Milimo ya Batumwi 8 - Baibo Busansulushi Bwa Libuku Ili

Saulo mbwaakapensha coonde ca kuJelusalemu

¹ Pabushiku bweenka ubo, bene Klistu ba mundabala ya Jelusalemu bakatalika kupenshekwa abuumbi. Boonse bashomi, kukushakobo batumwi, bakapalanganina mumisena yoonse ya Judeya aSamaliya.

² Basankwa bamwi bakalinga kushoma Lesa bakafukila Sitifini, akumulila abuumbi.

³ Sombi Saulo wakeelesha kwaamba ayi anyonyoole coonde. Wakalinga kweenda kuswa muŋanda aŋanda ya bashomi akucata basankwa abanakashi boonse akubaangisha.

Makani Abotu mbwaakashimikilwa muSamaliya

⁴ Mpomunyaawo bashomi abo bakalinga kupalangene bakaya koonse koonse, kabaya cishimikila Makani Abotu.

⁵ Filipo wakaya mundabala inene ya muSamaliya kaaya cishimikila bantu shaUsalitwe wakwe Lesa.

⁶ Ono bantu baanji ndibakanyumfwa maswi akwe Filipo akubona shaankamiko nshaakalinga kucita, bakakutikisha kwaamba ayi banyumfwishishe.

⁷ Wakakusha bashikaswa baanji mubantu, kabooloma pakubakusha alimwi bayuminite mibili abalema myeendo bakaba kabotu.

⁸ Aboobo bantu ba mundabala inene iyo bakasangalala abuumbi.

⁹ Mweeke umo mundabala, mwakalinga kwikala musankwa umwi wiitwa ayi Simoni. Musankwa uyu wakalinga muŋanga wakalinga kukankamika bene Samaliya akunoolibanda ayi ngumulemu.

¹⁰ Aboobo bantu boonse, banike abanene, bakalinga kumulemeka akumunyumfwila. Bakalinga kwaamba ayi, “Simoni ninkusu shakwe Lesa, shiitwa ayi, ‘Nkusu Shiindaawo.’ ”

¹¹ Bantu aba bakalinga kumulemeka akumunyumfwila ceebo wakatalika kalekale kubakankamika ashimpelampela shakwe.

¹² Filipo ndyaakashimikila Makani Abotu aamba shaBweene bwakwe Lesa aliina lyakwe Klistu, bantu baanji, basankwa abanakashi, bakashoma akubombekwa.

¹³ Alakwe Simoni wakashoma akubombekwa. Lyalo wakalinga kweendabo aFilipo ceebo wakakankamana ndyaakabona shitondesho sha nkusu sha kwiculu ashaankamiko nshaakalinga kucita.

¹⁴ Ono batumwi bakalinga muJelusalemu ndibakanyumfwa ayi abalo bene Samaliya bashoma maswi akwe Lesa, bakatuma Pita aJoni kuli mbabo.

¹⁵ Ndibakashika, bakapailila bene Samaliya ayi batambule Mushimu Usalashi,

¹⁶ mukwiinga Mushimu Usalashi kootana kushika pamuntu nabi womwi mulikoto lyabo, nakubi kwaamba ayi bakabombekwa muliina lya Mwaami Jesu.

¹⁷ Lyalo Pita aJoni bakabika maansaabo pali mbabo, mpeeke bakatambula Mushimu Usalashi.

¹⁸ Ono Simoni ndyaakabona ayi bantu abo bakapekwa Mushimu Usalashi batumwi ndibakabika maansaabo pali mbabo, wakakusha maali ayi ape batumwi.

¹⁹ Wakabaambila ayi, “Amumpe nkusu ishi anebo kwaamba ayi uli woonse ngweenga ndabiika maansa, anootambula Mushimu Usalashi.”

²⁰ Sombi Pita wakamukumbula ayi, “Webo fwitabo pantu pomwi amaali ako mukwiinga utooyeeya ayi inga woola cipo cakwe Lesa amaali!

²¹ Taaku lubasu ndoocite mumulimo wesu uyu mukwiinga tooluleme pameenso akwe Lesa.

²² Paceebo ceeco, sanduka kuswa kucibiibi ici ncootooyeeya. Senga kuMwaami kwaamba ayi mpashi inga wakulekelela.

²³ Mukwiinga ndaboona ayi uliswitebo munyono alimwi ulyaangitwe kucibiibi.”

