Milimo ya Batumwi 23 - Baibo Busansulushi Bwa Libuku Ili

¹ Mpomunyaawo Paulo wakalangilishisha beshinkuta akwaamba ayi, “Nobamakwesu, nshintootonsha mumoyo wangu kwaamba ayi ndekala buumi bululeme lyoonse pameenso akwe Lesa kushikila asunu.”

² Ndyaakanyumfwa boobo mupailishi munene Ananiyasi, wakalwiita baabo bakalinga kwiimfwi pafwaafwi aPaulo ayi bamuume pamulomo.

³ Lyalo Paulo wakamwaambila ayi, “Lesa ulaakukuuma, webo olubumbu lwakashingulwa abulongo butuba! Webo ncooshiitile kooko nkwaamba ayi uŋomboloshe kweelana aMilawo, ono alimwi utoosotoka Milawo kwiinda mukwaambila bantu ayi banguume!”

⁴ Ono bantu bakalinga kwiimfwi pafwaafwi aPaulo bakamwaambila ayi, “Utootukana mupailishi munene wakwe Lesa webo!”

⁵ Paulo wakakumbula ayi, “Nobamakwesu, nshindalinga kwishi kwaamba ayi ngumupailishi munene mukwiinga Malembo akwe Lesa alaamba ayi, ‘Tooelete kwaambila muleli wa bantu bako maswi abiibi.’ ”

⁶ Paulo ndyaakabona ayi bamwi umo bakalinga baSaduki, abalo bamwi kabali baFalisi, wakaamba aliswi lya peculu ayi, “Nobamakwesu, nebo ndi muFalisi alimwi ndi mwanaamuFalisi. Ntokoomboloshekwa ceebo cakulangila nkooncite ayi bafu balaakubushikwa!”

⁷ Ndyaakamanabo kwaamba boobo, baFalisi alimwi abaSaduki bakatalika kwaambana, mpeeke bakapansaana.

⁸ (Mukwiinga baSaduki balaamba ayi bafu teshi bakabushikweewo, alimwi ayi taaku baanjelo nabi mishimu. Sombi baFalisi balashoma shoonse ishi shotatwe shitashomi baSaduki.)

⁹ Lyalo ciyobeyobe cakakomena. Mpeeke bafundishi ba Milawo abo bakalinga kulubasu lwa baFalisi bakanyamuka akupikisha cankusu ayi, “Taaku cintu cibiibi nabi comwi ncetwacana mumuntu uyu! Mpashi ngumushimu nabi munjelo ngowakamulwiita shakwaamba.”

¹⁰ Makoto a bantu obilo ayo akaambana cankusu cakwaamba ayi Mutanjilili munene wa bashilumamba wakaloonda ayi batoocaya Paulo. Lyalo wakaambila bashilumamba bakwe ayi baye bamukushe mubantu akumutola mulilinga lyabo.

¹¹ Pabushiku bweenka ubo mashiku, Mwaami Jesu wakeemikana pafwaafwi aPaulo akumulwiita ayi, “Yumya moyo! Wapa bukamboni bwa pali ndime muno muJelusalemu, anu amwalo muLoma ulyeelete kucita bweenka mbowacita muno.”

Bajuda mbobakapangana shakucaya Paulo

¹² Ndibwakaca, baJuda bamwi bakabungana pantu pomwi akupangana bwakucita Paulo. Bakalumbila pameenso akwe Lesa ayi teshi bakalye nabi kunwa cintu naciceyi kushikila bakamucaaye.

¹³ Bantu bakapangana shakumucaya bakalinga kwiindilila pamakumi one.

¹⁴ Mpomunyaawo bakaya kubamatanjilili ba bapailishi alimwi abamaloba ba baJuda akubalwiita ayi, “Twalumbila cancinencine soonse ayi teshi tunoolya cintu nabi comwi kushikila tukacaaye Paulo.

¹⁵ Ono mwebo abeshinkuta boonse, mutumye maswi akusenga mutanjilili munene wa bashilumamba bene Loma ayi alete Paulo kuno. Mumubece ayi mulisuni kunyumfwishisha ncaakacita. Swebo tulilibambite kumucaya kaatana kushika kokuno.”

¹⁶ Sombi mwiicwa wakwe Paulo musankwa wakaanyumfwa makani aya. Mpeeke wakaya mulilinga lya bashilumamba umo mwakalinga Paulo akumulwiitaamo makani oonse ayo.

