Milimo ya Batumwi 5 - Baibo Busansulushi Bwa Libuku Ili

Cikani cakwe Ananiyasi aSafila

¹ Ono kwakalinga aumwi musankwa wiitwa ayi Ananiyasi alimwi amukaakwe Safila. Abalo bakoolisha buboni bumwi mbobakalinga kucite.

² Ndibakasuminishanya amukaakwe, bakacaasha maali amwi ngobakacanaamo akutola amwi kubatumwi.

³ Sombi Pita wakamwiipusha ayi, “Webo Ananiyasi, nceebonshi wasuminisha Satana ayi enjile mumoyo wako kwaamba ayi ubece Mushimu Usalashi, pakucaasha maali amwi ngowakoolisha buboni bwako?

⁴ Kootana kubuulisha bwakalinga bwaako alimwi andiwakoolisha, maali akalinga aako. Ono nciinshi ncewakayeeyela kucita cintu ca mushobo wooyu? Anu tookwe kubeca bantu, sombi Lesa mwiine!”

⁵ Mpeeke Ananiyasi ndyaakanyumfwabo maswi aya, wakawita panshi, wafwa. Lyalo bantu boonse bakanyumfwa shakacitika bakaloonda abuumbi.

⁶ Mpomunyaawo basankwa bakanyamuka, bapombela mutuntu uyo akuya mukuufukila mucuumbwe.

⁷ Ndipakeenda ciindi ciniini, alakwe mukaakwe wakapola, akwinjila muŋanda umo mwakalinga batumwi, kaateshi cakacitika.

⁸ Pita wakamwiipusha ayi, “Nankashi, ndwiite sa aya ngomaali oonse ngomwakacana ndimwakoolisha buboni bwanu abeebayo?” Alakwe wakakumbula ayi, “Ee, mpwaaela peenka apa.”

⁹ Mpomunyaawo Pita wakamwaambila ayi, “Nceebonshi mwakapangana ayi mweeleshe Mushimu wa Mwaami? Bona, basankwa balinga mukufukila beebayo balibo pamulyango, ono awebo batookutola.”

¹⁰ Lyalo mwanakashi uyo wakawita muliimfwa lyakwe Pita, wafwa. Mpeeke basankwa abo ndibakenjila, bakacana ayi wafwa. Alakwe bakamunyamuna baya bamufukilabo lubamba acuumbwe ca beebaye.

¹¹ Mpeeke coonde coonse alimwi abantu bamwi boonse bakanyumfwa makani aya, bakaloonda abuumbi.

Shaankamiko ashitondesho sha nkusu sha kwiculu

¹² Batumwi bakacita shaankamiko alimwi ashitondesho sha nkusu sha kwiculu shiinji pabantu. Bashomi boonse bakalinga kubungana pantu pomwi kumusena wakalinga kwiitwa ayi wakwe Solomoni.

¹³ Taaku muntu watakalinga kushoma wakalinga kulilubyalubya akwinjila mulikoto lya bashomi, nakubi kwaamba ayi bantu bakalinga kubalumbaisha.

¹⁴ Sombi bantu baanji baanji, basankwa abanakashi, bakalinga kushoma muMwaami Jesu bakalinga kubikwa mulikoto lya bashomi.

¹⁵ Ceebo ca shitondesho sha nkusu sha kwiculu shakacita batumwi, bantu baanji bakatola balwashi baanji akubooneka pamalo ampasa mumikwakwa mucanika bantu baanji kwaamba ayi Pita pakwiinda, cimfule cakwe mpashi inga ceenda pabalwashi bamwi.

¹⁶ Mpeeke bantu baanji baanji bakabungana kuswa mumandabala ashingulukite Jelusalemu. Bakaleta balwashi abaabo bakalinga kupenshekwa abashikaswa alimwi boonse bakaba kabotu.

Batumwi mbobakapenshekwa

¹⁷ Ono mupailishi munene alimwi ababye boonse abo bakalinga ba mulikoto lya baSaduki, bakafwita munyono batumwi.

¹⁸ Lyalo bakacata batumwi akubabika muntolongo umo mobakalinga kubika bakaili boonse.

¹⁹ Sombi mashiku, munjelo wa Mwaami Lesa wakesa mukucalula milyango ya muntolongo akubakusha. Wakabaambila ayi,

²⁰ “Kamuya muŊanda yakwe Lesa mukalwiite bantu shintu shoonse shabuumi ubu bupya.”

²¹ Batumwi ndibakanyumfwa makani aya, bakenjila muŊanda yakwe Lesa akutalika kwiisha. Ono mupailishi munene abeshikumucafwa bakeeta bamaloba ba baJuda ayi babe alibungano lya nkuta. Lyalo bakatuma bantu kuntolongo mukuleta batumwi kwaamba ayi boomboloshekwe.

²² Sombi bantu abo bakatumwa ndibakashika kuntolongo, bakacana ayi batumwi tabamo. Aboobo bakaboolela kuboomboloshi akubalwiita ayi,

²³ “Nditwashika kuntolongo, twacaana milyango ilicalitwe abeshikulindilila boonse kabeemfwi pamilyango. Ono sombi nditwacalula shisasa, twacaana taamu muntu nabi womwi.”