²⁴ Lyalo Simoni wakaambila Pita aJoni ayi, “Anu amumpailileeko mwebo kuMwaami Lesa kwaamba ayi shoonse nshemwaamba shitancitikili.”

²⁵ Pita aJoni ndibakamana kupa bukamboni bwabo bwa pali Jesu Klistu alimwi akushimikila maswi akwe, bakaboolela kuJelusalemu. Ndibakalinga kuya, bakashimikila Makani Abotu mumishi iinji ya muSamaliya.

Filipo amweendeleshi umwi wa kuIsopya

²⁶ Ono munjelo wa Mwaami Lesa wakaambila Filipo ayi, “Nyamuka uye kumalenge, munshila iswa kuJelusalemu kuya kuGasa.” (Nshila iyi tabeendiimo bantu shinoonshiku.)

²⁷ Ncakwiila Filipo wakanyamuka, waya. Ndyaakalinga kuya, wakakumanya mweendeleshi wa kuIsopya uyo wakalinga kulemekwa abuumbi. Muntu uyu wakalinga shikulama buboni bwakwe Kandasi mwaami mwanakashi wa kuIsopya. Wakalinga kuswita kuJelusalemu uko nkwaakalinga mukulambila Lesa, kaaya kumishaabo.

²⁸ Wakalinga kutantite mucikoci kaabelenga libuku lyakalemba mulaluki mukulukulu Isaya.

²⁹ Mpomunyaawo Mushimu Usalashi wakaambila Filipo ayi, “Koya kucikoci cilya, unooya ceenda pafwaafwi ancico.”

³⁰ Ncakwiila Filipo wakacicilaako, wakanyumfwa kaabelenga mulibuku lyakalemba mulaluki mukulukulu Isaya. Lyalo wakamwiipusha ayi, “Sa utokwaanyumfwishisha makani ngootobelenga?”

³¹ Mweendeleshi uyo wakakumbula ayi, “Ino inga ndaanyumfwa buyani kakutaaku ushikunsansulwiita?” Ndyaakamana kwaamba boobo, wakasenga Filipo ayi atante mucikoci, beendele pantu pomwi.

³² Maswi a muMalembo ngaakalinga kuya cibelenga ngaaya, “Wakalinga anga nimbelele itootolwa mukucaikwa, alimwi anga ngumwanaambelele utaliili pakuceswa booya. Taakwe kwaambaawo nabi liswi lyomwi.

³³ Bakamuubya alimwi tabakwe kumoombolosha cabululami. Taaku muntu eshi akaambe shalunyungu lwakwe mucishi mukwiinga buumi bwakwe bwamana.”

³⁴ Mpeeke mweendeleshi wakeepusha Filipo ayi, “Nsansulwiteeko, ino mulaluki mukulukulu uyu utokwaamba ni? Sa utokwaamba pali nguwe mwiine nabi umwi muntu?”

³⁵ Lyalo Filipo wakatalika kumusansulwita, kutalikila mumaswi ngomunya ayo a muMalembo mpaakalinga kubelenga. Wakamulwiita Makani Abotu apali Jesu.

³⁶ Ndibakalinga kuya munshila, bakashika pamusena umwi pakalinga maanshi. Mpomunyaawo mweendeleshi wakaamba ayi, “Amubone anaaya maanshi! Sa kuli cimwi nceenga cankasha kubombekwa?” [

³⁷ Filipo wakamukumbula ayi, “Inga wabombekwa na washooma amoyo wako woonse.” Mpeeke alakwe wakakumbula ayi, “Ncakwiila ndashooma ayi Jesu Klistu nguMwanaakwe Lesa.”]

³⁸ Mpeeke mweendeleshi wakaambila umwi ngwaakalingaakwe ayi eemike cikoci. Lyalo Filipo amweendeleshi bakenjila mumaanshi, mpomunyaawo Filipo wakamubombeka.

³⁹ Ndibakaswa mumaanshi, Mushimu wa Mwaami wakanyamunawo Filipo. Kuswawaawo mweendeleshi uyo taakwe kumubonaawo alimwi, sombi wakatolelela lweendo lwakwe kaasangalete.

⁴⁰ Lakwe Filipo wakalibonenabo kuAsotasi. Wakashimikila Makani Abotu mumandabala oonse kushikila washika kuSisaliya.