinga kushoma muli Jesu wiitwa ayi Tabita (muciGiliki liina lyakwe nguDokasi nkokwaamba ayi nalufwi). Mwanakashi uyu wakalinga kucita milimo ibotu lyoonse akunoocafwa bakandu.

³⁷ Paciindi ici mwanakashi uyu wakaciswa akufwa. Bantu bakasansha mutuntu akuubika mucipinda ca peculu.

³⁸ Ndabala ya Lida yakalinga kubambenebo andabala ya Jopa. Ono bashomi ba muJopa ndibakanyumfwa ayi Pita uli kuLida, bakatuma basankwa bobilo amaswi akwaamba ayi, “Twakombelela mufwambaane kwisa kuno.”

³⁹ Mpomunyaawo Pita wakalibambila akuyaabo. Ndyaakashika, bakamutola mucipinda ca peculu umo bamukalubinje banakashi mobakamushinguluka kabalila. Lyalo bakatalika kumubonesha minjila ashakufwala sha peculu shakatunga Dokasi kaacili muumi.

⁴⁰ Pita wakabakusha pansengwe boonse, wakafukama akutalika kupaila. Kumana kupaila, wakapilulukila kwakalinga mutuntu akwaamba ayi, “Tabita, nyamuka!” Lyalo Tabita wakalasha, mpeeke ndyaakabona Pita, wakabuka, wekala.

⁴¹ Pita wakamucata palyaansa akumucafwa ayi eemikane. Lyalo wakeeta bashomi, kubikaawo abamukalubinje banakashi akupa Tabita kuli mbabo kaali muumi.

⁴² Cikani ici cakanyumfwika muJopa moonse, mpeeke baanji bakashoma muMwaami Jesu.

⁴³ Kuswawaawo, Pita wakekala nshiku shiinji muJopa kumusankwa wiitwa ayi Simoni shikunyuka mpaya.