²⁴ Ono munene wa beshikulindilila kuŊanda yakwe Lesa abamatanjilili ba bapailishi ndibakanyumfwa makani aya, bakakankamana abuumbi, kabayeeya ayi na nciinshi cacitika kubatumwi.

²⁵ Mpomunyaawo kwakesa musankwa umwi wakabaambila ayi, “Amunyumfwe! Balya basankwa mbomwakalinga mwabika muntolongo batokwiisha bantu muŊanda yakwe Lesa!”

²⁶ Mpeeke uyo munene wa beshikulindilila wakanyamuka abeshikumucafwa, baya kuŊanda yakwe Lesa mukuleta batumwi. Sombi tabakwe kukakatisha batumwi mukwiinga bakalinga kuloonda bantu ayi inga babooma mabwe.

²⁷ Ndibakenjisha batumwi umo mwakalinga boomboloshi, bakabeemika kunembo, mpeeke mupailishi munene wakatalika kubeepusha ayi,

²⁸ “Mwebo twakamukasha akumukonkomesha ayi mutakeeleshi lyobilo kwiisha makani aamba pali Jesu. Sombi mwebo mweeisha muJelusalemu yoonse alimwi mukucita boobo mutooyanda kutupa mulandu wa lufu lwa muntu uyu.”

²⁹ Mpeeke Pita abatumwi bamwi boonse bakakumbula ayi, “Tulyeelete kunyumfwila Lesa, kuteshi bantu, sobwe!

³⁰ Lesa wa bamashali besu bakulukulu wakabusha Jesu kuswa kubafu uyo ngomwakacaya ndimwakamupopa pamucilingano.

³¹ Sombi Lesa wakamusumpula akumubika kulubasu lwakwe lwalulyo ayi abe Mwaami alimwi aMupulushi. Wakacita boobo ayi bantu ba muIsilaeli babe aciindi cakusanduka kuswa kushibiibi shabo, balekelelwe.

³² Tuli bakamboni ba sheeshi shintu, swebo aMushimu Usalashi uyo Lesa ngwaapa kubaabo boonse bamushoma.”

³³ Boomboloshi ndibakanyumfwa makani aya, bakakalala abuumbi cakwaamba ayi bakalinga kusuni kucaya batumwi.

³⁴ Sombi umwi muFalisi mulikoto lyabo wiitwa ayi Gamalyelo, mufundishi wa Milawo, wakalinga muntu ulemekwa abuumbi kubantu boonse. Wakanyamuka mulikoto lya boomboloshi akwaamba ayi batumwi batolwe pansengwe kwaciindi ciniinibo.

³⁵ Mpomunyaawo wakaambila boomboloshinyina ayi, “Nobene Isilaelima, amucenjele asheesho nshemutooyanda kucita kubasankwa aba.

³⁶ Na mwaamba ayi mwiibaluke, kwakalinga muntu wiitwa ayi Teyudasi myaaka iniini yamana. Uyu muntu wakalinga kulisumpula akulibanda ayi ngumuntu mulemu alimwi basankwa bali myaanda yone bakamukonkela. Sombi wakacaikwa alimwi boonse bakalinga kumukonkela bakapalangana amilimo yakwe yoonse yakamana.

³⁷ Pesule, kwakesa Judasi mwine Galili paciindi ndibakalinga kubelenga bantu. Bantu baanji bakamukonkela, sombi alakwe wakacaikwa alimwi abantu boonse bakalinga kumukonkela bakapalangana.

³⁸ Ono kweelana amakani aya ngotucite, mutaciti cintu cibiibi nacibi comwi kubasankwa aba, amubalekebo. Na miyeeyo alimwi amilimo iyi njebatoocita nja bantu, ilaakwaala teshi ikatolelele.

³⁹ Sombi na milimo iyi ilaswa kuli Lesa, teshi mukacikoonshe kubakoma mukwiinga inga mwacana kwaamba ayi mutoolwishanya aLesa!” Lyalo boomboloshi boonse bakakonkela maswi akaamba Gamalyelo.

⁴⁰ Kuswawaawo, boomboloshi bakeeta batumwi akubenjisha mukati. Lyalo bakaambila beshikulindilila kuŊanda yakwe Lesa ayi babakwiipe akubaambila alimwi ayi batakacibooshiiwo kuya cilwiita bantu makani apali Jesu, mpeeke bakabaleka.

⁴¹ Batumwi ndibakaswa muboomboloshi, bakalinga kukondetwe abuumbi ceebo Lesa wakabona kwaamba ayi balyeelete kupenshekwa ceebo cakwe Jesu.

⁴² Lyalo bushiku abushiku, batumwi bakatolelela kwiisha akushimikila Makani Abotu muŊanda yakwe Lesa alimwi amumaanda a bantu ayi Jesu ngoUsalitwe wakwe Lesa.