¹⁷ Mpomunyaawo Paulo wakeeta mutanjilili umwi wa bashilumamba mwaanda akumulwiita ayi, “Tola musankwa uyu kumutanjilili munene wa bashilumamba mukwiinga ulicite makani akumulwiita.”

¹⁸ Mutanjilili wa bashilumamba mwaanda wakamutola kumutanjilili wabo munene akumulwiita ayi, “Ulya Paulo ngotwakaanga, walinga wanjita akunsenga ayi ndete musankwa uyu kuli ndimwe mukwiinga ulicite makani akumulwiita.”

¹⁹ Lyalo mutanjilili munene uyo wakamucata palyaansa wamutola palubasu akumwiipusha ayi, “Ngamakaninshi ngoosuni kundwiita?”

²⁰ Musankwa uyo wakaamba ayi, “BaJuda bamwi banyumfwana ayi bakese kuli ndimwe ciilo, mukusenga ayi mukatole Paulo kubeshinkuta akubeca anga balisuni kunyumfwishisha mulandu wakwe mboobete.

²¹ Sombi mutakabanyumfwili mukwiinga kuli basankwa beendilila pamakumi one beshi bakanooyubite munshila kababelamina Paulo. Bakalumbila pameenso akwe Lesa ayi teshi bakalye nabi kunwa kabatana kumucaya. Bulya balilibambite kumucaya, batoolindilabo bukumbulo kuswa kuli ndimwe.”

²² Lyalo mutanjilili munene uyo wakaamba ayi, “Utalwiiti muntu nabi womwi ayi wanshibisha makani aya.” Mpomunyaawo wakaleka musankwa uyo ayi anooya.

Paulo mbwaakatolwa kumweendeleshi Felekisi

²³ Mpomunyaawo mutanjilili munene uyo wakeeta bamatanjilili bobilo ba bashilumamba mwaanda akubaambila ayi, “Amwaambile bashilumamba bali myaanda yobilo, beshikulwanina pamaaki makumi osanwe aobilo alimwi abeshikulwanisha masumo bali myaanda yobilo kwaamba ayi balibambile kuya kuSisaliya mashiku ciindi ca 9 koloko.

²⁴ Alakwe Paulo mumupe maaki alimwi mumushishe kabotu kumweendeleshi Felekisi.”

²⁵ Lyalo mutanjilili munene wa bashilumamba wakalemba nkalata mwakalinga maswi aya,

²⁶ “Ndime Kulodyasi Lisiyasi nentoolembela ndimwe nomulemekwa beendeleshi baFelekisi. Ndamwaansha na muli kabotu.

²⁷ BaJuda mbobakacata musankwa uyu alimwi bakalinga kusuni kumucaya. Lyalo ndindakeshiba ayi ngumwine Loma, ndakaya abashilumamba bangu mukumufuna.

²⁸ Ndakalinga kusuni kwishiba mulandu ngobakamupa, aboobo ndakamutola kubeshinkuta babo.

²⁹ Ndakacana kwaamba ayi taaku cibiibi ncaakacita ceenga calengesha ayi acaikwe nabi kwaangwa ceebo bakalinga kumubekesha shamiipusho ya paMilawo yabo.

³⁰ Ndindakalwiitwa ayi baJuda bamwi bapangana ayi bamucaaye, paciindi ceenka ico ndakayeeya kumutuma kuli ndimwe. Ndakaambila baabo beshimulandunyina ayi bese baambe mulandu ngobatoomupa kuli ndimwe.”

³¹ Mpomunyaawo bashilumamba bakacita kweelana ambobakaambilwa. Bakatola Paulo akushika mashiku eenkayo kundabala ya Antipatilisi.

³² Bushiku bwakaboolaawo bashilumamba ba panshi bakaboolela kulilinga lyabo akushiya beshimaaki kwaamba ayi batolelele kuyaakwe Paulo.

³³ Bashilumamba ba maaki ndibakamushisha muSisaliya, bakapa mweendeleshi Felekisi nkalata akushiya Paulo mumaansaakwe.

³⁴ Mweendeleshi ndyaakamana kubelenga nkalata ilya, wakeepusha Paulo kulubasu lwa cishi nkwaakalinga kuswa. Ndyaakanyumfwa ayi ngwa kuSilisiya,

³⁵ wakaamba ayi, “Ntoonyumfwa mulandu wako na bese beshimulandunyoko.” Lyalo wakaambila bashilumamba ayi banoomulindilila mumaanda akayaka Elodi.